Read majang Pilipisiyoos 1 Bible Online

Pilipisiyoos 1 - majang bible

Pilipisiyoos 1

¹Sooy lak Paawuloos a Timotiyoos sigɛ laaŋoyeer Yeese Kereseek, joopa sigaaga geetitaanak Yeese Kereseek baŋɛ, sigɛ atu katamɛɛ Pilipisiyoosuk, a ɓɔrɛ ɔɗɔweer gode Sambatɛyoŋk a diyakonaatak.

²In kɔna ɓɛɛlɛ a wookan a bɔdɛ sooy lak Baabɛɛ naŋk Waakoyo, a Suumi Yeese Kereseek.

³Pɔɔsa Waakoyo naak oko sinɛ kɔnu koɓukuɗak,

⁴saa ɗanɗamaaɗa ɓɛɛnyɔwɛ gɛɛŋk baŋɛ agut iinakik baŋɛ, nɛ ɗanɗamaaka yaakat

⁵agut a tukiɗik ɓeny sinaanɛkan tuktank nɔ mɛlɛɛɗa ɓɛɛnyɔwase, agut sinɔ kɔnyɛɛrkanti Pɛɛnii sinɔɔnɛ Ɓɛlkɛɛstank agut omoŋ.

⁶Sinɛkan tuke ijaag sinɔ mentanŋɔŋk iinakɛk, ɗegera kɛ diilekoy mɛlɛɛɗa pediya ɓɛɛnyɔwa sinaanakoy mɛlkiɗ Yeese Kereseek.

⁷Ɔɔtɛ sineene arkiɗa godeey korkoɗɔɔnoŋk sisɔk, a ɓɔrɛ inkanti kɛɛ korkoɗɛɛ, agut sinɔtu kɔnyɛrɗɔ iinak baŋɛ, milkii sinaanɛkanta gaɓɛ Waakoyot wookaan nɛɛkɛkik, kɛnɔ koola eekeer Pɛɛni sinɔ Bɛlkɛɛstank, ɛ ara kɛnɔ in ɓaŋkaawurk, nɛ atukari ɓɛɛnyɔwɛ gɛɛŋk baŋɛ ɓayaay naakɛk.

⁸Sinɛ kɔna lakiɗa ŋɔɗɔk iinak baŋɛ mɛyin Yeese Kereseek ɗegeera Waakoyo.

⁹Saa ɓɛɛlɛɛɗ oko sinikik kɛnɔ mermenari any sinɛ dɔɔsuk nɔ ɗegerariɗ, nɔkoy kɔnu laŋɛɛ a mentaanakari a kɛɛ any sinɔ kɔne keerɛɛk, ɓeny saakoy mɛlkiɗ kɛnɔ enyaakari taamɛ mentankaatoŋk, sigɔ laŋɛɛ goy Yeese Kereseek, nɛkɔɔ kɔne laŋɛɛ pɔɔsiyɛ a eemɛyɔn Waakoyota, ɗanɗamaaka kɛnɔ mɛyin noŋk obulur ɛ in ɓɔlɔɔrɛɛ ɗegerɔɔn a koɓiiɗ baŋɛ.

¹²Iinak manyaakak eeta any sinɛkan laŋkaak baŋɛ, ɗɛya kɛnɔ ɗegerari kɛ arikan kɛnɔ bakaanyir Pɛɛni sinɔ Ɓɛlkɛɛstank a kaalɛŋ.

¹³Agut sini ɗegerar koortaana gode maŋgistiyoŋk, a joop ɔgɔɔk baŋɛ kɛ korkoɗɛɛ kanti agut Keresee.

¹⁴Agut korkoɗɔn naak manyaakakɛ eeta sigaagɛ ŋaadtaanakik a ɓɔɔkaaŋ, ŋaadiɗikɔ Suumii, nɛkɔ laŋir ɓaŋkaawurɔn nɔ waasɛr Pɛɛni Waakoyotoŋk diirikent a kir ɓuriit.

¹⁵Waasɛr joop ɔgɔɔk pɛɛni Yeeseek agut nyeken a lɔlɔs, ma joop ɔgɔɔk waasɛr koɓiiɗ sinɔɔnɛ mentanŋɔŋk.

