Read majang Omoŋ Tɛsɛlonkeek 1 Bible Online

Omoŋ Tɛsɛlonkeek 1 - majang bible

Omoŋ Tɛsɛlonkeek 1

¹Ege sini wargatɛ sinɔ taapiɗirii eteŋk Paawuloos, a Siilaas, a Timotiyoos joopa gode Sambatɛyoŋk sigaaga atu Tɛsɛlonkeek sigaaga tekaaneer Ɛpɛne eteŋka Waakoyotek a Suumii Yeese Kereseek. In wookan a bɔdɛ iinaka.

²Pɔɔsii Waakoyo agut iinak baŋɛ ɓɛɛnyɔwɛ gɛɛŋk baŋɛ, saa kɔnu koɓukiɗii ɗanɗamɔɔnuk.

³Koɓukii kɔnu a kii yawɛɛɗ taamɛkɛ Waakoyo naŋk a Ɛpɛn eteŋkak kɛ ɓaŋkaawurarikan oolaan ŋaadiyɛɛkɛ sigaagɛ kookoriik sigɛ latukari Suumii naŋk Yeese Kereseek ɛ kɛ bɔɔlaakarikan agut mɛyin noŋk ɛ kɛ ijaagɗiikarikan ŋaadiyɛɛkɛ goŋk ɛkiŋ.

⁴Iinak manyaakak eeta sigɛkɔnu porɛɛ Waakoyotek, ɗegerii kɛ daamkan kɔnu Waakoyotuŋ.

⁵Saakan kɔna waasɛɛɗii Pɛɛni sinɔ Ɓɛlkɛɛstank mokokan pɛɛni dakɛɗa, makan ɓaŋkawukaat a Wɛɛŋakɛ sigɔɔgɛ Geetitaanakik, ɛɓɔrɛ dakɛɛr a eekerkaanak agut Pɛɛni sinɔ Ɓɛlkɛɛstank. Ɛɓɔrɛ ɗegerari kɛ saakan arkiɗii saay lak iinakik kɛ beeɗiikan ɛk agut iinakiŋ.

⁶Kɛygunkan laŋirkɔ rakatɛ sinɔ ɓaŋkawuŋɔŋkuŋ, nɛkan boŋiir Pɛɛni nɛɛk yaakaat sinaanɛkan kɔna gaɓɛr Wɛɛŋa sigɔ Geetitaanakik. Nɛkan nomɛrɗɔ rɔmɛ naŋk a Suumiyoŋk. Saakan boŋurɗɔ Pɛɛni nɛɛkik, nɛ nomɛrɗɔ rɔmɛ naŋk a Suumiyoŋk.

⁷Nɛ agut sini dakɛɛrkɔ a rɔmɛ sinɔ mentanŋɔŋk ŋaadtaanaka baŋɛ sigaaga atu ɗook Mɛkedooniyaak a Akayaak.

⁸Pɛɛni Suumiyoŋk sinɛkan kɔne ŋaarkik mokokan tiyɛɛ Mɛkedooniyaake a Akayaake dakɛɗa, makan ɓɔrɛ tiyɛɛ nyon baŋɛɛŋ ŋaadiyɛ sigɛ latukari Waakoyotekiŋ, nɛ agut sini ki tina ɗɛyɛ a tonii ant sineene raŋk any omoŋ.

⁹Waasɛr sɛɛk ɔɗɔwa nɛŋk kɛ saakan mɛlkiɗii son lak iinakik, nɛkan tin boŋiir ɛk, ɛkan waasɛr kɛ weerikɔɔkan raŋaawotakɛ Waakoyota kɛnɔ ijaagɗikari Jooka sinaana lak wɛɛŋa ɛ eekerkank ɛk.

¹⁰Ɛ ɓɔrɛ waasɛr kɛ kookorari ɛk mɛlɛɛ Tɔɔn Waakoyotoŋk Yeese Kereseek, Sɛɛn sinɛɓa boŋku Waakoyot retik sinɛ koy tin ebɔdɛ goopan sinaanɛ koy mɛlkik.