Read majang Gɛlatiyaa 1 Bible Online

Gɛlatiyaa 1 - majang bible

Gɛlatiyaa 1

¹Ege sini digoy sinɔ taapɛɛrɛɛ seey lak eet Paawuloosuk sinɛkan daka a eet wosɛytan ijaaga Waakoyo sinɛ Ɛpɛn eteŋka goy Yeese Kereseek sinɛɓa boŋku sɛɛn ret walasak, ma mokoɓa goy ɓaŋkawukaat etoŋkuk,

²a manyaakak eteŋka sigɛ sɛɛk a eet agut omoŋɔŋk baŋɛ, dooytaanaka sigaaga atu godey Sambatɛyoŋk Gɛlatiyaak,

³in wookan a bɔdɛ iinaka sooy lak Ɛpɛn eteŋka Waakoyok a Suumi naŋk Yeese Kereseek.

⁴Sɛɛn sinɛɓa gaɓɛ ɛɛk nɛɛk agut tikiyɛ gaŋk ɗɛyaan Waakoyo naŋk a Ɛpɛn eteŋkaak kɛnɔ tin ebɔdɛ eme sineene ŋɛɛwɛnŋɔŋk.

⁵In dakɛ eemɛyɔɔn Waakoyota nɔkoy nɔkoyk. Ameen.

⁶Reemɗiti ɓayɛ agut sinɔ ŋɔɗarkiɗɔ Waakoyo a gorgorŋ sinɛɓa kɔnu riyki wookaan nɛɛkɛkik goy Kereseek, ma weerikɔɔ Pɛɛniya sinɔɔna Ɓɛlkɛɛstank omaltaak.

⁷Kɛɛ Pɛɛni sinɔ Ɓɛlkɛɛstank om ara. Eekeerɛ lakɛ joop a omoŋ omoŋ sigɔ kɔnu ooɗɛrŋɔŋk ɛ ɓaŋkaawurar kɛnɔ ruruŋar Pɛɛni sinɔ Ɓɛlkɛɛstank Kereseek.

⁸Mayakana kɛygun eteŋk maŋk wosɛytaanak dariyoŋk ɔkɔn kɔna waasɛ Pɛɛni sinɔ Ɓɛlkɛɛstank sinɔ ɓɛɛlɛ mowan sinaanɛ kɔna waasiikiŋ, in iɗit sinɛ dakɛ a koonykan.

⁹Topa kɔna kɛkar, oko sinɛkan kɔna toniɗii jeemɛk, ɔkɔn lakɛ iɗit sinɔ kɔna waasɛ Pɛɛni sinɔ Ɓɛlkɛɛstank sinɔ pakata sinaanɛkan tiyɛɛrikiŋ, in iɗit sinɛ dakɛ a koonykan.

¹⁰Anɛ ɗɛya kɛnɔtu pɔɔsɛ iɗit? Maŋk kɛnɔtu pɔɔsɛ Waakoyot? Maŋk gayi kɔna a ara joop kɛnɔ yaa sɛɛga? Ɔkɔnkan ɗɛya kɛnɔ ara joop a sɛɛga yaaŋ, nɛ gunkan moko eet ijaagen Kereseek.

¹¹Iinak manyaakak eeta sigɛ dooytaanakik, ɗɛya kɛnɔ ɗegerari kɛ pɛɛni sinɛkan kɔna waasaak mokokan laŋɛɛ ete.

¹²Mokokan boŋa ete, maŋk kɛɛ iɗit sinɔkanti rɔɔriyɗik, makanta yaaŋɛ Yeese Kerese.

¹³Tiyɛɛrikan kɛ beeɗaakan ɛk jeemɛ saakan eet wosɛytan ŋaadiyɛ Ayuuduk. Ɓaŋkaawuraakan a kaalɛŋ kɛnɔ epapaya joop gode Sambatɛyoŋk Wookoyotoŋk ɛ sɔɔka sɛɛg.

¹⁴Kaalakan ŋaadiyɛɛkɛ Ayuuduk tekaaneer gaaŋk sigɛ atu emeyi gɛŋk ɔɔtɛ naakɛɛkik baŋɛ, nɛkan ɗɛya jɛt kɛnɔ noma barɛɛɗ ɔrɛyakoŋk.

¹⁵Mayakanaɓati daam Waakoyot a inɓati kɛɛ ɓartɛɛt ɛɓati riyki wookaan nɛɛkɛɛk.

¹⁶Nɛɓata yaaŋɛ Tɔɔn nɛɛk kɛnɔ waasa Pɛɛni nɛɛk sinɔ Ɓɛlkɛɛstank agut Sɛɛn joopa sigɔɔga moko joop Ayuuduk. Kɛɛ iɗit sinɔɓa waasiɗiɗiik,

¹⁷maŋk kaaɓa deran Yorsaleema kɛnɔ kɛɛɗii lalaŋikii a joop sigɛɓa wosɛytaanak eete ɔɗɔɔkɛɛk, mayakanaɓa ŋaarira sisa ɗooka Arɛbuk, nɛɓa weeriika kɛkar Dɛmaaskowa.

¹⁸Nɛɓa saadi emeyikɛ sigɔɔgɛ jiitik baŋiya kɛɛɗa Yorsaleema kɛnɔ dɛna Petros, nɛɓa beeɗii a sɛɛn saadi a ɗoŋ aarin a tuul.

¹⁹Kaaɓa taanta wosɛytaanak ɔgɔ Yaykoobe sinaanɛ manya Suumiyaak sɔgɔɔsɔyk.

²⁰Tona kɔna eekeerɛ Waakoyote kɛ moko nyon any sini kɔna taapɛɛraak.

²¹Nɛɓa seedi baŋiya kɛɛɗa ɗooka Sooriyaak a Kilkiyaak.

²²Inɓati kir taanta taamɛ nɔtu ɗegerar joop gode Sambatɛyoŋk sigɛ atu ɗook Yuudaak.

²³Tiyɛrɓa sɛɛk toni sinɔ kɛ, "Iɗit siniɓa tin epapay jeemɛk, waasɛɓɔ sisɔ ŋaadiyɛ sigɛɓa ɗɛyɛ sɔɔkɛtaak."

²⁴Nɛɓa pɔɔsɛr Waakoyo agut eet.