Read majang Omoŋ Tɛsɛlonkeek 3 Bible Online

Omoŋ Tɛsɛlonkeek 3 - majang bible

Omoŋ Tɛsɛlonkeek 3

¹Nɛ agut sini saa kiiɗii oolɛ a koorikii ɔɗɔka ɓaŋkawurɔɔn oolaanik, nɛkɔ dɛnii a tina mentan a dakii Ateenaake mowan.

²Nɛkan wosɛyɛɛrii kɔna manya eteŋka Timotiyoos sinɛ ijaagen Waakoyotoŋk a eteŋk agut omoŋɔŋk nɛ waasɛ Pɛɛni sinɔ Ɓɛlkɛɛstank. Nɛ kɔnu rɔɔriy nɔ ɛtɛɛr nɔ ɓaŋkaawurari ŋaadiyɛɛkɛ.

³Nɛkɔ kɔnu ar rakatɛ sini laŋirkɔɔk kɛnɔ kat lakɛ iɗit sinɔ ɓeesiɗiik. Ɗegerari kɛ ege rakatɛ sini any sinɛkan tina gaamɛɛk.

⁴Eekeerɛ saakan eteŋk a iinak agut omoŋɔŋk, rɔɔrɔkiikan kɔna kɛ laŋkiikoy rakatɛɛŋ. Nɛkɔ mɛlki rakatɛ nɛɛkɛŋ oko sinɛ ɗegerarɗɔɔk.

⁵Agut any sini kaaɓɔ oolɛ a koorika oolaan seedi sonŋɔŋk, nɛkan wosɛyɛɛra Timotiyoos son lak iinakik kɛnɔ ɗegera ŋaadiyɛ goŋk. Kaɗiigiɗakan any sinɔ kaɗɛɛŋ paari kɔnu setan nɛkɔ ijaag naŋk dakɛ kanysɛya.

⁶Yakana sisɔ kuskɔ Timotiyoos saay son lak eteŋkik nɛkan tina kus tonu waasiyɛ sigɔ yaagarŋɔŋk agut ŋaadiyɛ goŋk a mɛyin noŋk. Nɛkɔ tina tonu kɛ koɓiirnɔ tin ɓɛɛnyɔwɛ gɛɛŋk baŋɛ a mentan, ɛ nɔ latukari ŋɔɗɔ sinɔ gun tin dɛnɛrɗɔɔŋɔŋk oko sinɛ lakiɗii kɔna ŋɔɗɔ sinɔ gunkɔnu dɛnɛɛɗiiŋɔŋk.

⁷Agut sini iinak manyaakak eeta, kɛygun aasi seek arkaayii san a rakatɛɛ takiŋ, gaananiikan ɛkan gaŋk iinakɛ ŋaadiyɛɛkɛ goŋk.

⁸Ege beeɗiit noŋk ɓaŋkaawurarɔɔn Suumii Yeeseek wɛɛŋan eteŋka.

⁹Ɛsii widerii pɔɔsiyɛɛ sisek agut iinak. Pɔɔsii Waakoyo jɛt agut yaaka sinɛ laŋii taamɛkɛ gɛɛnɛ agut iinakik.

¹⁰Ɗanɗamaakii kaay a waawuy a ɓaŋkawuŋ kɛnɔ koy kɔnu dɛnii taamɛkɛ gaŋk, ɛ kɛnɔ oolii nɔ enyɛɛrii any sinɛ bitak ŋaadiyɛɛkɛ goŋkuk.

¹¹Ɛ ɓɔrɛ in tina kemu Ɛpɛna eteŋka a Waakoyo naŋk a Suumi naŋk Yeesee gopan naŋk nɔkoy mɛlɛrkiɗii son lak iinakik.

¹²In kɔna tuuke Suumii mɛyin sinɛ latukari ɛkanɛ goŋkuk a sinɛ latukari joopa ɔgɔɔkak ɛ kɔna ari a obulurŋ oko sinɛ kɔnu poriiɗiik.

¹³Nɛ ari a ɓaŋkaawurar ɓayɛtun goŋk kɛnɔ koy kat lakɛ any sinɔ kɔne keerɛɛ taamɛkɛ Ɛpɛnaak. Saakoy mɛlkiɗ Suumi naŋk Yeeseek a joop gɛɛŋk sigɔ geetitaanakik baŋɛk.