Read majang Pɛɛyeen Tɛsɛlonkeek 3 Bible Online

Pɛɛyeen Tɛsɛlonkeek 3 - majang bible

Pɛɛyeen Tɛsɛlonkeek 3

¹Pediya nɛɛka, iinak manyaakak eeta sigɛ dooytaanakik, intina ɗanɗamaakɛɛ kɛnɔ bakaanyir Pɛɛni Suumiyoŋk a gorgorŋ ɛ eemɛyɛɛ oko sinɛ ɓɛɛlɛɛɗ sooy lak iinakik.

²Ɛɓɔrɛ intina ɗanɗamaakɛɛ kɛnɔ bɔdii tikiyɛɛkɛ a joope sigaagɛ ŋɛɛwɛɛk agut sinɔ moko joop baŋɛ ŋaadirɗi Suumiik.

³Mayakana sɛŋk ŋaadɛɛ Suumiiŋ, arikɔɔ kɔnu sɛŋk a ɓaŋkaawurar ɛkɔɔ kɔnu koorɛ setaneŋ.

⁴Ŋaadiɗikii Suumii kɛ ruumeerkɔɔ sinɛ kɔna sekii sisekiŋ ɛkɔɔ ariir ɔɗɔɔka.

⁵In kɔna ikekeɓi Suumii kɛnɔ ɗegerari mɛyin Waakoyotoŋk a ɓaŋkaawurɔn oolaanik Kereseek.

⁶Iinak manyaakak eeta sigɛ dooytaanakik, sekiɗikii kɔna tiriyaakɛ Suumi Yeese Kereseek kɛnɔ pakatiir ɛɛk joope sigɔɔgɛ dɔɔtɛɛk baŋɛ sigɔɔgɛ kir beeɗiit rɔɔriyɔɔn sinaanɛkan boŋiir eteŋkɛɛk.

⁷Agut sinɔ ɗegerari sɔɔk ɔɗɔwa noŋk kɛ ɗɛyɛ kɔna a nomɛrɗɔ rɔmɛ naŋk. Saakan eteŋk a iinakik kiikan beeɗiit a eteŋk dɔɔtɛɛ.

⁸Kɛɛ iɗit sinɔkan ɗamɗii ɗama nɛɛk sɔkɔnk, ijaagɗikiikan kaay a waawuy a ɓaŋkaawurii a bɔɔlaakii a kɛɛ iɗit sinɔ dakigiɗii a diilk.

⁹Mokokantine kɛɛ oolan sinɔ laŋiiɗii tɔkɔny noŋkuk. Makan ɗɛyii kɛnɔ nomɛɛr rɔmɛɛɗ naŋk.

¹⁰Agut sinɔ saakan eteŋk a iinakik, rɔɔrɔkiikan kɔna kɛ, "Iɗit sinɔ ki poriiɗ ijaagik, kat ɗami."

¹¹Tiyiikan kɛ lakɛnɔ kɔne kɔɔr joop a omoŋ omoŋ sigɔ dɔɔtɛɛk, a moɗɛr sayitiyɛ ɛ guugunyar anta joopoŋk nɛ laaganyaŋɔŋk.

¹²Sekii kɔna ɛ rɔɔrɔkii joopa sigɔɔga ito sigik tiriyaakɛ Suumi Yeese Kereseek kɛnɔ in beeɗir kɛ ɗɔm ɛ ijaagiɗi nɔ ɗamar ɗamati gɛŋk.

¹³Iinak manyaakak eeta sigɛ dooytaanakik, kat bɔɔlakɛɛ ijaag any sinɔ mentanŋɔŋkuk.

¹⁴Ɔkɔn lakɛ iɗit sinɔ ki boŋiiɗ rɔɔriyɔn wosɛ sinɛkɔ kɔna gaɓɛɛriikiŋ, in mermenɛɛ kɛ ɗɔm nɔ ɗegerɛɛ iɗit sinɔ ito sinik, kat ɗɛyɛrgiɗɔ lalaŋ kɛnɔkɔɔ lak keeny.

¹⁵Kat ikomiir a ito gumaaken, ma in rɔɔriyɛɛ oko masookoy noŋk.

¹⁶In kɔna gaɓɛ Suumi bɔdɛɛɗoŋk bɔdɛ ant baŋɛ ɓɛɛnyɔwɛ gɛɛŋk baŋɛ. In Suumi a iinak baŋɛ.

¹⁷Eet Paawuloos sinɛkɔ taapɛɛra digoy sini ariit naakɛkik. Ege sini yaaŋtan sinɔ laŋɛɛ wosɛyɛɛkɛ gaanɛɛk baŋɛk. Ɛ taapɛɛra oko sinik.

¹⁸In wookan Suumi naŋk Yeese Kereseek sooy lak iinakik baŋɛ.