Read majang Omoŋ Timotiyoosuk 3 Bible Online

Omoŋ Timotiyoosuk 3 - majang bible

Omoŋ Timotiyoosuk 3

¹Eekeer Pɛɛni sinɛ tonu kɛ, "Ɔkɔn lakɛ iɗit sinɔ ɗɛyɛ a sɛɛn gutarin gode Sambatɛyoŋkuŋ, ɗɛygeeɗ ijaag sinɔ mentanŋɔŋk.

²Agut sini iɗit sinɔ gutarin gode Sambatɛyoŋk, ɗɛyɛ a iɗit sinɔ kɛɛ laaganyɛɛk, ma lak jarti a omoŋ, ɛ ɓali ɛɛk nɛɛk, ɛ beeɗ a ɗeger ɛɛk, ɛ eemɛyar sɛɛn joop, ɛ boŋu konan, ɛ lak oolan rɔɔriyɔɔnoŋk,

³ɛ ki tɔpɔy, ɛ ki ɗɛyɛ palamɛ, ɛ ɓɛɛlɛ kɛ lɔt, ɛ ki ɗaakit, ɛ ki poriiɗ worik,

⁴ɛ lowu joop wɛy nɛɛkik kɛ ɗɔmk, ɛ eemɛyɛɛ a tiiɗigeeɗ tɔɔmɔk gɛɛnɛ eemɛyɔɔn olaatɛ baŋɛ.

⁵Ɔkɔn iɗit ki oolɛ a lowu joop wɛy nɛɛkkiŋ, nɛkɔɔ oolɛ a lowu gode Sambatɛyoŋk Waakoyotoŋk ɛk?

⁶ɛ kat sɛɛn tɔɔn dooyaan ɛ kat ɓɔŋgɔɔrɛ ɛɛk nɛɛk kɛnɔ mokoy pɛrɛdɛɛɗɛ oko sinɛɓa pