Read majang Omoŋ Timotiyoosuk 1 Bible Online

Omoŋ Timotiyoosuk 1 - majang bible

Omoŋ Timotiyoosuk 1

¹Ege sini wargatɛ sinɔ taapɛɛrɛ seey lak Paawuloos sinɛ wosɛytan Yeese Kereseek sekiyɛɛkɛ Ebɔdtan naŋk, Waakoyote a ŋaadiyɛɛkɛ gaŋk sigaagɛ kookoriik Yeesee,

²Timotiyoosa sinaana tɔɔn naak ŋaadiyɛɛkɛ eekeerɛk inna dakɛ a wookan a maariyeet a bɔdɛ sooy lak Ɛpɛn eteŋka Waakoyok a Suumi naŋk Yeese Kereseek.

³Saakan kɛɛɗa Mɛkedooniyaak nɛkanni kalɛya kɛnɔ ɓɛlkuunun Epesoone kɛnɔ kaaɓun joop a omoŋ omoŋ sigɔ rɔɔriya nyonɛk a kat rɔɔriya,

⁴ɛ kɛnɔ kat ŋɔɗutar ɛkan korgɛɛnyaka a ikomiitaka komoyɛɛkoŋk sigɔɔga kɛɛ sɛɛge sukuk. Agut sinɔ ɗɔkarki ola sigi palamɛ, ma kir kɔnyɗiit ijaaga ŋaadiyɛɛkɛ Waakoyotak.

⁵Ege deran sekiyɛ sigik mɛyin sinɔ laŋɛ ɓayaay sinɔɔnɛ mentanŋɔŋk, a kalbi sinɔ kɛɛ laaganyɛɛk a ŋaadiyɛɛkɛ sigɔɔgɛ eekerkaanakik.

⁶Mayakana joop a omoŋ omoŋ pakatirkan ɛɛk olaatɛ sigeege nɛkan ŋɔɗutar ɛkan palamɛya sinɔɔna kiiɗɛ ɔɔtɛk,

⁷ɗɛyɛr a sɛɛg rɔɔriytaanak higi Muuseek, ma kir ɗegerɔɔn any sinɛ tonurk maŋk kir koɓiiɗ any sinɛ palamɗigeeɗik.

⁸Ɗegeriikɔɔ kɛ mentan higiiŋ, ɔkɔn iɗit ijaagɗi higii a ɓɛɛlɛ kɛ ɗɔm.

⁹Ɛɓɔre ɗegerii kɛ mokoɓa ijaagɛɛ higi joopa sigɔɔga mentaanaŋɔŋk, maɓa ijaagɛɛ joopa sigɔɔga ŋɛɛwɛɛŋɔŋk, joopa sigɔɔga sɔɔkɛr higiik, a joopa sigɔɔga kir tiiɗitik, a tikitaanaka, a joopa sigɔɔga moko geetitaanak a joopa sigɔɔga daraayɛr Waakoyok, a joopa sigɔɔga kɛɛ sɛɛge tuɓur Waakoyotoŋk, a joopa sigɔɔga ɓokootar ɛpɛnaakak a ɛmɛsaakak, a joopa sigɔɔga ɓokootaŋɔŋk,

¹⁰a joopa sigɔɔga ibiɗiŋɔŋk, a moojaka sigɔɔga ijaagir ruunyikeen a moojakik, a joopa sigɔɔga ɓaɓaliiɗ joopuk, a nyonkaanaka, a joopa sigɔɔga wogoyɛr nyonɛk, a joopa sigɔɔga ɓooyur rɔɔriyɔn sinɔ eekeerik.

¹¹Laŋɛɛ rɔɔriyɔn sinɛ eekerkank Pɛɛnii sinɔɔnɛ Ɓɛlkɛɛstank sinɔɔnɛ eemɛyɛɛŋɔŋk sinɛ kanta gaɓɛ a adarat Waakoyo sinɛ geetitank kɛnɔ waasaak.

¹²Pɔɔsa Suumi naŋk Yeese Keresee sinɛkanti ari a eekerkank, ɛ kanti daam nɛta gaɓɛ ɓaŋkawuka kɛnɔ ijaagɗika sɛɛnakiŋ.

¹³Nyɔnyɔnaaɓa jeemɛ Keresee, ɛɓa epapaya, ɛɓa dararaya. Mayakana ɓati maariye sɛŋkiŋ, agut sinɔɓa ijajagɗa any sini a kaa ɗegerɔɔnuk saaɓa kiiɗa ŋaadiɗiitik.

¹⁴Gakiɓa tina Suumi naŋk a obiiŋ wookan nɛɛk ŋaadiyɛɛkɛ a mɛyin sinaanɛ ar sooy lak Yeese Kereseek.

¹⁵Ege sini Pɛɛni sinɔ eekerkank a ɗegeera a boŋur jooŋɔŋ. Kusɓa Yeese Kerese ɗooka kɛnɔ ebɔdɛ tikitaanak. Tikitan eet kɛ ɗɔm tikitaanakɛ.

¹⁶Yakanakanta ijaag maariyeet kɛnɔ yaaŋɛ Yeese Kerese ɓaŋkaawurɔn nɛɛk oolaanik sinɔ obiiŋɔŋk, eete sinaanɛ tikitank kɛ ɗɔmk kɛnɔ daka a rɔmɛ joopa sigaaga ŋaadir Suumiik, kɛnɔkoy laŋir bɔdɛ sinɛkoy nɔkoy nɔkoyk.

¹⁷In dakɛ eemɛyɔɔn a pɔɔsiyɛ nɔkoy nɔkoy Suumiya sinaanakoy nɔkoy nɔkoyk, sinaanakoy ki rerink sinaana kɛɛ taantaak Jooka sinaana omoŋɔŋk. Ameen.

¹⁸Iin tɔɔn naak Timotiyoos, gaɓaana sekiyɛ sigi a adarat oko sinɛɓa toniiɗɛɛ pɛrkaakɛ jeemɛ agut iinik. Tima kaarin sinɔ mentanŋɔŋk a nomɛɛɗin pɛrka sigi.

¹⁹Laki ŋaadiyɛ a kalbi sinɔ mentanŋɔŋk. Sɔɔkɛrkan joop a omoŋ omoŋ kalbiyɛ gɛŋk nɛkan badɛr ŋaadiyɛɛkɛ a ito emɗ sinɔ badɛ goroo sinɔɔnɛ obiiŋɔŋk.

²⁰Atu Hemenewoos a Iskindir sɛɛge kɔɔr. Gaɓaakan sɛɛg setana kɛnɔ in nyɛyɛr nyɔɔna tiriya Waakoyotoŋk.