Read majang Pilipisiyoos 2 Bible Online

Pilipisiyoos 2 - majang bible

Pilipisiyoos 2

¹Ɔkɔn latukari ɓaŋkaawurɔn Kereseeŋ, ɔkɔnɓɔrɛ gannanikari mɛyin nɛɛkɛŋ, ɛ ɔkɔnɓɔrɛ latukari omaayikeen a Wɛɛŋa sigɔ Geetitaanak agut omoŋ, ɛ ɔkɔnɓɔrɛ yaaŋɛɛr mentanka a sinɔ kɔna sanɗiiɗɛŋɔŋk ɛkanɛɛkɛ goŋkuŋ,

²agut sini in lotɛɛ ɛɛk a ɓayɛ omoŋ koɓiiɗ a mɛyin a wɛɛŋakɛ nɔ in arɛɛ yaaka naak a enyaaŋ.

³In rikitɛɛ ɛɛk ɗooka, in arɛɛ joop ɔgɔ a dɔɔs sɛɛg iinaka, ma kat merɛɛ ɛɛk a pakaatɛ ɛɛk tekaanikent a poriiɗ ɛkanɛɛkoŋk.

⁴Iinak a omoŋ omoŋ kat mermenari sinɛ kɔnyɛ iinakik dakɛɗa, ma in mermenɛɛ sinɛ kɔnyɛ joop ɔgɔɔk.

⁵In lakɛ koɓi sini rikiteet ɛɛkoŋkuk sinɛɓa lak Yeeseek,

⁶Lakɓa sɛŋk Waakoyotikeen nɛɛk ɓɛɛnyɔwɛ gɛɛŋk baŋɛ, yakanaɓa ki ikomiit a itoɓa lak aɓaŋkawuŋ Waakoyotiikeen sinɛɓa ari Sɛɛn a rɔmaa a Waakoyok.

⁷Nɛɓa sɛŋk ŋɔr eemɛyɔn sinɛɓa lakik baŋɛ, nɛɓa dakɛ a ito sɛɛn laaŋoyen, nɛɓa ɓartɛɛ a ito iɗit, ɛɓa yaaŋɛ ɛɛk a gayi a iɗit.

⁸Nɛɓa yaaŋɛ ɛɛk a sɛɛn iɗit nɛ rikite ɛɛk nɛɛk ɗooka, nɛɓa tiiɗi mɛlɛɛɗa reta laalawutant raŋk.

⁹Nɛ agut sini ɓɔŋgɔɔrɛɓa Waakoyot rakaaya olaatɛ baŋɛ, gageeɗɓa tiriya sigɔ atu tiriyaakɛ baŋɛ rakaayk.

¹⁰Saa ɓɛɛlɛɛɗ oko sinikik, nɛ riiɓakɔ sigɛ atu dari a ɗook a ɗook goyse ɗeekik baŋɛ, ɛtɛr korontunɛ eemɛyɔɔna tiriya Yeeseek,

¹¹nɛ waasɛr atutunɛ gɛŋk kɛ ege Yeese Kerese Suumi, a gaɓɛɛr eemɛyɔn Baabɛya Waakoyota.

¹²Iinak tekaaneer sigɛkɔnu poraak, oko sinɛkan tiiɗiɗɔ ɓɛɛnyɔwɛ gɛɛŋk baŋɛ saakan eet a iinakik, nɛ kɔna tona kɛnɔ tiiɗikari a kaalɛŋ oko sinɛ kɔne yowɛrkiɗak. Agut sini iinak a omoŋ omoŋ kɛnɔ ijaagiir bɔdɛ noŋk adaktan. In ijaagɗikɛɛ a ɓaŋkaawurɛɛ tuɓur a eemɛyɔɔn.

¹³Sinɛ kɔne ijaagɗi nɔ warɛrɗɔ ɛ ijaagirɗɔ oko ɗɛyan nɛɛk sinɔ mentanŋɔŋk Waakoyo.

