Read majang Epesoon 4 Bible Online

Epesoon 4 - majang bible

Epesoon 4

¹Sisɔ, eet sinɛ korkortan agut Suumik, kalɛya kɔnu kɛnɔ beeɗiir oko sinɛ ɗɛyɛɛɗ Waakoyo sinɛkan kɔnu riyk.

²In rikitɛɛ ɛɛk ɗooka, a beeɗɛɛ mentankaat. A ɓaŋkaawurari oolaan ɛkanɛɛkɛ goŋk ɓɛɛnyɔwɛ gɛɛŋk baŋɛ in beeɗɛɛ oolaan mɛyinoŋk.

³In ɓaŋkaawurɛɛ kɛnɔ koorɛɛ omaayikeen sinɔ laŋɛɛ Wɛɛŋakɛ Waakoyotoŋk a tutusikari bɔdɛɛɗ.

⁴Saaɓa kɔnu riyɗɛɛk nɛɓa kɔnu riygiɗɛɛ ŋaadiyɛ sigɛ kookoriik sigɔ omoŋɔŋk, lakɛ ɛɛk a omoŋ ɛ lakɛ Wɛɛŋa a omoŋ.

⁵Ɛɓɔrɛ lakɛ Suumi a omoŋ, a ŋaadiyɛ a omoŋ, a aadi a omoŋ,

⁶Ɛɓɔrɛ lakɛ Waakoyo a omoŋ Ɛpɛn joopa baŋɛ sinɛ ar rakaay olaatɛ baŋɛk, sinɛ ijaagɗi olaatɛ baŋɛk, sinɛ beeɗ olaatɛ baŋɛk.

⁷Yakana gaɓɛɛɓa wookan eteŋka a omoŋ omoŋ oko sinɛɓa gaamiiɗ Kerese kɛnɔ tina gaɓɛk.

⁸Agut sini tonɛɛɓa Wargatɛɛ Waakoyotoŋk kɛ, "Saaɓa ŋaarɗi rakaayak, nɛɓa diile joop sigɔɓa weelɛɛ sɛɛgŋɔŋk a ɓɔɔkaaŋ, ɛɓa gaɓɛ tigi joopa."

⁹Anɛ sini kɛ, "Ŋaarɓa rakaayak," yaaŋɛ omaay jikon? Yaaŋɛ sini sinɔ kɛ kusɓa Kerese ɗooka sineena raŋanaak saana ar ɗook gowasɔ ɗeekik.

¹⁰Sinɛɓa kus ɗookase raŋanaak saana ar ɗook takik, ege sini sɛɛn sinɛ laŋɛɛ nyon baŋɛk sinɛɓa ŋaark dari olaatɛ baŋɛk kɛnɔ enyɛr ola baŋɛk.

¹¹Sɛɛn sinɛɓa gaɓɛ tigiyak sigi joopa a omoŋ omoŋ nɛ ɔgɔɔk wosɛytaanak, ma ɔgɔɔk joop pɛrkaakoŋk, ma ɔgɔɔk joop sigɔ waasɛr Pɛɛni sinɔ Ɓɛlkɛɛstank, ma ɔgɔɔk koortaanak ŋaadtaanakoŋk, ma ɔgɔɔk rɔɔriytaanak.

¹²Nɔɓa ijaagiiɗ sinik kɛnɔ ragadi ŋaaditaanak ijaaga dooyanoŋk kɛnɔ kɛny gode Sambatɛyoŋk sinɛ ɛɛk nɛɛkik.

¹³Ɛ kɛnɔ mɛlii eteŋk baŋɛ omaayikeena sinɔɔna laŋɛɛ ŋaadiyɛɛkɛ a ɗegerii Tɔɔn Waakoyotoŋk kɛnɔ eteŋk joop sigɔɓa gayiiŋɔŋk oko sinɛ ege Kerese daktan aɓa gayɛŋɔŋk.

¹⁴Seedi son kiikɔɔ ɓɛɛl a eteŋk tɔɔmɔk a tin diile yoŋgoy ɔɗɔɔka kɛ baŋiyak, a tin diile yoŋgoy rɔɔriyɔn sinɔ nyonuk a raamiyɛ joopoŋk gɔɔtaase kɛ gɔɔtaase.

¹⁵Ɗɛyɛ tina a ɓɔlɔɔrii ant baŋɛ a totonii eekeer mɛyin kɛnɔ gaayii Keresee sinɛ ɔɗɔ ɛɛk gode Sambatɛyoŋkuk.

