Read majang Kolasiis 2 Bible Online

Kolasiis 2 - majang bible

Kolasiis 2

¹Ɗɛya kɛnɔ ɗegerari kɛ obi a ɛtɛ ɛk ɗɔŋkɔɔlɛ sinɛ lakaak agut iinak a joop sigɛ atu katamɛɛ Lodokiyaak a sigɛ kanti kir taanta nɔtu ɗegerark.

²Ara ɗɔŋkɔɔlɛ kɛnɔ ɓaŋkaawurar ɓayɛtun gɛŋk kɛnɔ sɛɛg omoŋ mɛyin ɛ kɛnɔ latu koɓi sinɔ daktank baŋɛ sinɔ ŋaaŋayikŋɔŋk, kɛnɔ degerar Keresee sinɛ dugtan Waakoyotoŋk.

³Dugiɗiɓa sooy lak sɛɛnik ɗegerɔn sinɔ kiiɗɛ sukuk a ɗegerɔn ɛɛkoŋk baŋɛ.

⁴Nɛkɔna tona sini kɛnɔ kat lakɛ iɗit sinɔ kɔnu taɓu pɛɛni raamiyɛɛkoŋk.

⁵Kɛygun aasi kɔne yowɛrkaaya taareeŋ, ma wɛɛŋakɛ eet a iinak agut omoŋ. Yaata saa dɛnɛɛɗa beeɗit noŋk sinɔ ɓɛɛlɛ kɛ ɗɔm a ŋaadiyɛ sigɛ ɓaŋkaawarŋɔŋk latukarkiŋ.

⁶Oko sinɛkan dooyɛrɗɔ Suumiya noŋk Yeese Kereseyaak, nɛ in beeɗɛɛ a sɛɛn agut omoŋ,

⁷in gaɓɛɛ tiltilɛ sɛɛne, ɛ kɛnyɛɛ beeɗit noŋk sɛɛne, in beeɗɛɛ a ɛtɛɛ ŋaadiyɛɛkɛ a ɓaŋkawuŋ oko sinɛɓa kɔnu rɔɔriyɗɛɛk. In wideerɛɛ pɔɔsiyɛ sigɔ ɓɔɔkaaŋɔŋk.

⁸In koorɛɛ ɛɛk kɛnɔ kɔnu kat ari iɗit omaay a babadariŋ ɗegerɔɔn nyonoŋk a raamiyɛɛkɛ kanysɛyaak. Ege sini rɔɔriyɔn sinɔkan kus barɛɗ etoŋk a ɗookoŋk, ma mokokan kus sooy lak Kereseek.

⁹Lakɛ Keresee sinaanɛɓa kadi buusɛk kalbi Waakoyotoŋk sinɔ enyaaŋɔŋk.

¹⁰Laŋiirkan enyaaka wɛɛŋakoŋk Keresee, sinaanɛ sɛɛn ɔɗɔ tapaakoŋk baŋɛk a Suumiyɛɛkoŋkuk.

¹¹Yayawɛɛɓa kɔnu agut sinɔɓa ŋaadiɗiɗɔ sɛɛnek, yawɛ noŋk sini kɛnɔ aalɛɛ Keresee ɓɛɛl buusɛ sinɛ tikitank, ma moko yawɛ sinɔɓa ijaagɛɛ ariit etoŋkuk.

¹²Saaɓa kɔnu aadiiɗɛk nɛɓakɔnu kɔɔwɛ a Keresee agut omoŋ. Nɛɓa ŋaararkɔ ret walasa a sɛɛn agut omoŋ, nɔɓa ŋaararkiɗɔ ret walasak agut sinɔɓa ŋaadiɗiɗɔ ɓaŋkawukaat Waakoyo sinɛɓa boŋku Keresee ret walasak.

¹³Iinakɓa reteer agut tikiyɛ goŋk ɛ agut sinɔɓa kɔnu kiiɗɛ yawɛɛɗ buusɛɛ noŋk a ŋaadiir Kereseek. Yakanakɔɓɔ sisɔ ari kɔnu Waakoyot a iinak bɔdtaanak a Keresee agut omoŋ. Ɛɓa kɔne ŋɔɗur tikiyɛ goŋk baŋɛ.

¹⁴Aalɛɓa sɛŋk asɛ taapiyɛ higiyoŋk sinɛɓa tina daririyk ɛɓa tin ɓooɓoyk. Ɔɔyɛɛrɓa tine nɛɓa laalawu laalawutant raŋk.

¹⁵Oko sinik lɔsɛɓa Sɛŋk tapa a suumiyɛ a karkarir sɛɛge ɓaŋkawuka nɛŋk, nɛɓa yaaŋɛ lɔsɛ nɛɛk goy laalawutan nɛɛkik joopa ɗookoŋk baŋɛ.

¹⁶Nɛɓɔ sisɔ kat lakɛ iɗit sinɔ kɔne pɛrɛdɛ agut ɗama maŋk tuu, maŋk agut sinɔ kirɗɔ eemɛyɔɔn ba'aalak, maŋk ba'aal ɛyɛn sinɔ tɔɔnuk, maŋk waawuy Sambatɛyoŋk.

¹⁷Ege ola sigi tipi ola sigɛkoy mɛlɛrkik, mayakana laŋɛɛ eekeer gɛɛŋk Keresee.

¹⁸In koorɛɛ ɛɛk a kat lakɛ iɗit sinɔ kɔnu ari a dakɛɛr kanysɛya a meri ɛɛk koɓiiɗ nɛɛkɛ sinɔɔnɛ ɓɛɛlɛ kanysɛyaak a tonu kɛ laka pɛrkiyɛ a kɔnu ari kɛnɔ rikiteer ɛɛk ɛ ugumeer wosɛytaanakaak.

¹⁹Iɗit sinɔ ito sinik kiiɗɛ lalaŋ a Keresee sinɛ ɔɗɔ ɛɛkoŋkuk. Aawoy Waakoyot omaayikeen ŋaadtaanakoŋk oko ɗɛyan nɛɛk Keresee, oko sini tootokiiɗ nyonitaak ɛɛkoŋk baŋɛ meelatɛɛkɛ agut omoŋ nɔ ɓɔlɔɔrɛrɗik.

²⁰Rɛrarikan a Keresee agut omoŋ, nɛkan kɔnu pakatiki barɛɗakɛ ɗoo sinik. Anɛ ɓalɗiikari sekiyɛɛka sigeega agut jikon?

²¹Sigɔɔga tonur kɛ, "Kat gaamunk, kat lɛɛlɛmunk, kat ɓeesink."

²²Ege sigi sekiyɛ a rɔɔriyɔn ijaag etoŋkuk, nɛ ijaagɗi ɔɔtɛya sinɔɔna balaaŋɔŋk nɛkɔɔ badɛr sisa.

²³Ola sigi dɛnɛɛ a ito latu ɗegerɔn ɛɛkoŋk agut sinɔ tukerkiɗ ugumeet ɔɔtɛ nɛŋk, a rikiteet ɛɛkoŋk, a laaŋoy ɛɛkoŋk, mayakana kɛɛ sɛɛge tɔkɔny oko sinɛ koɓurɗu koɓi a ɗɛyan taaroŋkuk.