Read majang Pɛɛyeen Korontoosuk 9 Bible Online

Pɛɛyeen Korontoosuk 9 - majang bible

Pɛɛyeen Korontoosuk 9

¹Ki ɗɛyɛ a kɔna taapiɗiira agut tigi sinɛ ijaagɛɛ dooytaanakɛ sigaagɛ atu Yuudaakekiŋ.

²Ɗegera kɛ ɓaŋkaawakari tɔkɔnyaŋ, ɛkan laka meri ɛɛkoŋk agut joop Mɛkedooniyaak, tonakan sɛɛga eme sɔɔkɔŋk saakan arkiɗii ɗook Akayaak kɛnɔ sɛɛg ragadtaanak tigiya, ɓɔŋgɔɔrɛkan ɗɛyan noŋk sinɛ ɓɛɛlɛ kɛ ɗɔmk joop a ɓɔɔkaaŋ ijaaga sinɔɔna mentanŋɔŋk.

³Ant sineene wosɛyɛɛra kɔɔ manyaakak eteŋka sigi, kɛnɔ meri naŋk ɛɛkoŋk iinakɛ ant sineene sinɔ kat dakɛɛr a ɓɛɛlɛr kanysɛya. Yakana oko sinɛkan kɔna toniiɗa kɛnɔ ragadiir ɛɛk tɔkɔnya a eteŋk agut omoŋ.

⁴Kɔtarkɔɔ joop Mɛkedooniyaak a eet agut omoŋ son lak iinakik nɛ ɔkɔn kɔɔ laŋirki kɔnu a kɔ kiir ragadɛ ɛɛkiŋ nɛkɔɔ lakii keeny meriiɗ naŋk ɛɛkoŋk iinakɛk, nɛkɔɔɓɔ latukari keeny jɛt.

⁵Agut sini in ragadɛɛ ɔɗɔɔkɛ tigi noŋk sinɛkan toniir kɛ gaɓɛɛrkɔɔŋɔŋk. Laŋkaakɔ ata ɗɛyɛ a kɔtar manyaakak eeta sigi eete ɔɗɔɔkɛ kɛnɔkɔɔ kɔna kaar koɓurkuɗ. Nɛ agut sini saakɔɔ kɔrurkuɗak ɓɛɛlɛkɔɔ tigi noŋk a ragadtan, makɔɔ ɓɔrɔ gaɓɛɛr ɗɛyaan, ma moko direeɗ.

⁶In koɓukɛɛ sini. Iɗit sinɔ soowuɗi a tɛmŋɔŋk, nɛkoy ɗootiɗi a tɛm, ma iɗit sinɔ soowuɗi a obiiŋɔŋk nɛkoy ɗootiɗi a obiiŋ.

⁷Iɗit a omoŋ omoŋ in gaɓɛ any sinɛkan koɓu ɓayaay nɛɛkɛ kɛ gaɓɛkɔɔŋɔŋk, ma moko ɓakɛɛ maŋk direeɗ agut sinɔ poru Waakoyot iɗit sinɔ gijiɗi yaakatik.

⁸Oolɛ Waakoyot a kɔna gaɓɛ geet nɛɛk a obiiŋ oko sinɛ ɗɛyɛrɗɔk kɛnɔ ɗɛyɛɛr ɓɛɛnyɔ baŋɛ any sinɛ ɗɛyɛ ɛkana goŋk baŋɛk, ɛ kɛnɔ gayɛɛr agut ijaag any sinɔ mentanŋɔŋk a kaalɛŋ.

⁹Ege sini sinɛɓa taapɛɛ Wargatɛɛ Waakoyotoŋk kɛ, "Gije sankaanak tigii, beeɗkoy ɓɔrɛ mentanka nɛɛkɛ nɔkoy nɔkoyk."

¹⁰Waakoyo sinɛ gaɓɛ eta sinaana soowuɗik wɛykon ma gaɓɛ kiiwu nɔ ɗamɛɛk, arikoy kɔna a obi wɛykon sinɛ ɗɛyɛɛrik, arikoy kɔnu a iinak worikaanak tigii noŋk.

¹¹Ari kɔnu ɓɛɛnyɔwɛ gɛɛŋk baŋɛ a iinak worikaanak kɛnɔ gayɛɛr tigiya ɓɛɛnyɔwɛ gɛɛŋk baŋɛ, kɛnɔ pɔɔsɛr Waakoyo joop a ɓɔɔkaaŋ agut tigi noŋk sinɛ laŋir eteŋkɛɛk.

¹²Agut sinɔ tɔkɔny sini ijaagiirik moko enyɛrɗɛ any sinɛkan bitaɗi rakatkaanakɛ sigɔɔgɛ dooytaanakik baŋɛ dakɛɗa, widerkiɗɛ ɓɔrɛ pɔɔsiyɛ a ɓɔɔkaaŋ son lak Waakoyokuŋ.

¹³Ari kɔnu a eekerkaanak ijaag noŋk sini tigiyoŋk Pɛɛni sinɔɔnɛ Ɓɛlkɛɛstank Kereseek sinɛkan boŋiirik. Agut sinɔ sineene ɗegerɗɛɛ tigi noŋkuk sinɛ gaɓɛɛr sɛɛga a joopa ɔgɔɔkak, nɛ pɔɔsɛr Waakoyo sɛɛg baŋɛ.

¹⁴Ɗɛyɛr kɔnu jɛt ɛkɔna ɗanɗama agut wookan Waakoyotoŋk sinɔ obiiŋɔŋk sinɛ ar iinakɛ takik.

¹⁵In dakɛr pɔɔsiyɛɛk Waakoyota agut tigi nɛɛk sinɛ ki gayɛ a ikomɛɛŋɔŋk.