¹⁶Tootoki Sɛɛne nyonitaak ɛɛk etoŋk sigɛ ɓɛɛlɛr kundiyaakɛk. Tootokii ɛ gaagami ɛkan baŋɛ meelatɛɛkɛ, agut sini nyonitaak ɛɛk etoŋkuk a omoŋ omoŋ ijaagiiɗ ijaag sinɛɓa gagiɗɛɛk, nɛ ɓɔlɔɔrɛ ɛɛk baŋɛ nɛ enya mɛyin.

¹⁷Seedi son rɔɔrɔkaaka kɔna tiriyaakɛ Suumiyoŋk kɛ kat beeɗɛ oko joop sigɔ moko Ayuuduk ɓɛɛlɛr koɓiɗa gɛŋk kanysɛyaak.

¹⁸Kɔjurarɓa kalbiyɛ gɛŋkiŋ, yowɛrjuɓa sɛɛk wɛɛŋakɛ Waakoyotoŋkuŋ, agut sinɔ koriiɓa kalbiyɛ gɛŋkiŋ, ɛɓa kilarar ɓayɛtun gɛŋk.

¹⁹Agut sinɔɓa badɛɛɗ sɛɛge keenyk nɛɓa arir ɛkan gɛŋk a barɛr any sinɔ ŋɛɛwɛnŋɔŋk, nɛ ɗɛyɛr a ijaagir ola sigɔ somakɔ sigɔ ɓɛɛlɛr kundiyaakɛk a kir nyɛyɛ.

²⁰Yakana mokokan sɔɔk barɛɛr Keresee oko sinik.

²¹Tiyɛɛrɓa agut Sɛɛn eekeerɛ, agut sinɔ iinak gɛɛŋkik, ɛɓa tiyɛɛr sini nɛɓa barɛɛr eekeer sigɛ atu Yeeseekiŋ.

²²Agut sini in boŋiirɛɛ ɛɛk noŋk sinɛɓa bɔɔlɔŋk sinɛɓa beeɗirɗɔ jeemɛk sinɛ sɔɔktank a raarami a dilɗi tikiyɛɛkaak.

²³In arɛɛ kalbiyɛ goŋk a tɔɔmɔk wɛɛŋakɛ.

²⁴In kadɛɛ ɛɛk sinɔ tɔɔnuk sinɛɓa riiɓɛɛ kɛnɔ gayii a Waakoyok kɛ ɗɔm, a mentanka taamɛkɛ Waakoyotoŋk sinɔ eekeerik a geetit ɛɛkoŋk.

²⁵Agut sini kat tonɛɛ nyon, koy tonii eekeer ɛkanɛɛkɛ gaŋk agut sinɔ eteŋk nyonitaak ɛɛk sinɔ omoŋɔŋk.

²⁶In ŋadɛɛ, mayakana kat ŋadɛɛ a tikiɗikɛɛŋ, kat ɗiirir waawuy a in kɛɛ woorɛɛ ŋadi noŋk.

²⁷Kat ŋɔɗɛɛ milki diyabiloosa.

²⁸Iɗit sinɔ agagaliŋɔŋk, katɓɔ agalɗi seedi son. Ma in ijaag any sinɔ mentanŋɔŋk, arnɛ gɛɛnɛ kɛnɔ kɔnyɛ joop sigɔ rakatɛrŋɔŋk.

²⁹Kat ŋaarki atutunɛ goŋk any sinɔ ŋɛɛwɛnŋɔŋk, mayakana in tonɛɛ pɛɛni sinɔ kɔna geleewɛrgeeɗ joop sinɔ kɔnyɗi oko sinɛ ɗɛyɛɛɗik a gaananɛ sɛɛgŋɔŋk.

³⁰Kat arɛɛ Wɛɛŋa sigɔ Geetitaanakik a sanɗiŋ sigɛɓa kɔnu ɗonyɛɗɛɛk kɛnɔ kɔna dakɛr a any gaamitoŋk ɓɛɛnyɔwa saakoy bɔdɛrɗɔɔk.

³¹In ɔɔyɛɛ ɓaayka, a buudɛ, a ŋadi, a ɗaakan, a nyɔɔna a ola sigɔ ŋɛɛwɛŋɔŋk baŋɛ.

³²Ma in dakɛɛ ɛkanɛɛkɛ goŋk a mentankɛɛ a kɔna sanɗi joop, nɛ in ŋɔŋɔɗiirɛɛ ɛkanɛɛkɛ goŋk oko sinɛɓa kɔne ŋɔɗiitarkiɗ Waakoyot Kereseek.