¹⁴In ijaagɛɛ any baŋɛ a kat noonogaakɛɛ, ɛ kat palamɗiikɛɛ,

¹⁵ɔkɔn ɓɛɛlɛ oko sinikiŋ, nɛ ɓartiyɛɛkɛ sigeege ruruŋaaŋɔŋk ŋɛɛwɛɛŋɔŋk kɔɔr, iinak tɔɔmɔk Waakoyotoŋk sigɔ kɛɛkɔne any sinɔ keerɛɛŋɔŋk a kɔnu kɛɛ laaganyɛɛ a mentaanakariŋ, nɛ ɗaawiir ɗook raŋk a ito iinak maryɔ,

¹⁶agut sini saa widerkiɗɔ pɛɛni wɛɛŋakoŋkuk kɛnɔ kat reera sɔkɔn, ɛ kat bɔɔlaaka sɔkɔn, nɔta dakɛ a any sinɔ meriiɗa ɛɛkik ɓeny saakoy mɛlkiɗ Yeese Kereseek.

¹⁷Nɛ ɔkɔn aasi wɛɛŋa gaaŋk wideerɛɛ a tigi a tuukerkiɗɛɛ uduŋeet a ijaag sinɛ wideetaarɔ Waakoyota ŋaadiyɛɛkɛkiŋ, nɛta yaaŋ. Nɛkɔɔɓɔrɔ dakɛɛr a iinak kaastaanak yaaka naakik.

¹⁸Nɛɓɔrɛ yaakɔnaŋ nɛkɔna yaa a eet agut omoŋ.

¹⁹Ŋaada Suumi Yeese kɛ oolakɔɔ a wosɛyɛɛra Timotiyoos a gorgorŋ son lak iinakik, nɔkɔɔ in tiyɛɛɗa ɔɔtɛ beeɗiit noŋkuk nɔkɔɔta yaa.

²⁰Kɛɛte iɗit sɛɛne sɔgɔɔsɔyk sinɔ koɓi agut ɔɔtɛ noŋkuk ɓayaay.

²¹Rererigeeɗ joop ɔgɔɔk tɔkɔny ɛkan gɛŋkik dakɛɗa, ma kir koɓiit agut Yeese Keresee.

²²Iinak ɔɗɔwa noŋk ɗegerari kɛ paarɛɛkan eekeer Timotiyoosuk, nɛ ɗegerɛɛ nɛkan ɛtii a eet agut omoŋ a ito tɔɔn a ɛpɛn nɛkan rɔɔriyaakii Pɛɛnii sinɔɔnɛ Ɓɛlkɛɛstank agut omoŋ.

²³Agut sini saakɔɔ dɛnɛɛɗa ɔɔtɛ naak kɛ ɓɛɛla ɛkik nɛ ŋaada kɛ wosɛyɛɛrakɔɔ kɔna Timotiyoos a gorgorŋ.

²⁴Maɓɔra ŋaada Suumi kɛ kɔnyɛkɔɔtu nɛkɔɔ kɔra a gorgorŋ.

²⁵Maɓɔrɛ, manya eeta, Aproditu sinɛkan wosɛyɛɛrkɔɔ kɛnɔtu kus kɔnyɛ ant sinaanɛta ɗɛyɛk baŋɛk, laŋkaakɔ ata ɗegeera a wosɛyɛɛra son lak iinakikiŋ. Sɛɛn sinɛkan kaar a ito amaasini a eet agut omoŋ, ɛ piraa naak ijaagoŋk.

²⁶Wosɛyɛɛrakɔna sɛɛn agut sinɔ ɓakɛyɗiiɗ agut sinɔ kɔna lakiɗ ŋɔɗɔ a gunkɔnu dɛnɛ, ɛkan tiyɛɛr gori nɛɛkik.

²⁷Gorukan eekeerɛ jɛt a gunkan rɛrŋ. Nɛkan yakana maariye sɛɛn Waakoyotuŋ, moko sɛɛn dakɛɗa maariyekan ɓɔrɛti kɛnɔ mota tuukiɗiik san sana raŋana.

²⁸Agut sini ɗɛya jɛt a wosɛyɛɛra sɛɛn son lak iinakik kɛnɔ kɔna yaa. Saa dɛnɛrɗɔɔk ɛɓɔrɛ nɔ in pɔyɔɔwur ɓakɛy naakɛk.

²⁹In boŋɛɛ sɛɛn yaakat oko sinɛ ŋaadiɗiiɗ Suumiik, ma ɓɔrɛ in eemɛyɛɛ joop sigɔ ito sɛɛnik baŋɛ,

³⁰agut sinɔ rɛrgunkan agut ijaag, a kan ki koɓiit wɛɛŋaka gɛɛnaak ɛ kɛnɔta enyɛr ijaag sinɔkan kiir oolɛ ata gaɓɛɛrŋɔŋk.