Read majang Kolasiis 3 Bible Online

Kolasiis 3 - majang bible

Kolasiis 3

¹Agut sinɔkan ŋaararkiɗɔ ret walasa a Keresee agut omoŋɔŋk, nɛ in ɗɛyɛɛ a ɓaŋkawuŋ ola sigɛ atu dari rakaayk sinaanɛ beeɗiiɗ Kerese ɗiɗikakɛ Waakoyotoŋkuk.

²Nɛ in koɓiikɛɛ agut ola sigɛ atu darik, ma kat koɓiikɛɛ agut ola sigɛ atu ɗookuk.

³Agut sinɔ rɛrariɓa nɛɓa dugiɗi wɛɛŋa goŋk a Keresee agut omoŋ sooy lak Waakoyok.

⁴Saakoy yaaŋɛɗ ɛɛk Kerese sinɛ wɛɛŋa goŋkuk, nɛkoy ɓɔrɛ kɔnu yaaŋɛɛ a sɛɛn agut omoŋ eemɛyɔɔn.

⁵In ɔɔyɛɛ tikiyɛ sigɛ laŋɛɛ beeɗit noŋk baŋɛ, sɛɛg sigi ruunyikeen, a somikeen, a molkotɔn, a ɗɛyan sinɔ ŋɛɛwɛnŋɔŋk, golɛ sinɔ ugumeeɗɛ raŋaawotakaak.

⁶Mɛlkikoy goopan Waakoyotoŋk agut joop sigɛ ijaagir ola sigik.

⁷Beebeɗariɓa ɓɔrɔ jeemɛ aɓa ijajagari ola sigi saaɓa atukuɗɔ joope sigɔɔgɛ kir tiiɗitik kɔɔrk.

⁸Mayakana sisɔ in ɔɔyɛɛ ŋadi, a buudɛ, a ɗɛgɛ, a laganyɔn, nɛ kat tonɛɛ any sinɔ lagiɗɛɛ keenyk.

⁹Kat totonɛɛ nyon ɛkanɛɛkɛ goŋk, agut sinɔ karkartariɓa ɓɛɛl ɛɛk sinɛɓa bɔɔlɔŋk a ijaag nɛɛk agut omoŋ,

¹⁰kadiirkɔ ɓɛɛl ɛɛk sinɔ tɔɔnuk sinɛ arɛɛ a tɔɔn ɓɛɛnyɔwɛ gɛɛŋk baŋɛ ɗegerɔɔnuk a gayi a Waakoyok sinɛɓa riiɓiik.

¹¹Ant sineene kɛɛ pakakat joope sigɔɔgɛ moko Ayuuduk a joope Ayuuduk, a joope sigɔɔgɛɓa yayawɛɛŋɔŋk a sigɔɔgɛɓa kɛ yayawɛɛk, a joope sigɔɔgɛɓa kir gayɛ a sigɔɔgɛɓa gayɛrŋɔŋk, a joope sigɔɔgɛ laaŋoyeerk a sigɔɔgɛ atu yaakaatik kɔɔr. Keresee baŋɛ, beeɗ joope baŋɛ.

¹²Iinak joop Waakoyotoŋk sigɔ geetitaanakik sigɛɓa kɔnu poru nɔɓa kɔnu daam ɛɛka nɛɛkaakik, agut sini in kadɛɛ sinɔ kɔna sanɗiiɗ joopk, a mentanka, a rikiteet ɛɛkoŋk, leemikeen, a ɓaŋkaawurɔɔn oolaanik.

¹³In ɓaŋkaawurɛɛ oolaan ɛkanɛɛkɛ goŋk, ɔkɔnkɔ iinakɛ iɗit omaay tike mɛɛnoŋ, nɛ in ŋɔŋɔɗiirɛ ɛkanɛɛkɛ goŋk. In ɓɔrɔ ŋɔɗiirɛ oko sinɛɓa kɔne ŋɔɗiitarkiɗ Kereseek.

¹⁴Sigeege baŋɛ, in kadɛɛ mɛyin sinɔ tuse ola baŋɛ sinɔ laŋiiɗɛɛ omaayikeenik.

¹⁵Nɛ in obulur bɔdɛɛɗ ɓayɛtunɛɛkɛ goŋk. Riyɛɛɓa kɔnu a iinak nyonitaak ɛɛk sinɔ omoŋɔŋk agut bɔdɛ sini. In pɔɔsɛɛ Waakoyo.

¹⁶Nɛ in lakɛ Pɛɛni Waakoyotoŋk a enyaaŋ beeɗit noŋk baŋɛ, iinakɛ in iɗit omaay rɔɔriy mɛɛno ɗegerɔɔn baŋɛ ɛ koykoyɛɗ. In iiliyakɛ a pɔɔsɛɛ Waakoyo ɓayaay iiliyaakɛ, a tukuun, a iiliyaakɛ dooyanoŋk.

¹⁷In ijaagɛɛ tiriyaakɛ Suumi Yeeseek any sinɛ ijaagiirik baŋɛ, a pɔɔsɛɛr Waakoyo Ɛpɛn eteŋka goy nɛɛkɛk, kɛygun pɛɛnii kɛygun ijaag.

¹⁸Iinak jartiyatɔk, in tiiɗikɛɛ babuyka goŋk agut sinɔ tiyaan any sinɔ liki Suumiyaak.

¹⁹Iinak babuyk, in porɛɛ jartiyatɔ goŋk, kat laaŋoyɛɛ sɛɛg.

²⁰Iinak tɔɔmɔk, in tiiɗikɛɛ bɔɔlɔŋeera goŋk ant baŋɛ agut sinɔ ege sini any sinɔ yaa Suumiyaak.

²¹Iinak bɔɔlɔŋeer, kat lowɛɛ tɔɔmɔk goŋk a goopari sɛɛgiŋ kɛnɔ kat badɛr sɛɛge ŋaadiyɛ gɛŋk.

²²Iinak laaŋoyeer, in tiiɗikɛɛ suumiyɛɛka goŋk ɗookoŋk ant baŋɛ, moko tiiɗikari kɛnɔ dɛnɛr joop nɔ yaa sɛɛga, ma tiiɗikari a ɓureer Suumi Yeesee ɓayaay sinɔɔnɛ ɓɛɛl kɛ ɗɔmk.

²³In ijaagɛɛ any sinɛ ijaagiirik baŋɛ ɓayaay a yaakaat a ito ijaagɗigiɗɔ Suumi Yeesee, ma moko ijaagɗigiɗɔ iɗit.

²⁴In ɗegerɛ kɛ gaɓɛkoy Suumii any sinɛɓa ŋɔɗɛɛk ruukeetoŋk. Agut sinɔ ijaagɗiɗɔ Suumi Kereseek.

²⁵Iɗit sinɔ ijaag any sinɔ ŋɛɛwɛnŋɔŋk goopɛɛkoy agut ijaag nɛɛk any sinɔ ŋɛɛwɛnŋɔŋk, agut sinɔ kɛɛ pakaatan sooy lak Waakoyok.