Read majang Pilipisiyoos 4 Bible Online

Pilipisiyoos 4 - majang bible

Pilipisiyoos 4

¹Iinak manyaakak eeta sigɛ kɔnu porak, ɛ kɔna laka ŋɔɗɔk, iinak sigɛ yaaka naakik, ɛ iinak sigɛ dooroy naak ruukeetoŋ. Agut sini in beeɗɛɛ a ɓaŋkaawurɛɛ Suumii.

²Kalɛya Ewodiyaa a Sintikii kɛnɔ taakiɗi ɛkanɛɛkɛ gɛŋk nɔ mɛyi Suumii.

³Ma ɓɔrɛ iin piraa naak ijaagoŋk sinɛ ŋaadɛɛk sinɛ arkin saayk, kalɛyaan kɛnɔ kɔnyun jartiyatɔk sigikan arir ɗɔŋkɔɔlɛ a eet kɛnɔ waasɛr Pɛɛni sinɔ Ɓɛlkɛɛstank, a Kɛlemintoos, a piraakak gaaŋk ijaagoŋk ɔgɔ sigɛɓa tapɛɛ tiriya gɛŋk Wargatɛɛ bɔdɛɛɗoŋkuk[1].

⁴In kɔna yaa Suumii ɓɛɛnyɔwɛ gɛɛŋk baŋɛ. Topa kɔna kɛkar kɛ, "In kɔna yaa."

⁵In ɗegerɛɛ mentanka noŋk joope baŋɛ. Wɔɔŋku Suumii a kɔɔ mɛlkiŋ.

⁶Kat ɓakɛyɗiikɛɛ agut any sinɛ ɓɛɛlɛk. In kalɛyɛɛ Waakoyo ɗanɗamɔɔn sinɔɔnɛ enyaɗ pɔɔsiyɛɛkik agut any sinɛ kɔna ɗɛyɛk.

⁷Ɔkɔn ijaagiir oko sinikiŋ, bɔdɛ Waakoyotoŋk sinɛ ar koɓiiɗ etoŋk baŋɛ rakaayk koorɛ ɓayɛtun goŋk a kalbiyɛ goŋk Yeese Keresee.

⁸Pediya iinak manyaakak eeta, in enya kalbiyɛ goŋk eekeerɛ a eemɛyɔɔn, a ɓɛɛlɛt kɛ ɗɔmk, a ola sigɔ mentaana, a yaagar, a porɛɛŋɔŋk. Ma ɓɔrɛ in koɓɛɛ sigɛ kaalɗiik baŋɛk sigɔ mentaanaŋɔŋk a pɔɔsiɗiigidɛɛŋɔŋk.

⁹In arɛɛ any sinɛkan barɛɛr eeteek, a sinɛkan boŋiirik, a sinɛkan tiyɛɛrik, a sinɛkan dɛnɛɛrik baŋɛ. Waakoyo bɔdɛɛɗoŋk a iinak agut omoŋ.

¹⁰Yaata a pɔɔsa Suumi jɛt, agut sinɔkɔ tukerɗɔ koɓi rakatɛya naakaakik kɛkark. Ɗegera kɛ koɓiikari agut rakatɛ naak ɓɛɛnyɔwɛ gɛɛŋk baŋɛŋ, yakanakan kiir laŋiiɗ ɔɔtɛ sinɔ mentan nɔ yaaŋɛrɗɔ ijaag raŋk any sinɛkan koɓiirk.

¹¹Ma ɓɔrɛ nɔ toniiɗa sinik moko sana any sinɛta ɗɛyɛ beeɗita naakaakik, baraakan saak sinɔ toniiɗa kɛ, "Gayɛta any sinɛ lakaaŋɔŋk."

¹²Ɗegera sinɔ sanɗiɗɛɛŋɔŋ a sinɔ lakiɗɛ any a obiiŋɔŋkuŋ. Kɛygun eet kɛygun okoɗ, baraakan beeɗit naakɛ ɓooɗorɔn a sinɔ lakiɗa ŋaawukuŋ, ɛ sinɔ lakiɗa any a balaŋɔŋk a sinɔ lakiɗa any sinɔ obiiŋɔŋk.

¹³Oola ijaag ola baŋɛk goy Kereseek sinaanɛta gaɓɛ ɓaŋkawukaak.

¹⁴Yakana agut sinɔ kɔnu laŋiiɗɛɛ a iinak kaastaanak rakatɛ naakik, nɛkɔ ijaagiir any sinɔ mentanŋɔŋk,

¹⁵ma omaay saakan tukeeɗa waasɛɛta Pɛɛni sinɔ Ɓɛlkɛɛstank, saakan ŋaarkiɗa Mɛkedooniyaakeek. Iinak ŋaadtaanak sigɛ atu Pilipisiyoosek ɗegerari kɛ kɛɛ gode Sambatɛyoŋk sinɔkanti kɔnyɛ tigi woriyoŋkuk iinakɛ sɔgɔɔsɔyk.

¹⁶Wosɛsɛyarkɔɔkanta tɔkɔny a totopariŋ saakan arkiɗa Tɛsɛlonkeek, saakan ɗegerarɗɔ kɛ laŋkaakan rakatɛk.

¹⁷Moko tona sini ma ɗɛya kɛnɔ laŋa tigi noŋk, ma ɗɛya kɛnɔ kɔna obulur tigi wori noŋkuk.

¹⁸Boŋakan goy Epapiroditusik tigi sinɛkanta wosɛyɛɛrkɔɔk sinɛta ɗɛyɛk a sinɔ kaalɛ sinɛta ɗɛyɛkiŋ. Tigi sini noŋk ito uduŋeet sinɔ ŋaaɗɛ yaagɛrk sinɔ boŋu Waakoyot ɛ yaageeɗik.

¹⁹Enyɛrkɔɔ kɔna Waakoyot any sinɛ kɔna ɗɛyɛk baŋɛ worii sinaanɛkoy ki pediik eemɛyɔɔn nɛɛkɛk goy Yeese Kereseek a ŋaaŋayikiŋ.

²⁰In dakɛ eemɛyɔɔn Baabɛya naŋk Waakoyota, kɛygun nɔkoy nɔkoyk. Ameen.

²¹Inta digoyɛɛ ŋaadtaanak baŋɛ tiriyaakɛ Yeese Kereseek, manɔ ɓɔrɛ kɔnu digoyɛɛtar ŋaadtaana sigɛ atu seeykiŋ.

²²Digoyɛɛtarnɔ kɔnu ŋaadtaana ɔgɔɔk kɛ ɗɔm sigɛ ijaagɗi woy suumi Roomuk.

²³In wookan Suumi, Yeese Kereseek a iinak agut omoŋ.