¹⁶Waasɛr joop sigi Pɛɛni sinɔ Ɓɛlkɛɛstank ɓayaay sinɔɔnɛ eekerkank mɛyin, agut sinɔ ɗegerarɗi kɛ ɓɛɛla seedi kɛnɔ koola Pɛɛni sinɔ Ɓɛlkɛɛstank.

¹⁷Mayakana joop sigɛ waasɛr Keresee a ruruŋarŋɔŋk, ma moko koɓiiɗ sinɔɔnɛ ɓɛɛlɛ kɛ sɛmk, ma poriiɗ ɛkan gɛŋkik a koɓur kɛ, gunta tuukerki rakatɛ korkoɗɔɔna naaka raŋana.

¹⁸Nɛ kɛygun ɓɛlkɛ oko sinikiŋ rakatɛ nɛɛk jikon? Kɛygun waasɛɛ tagay kɛygun eekeerɛ waasɛɛ Keresee gopak baŋɛ. Nɛta yaa agut siniŋ. Ii, yaataaŋ,

¹⁹agut sinɔ ɗegerɗa any sinɛkan laŋkaak kɛ, gayɛkɔɔ wooraana naaka ɗanɗamɔɔn noŋk, a tɔkɔny wɛɛŋa sigɛkanta gaɓɛ Yeesee Kereseek.

²⁰Koora ŋaadiyɛɛkɛ gaanɛ kɛ kɛɛte keeny a daktan, yakana tona diirikent kɛ oko sinɛ a'arɗa goorɛk ɓenyse, kɛygun rɛrkaayaŋ kɛygun kiikaaya rerin, eemɛy Kerese ɛɛk eek naakɛŋ.

²¹Agut Wɛɛŋa gaaŋk beeɗit Kereseek, maɓɔrɛ seekɛ rerk any sinɔ laŋiiɗɛɛ tɔkɔnyk.

²²Nɛ kɛygun beeɗikaaya taareŋ, nɛ laka ijaag sinɔ lak taamɛk. Mayakana kaa ɗegerɔɔn kɛ daama won beeɗit a rer?

²³Ɓakɛyɗiika sigeege pɛɛykiŋ, ɗɛya a ŋaara nɔ kɛɛɗii beeɗii a Keresee agut sinɔ dɔɔs sini jɛt,

²⁴mayakana beeɗit naak taarek ɗɛyɛ iinaka jɛt.

²⁵Koɓukakɔ sini nɛ ɗegera kɛ gaalɗiikakɔɔ, ɛ kɔɔ beeɗaa sooy lak iinakik baŋɛ, nɔ ɓɔlɔɔrɛɛr ŋaadiyɛɛkɛ nɔkɔna yaa.

²⁶Saakɔɔ weeriikiɗa son lak iinakik, meri ɛɛkoŋk sinɛ latukari agut eetik, obiikɔɔ Yeese Keresee.

²⁷Kɛygun ɓɛlkɛ ɛkiŋ, in beeɗɛɛ oko sinɛ ɗɛyɛɛɗ Pɛɛni sinɔ Ɓɛlkɛɛstank Kereseek. Kɛygun kɔrurkaaya nɔkɔnu kɛɛɗa dɛnaaŋ. Kɛygun kɔne yowɛrkaayaŋ, nɛ tiya agut iinak kɛ ɛtɛɛrnɔ agut omoŋ, nɛnɔɔ ariir ɗɔŋkɔɔlɛ wɛɛŋakɛ agut Pɛɛni sinɔ Bɛlkɛɛstank.

²⁸Kat ɓureer joop sigɛkɔnu ɓooyurk a daktan. Ege sini yaaŋtan badɛ nɛŋkik, ma iinaka yaaŋtan bɔdɛɛɗoŋk kus sini sooy lak Waakoyok.

²⁹Gaɓɛɛkan kɔna wookan sini agut Keresee, nɔɓɔrɛ laŋirkɔ rakatɛ agut sɛɛniŋ. Ma moko kɛnɔ ŋaadiɗiikari sɛɛne dakɛɗa.

³⁰Sinɛkan dɛnɛɛr eeteek, sinɛ tiyɛɛr kɛ ɓɛɛlɛ sisɔ eeteek laŋirkɔɔkɔ ɗɔŋkɔɔlɛ sinɛ.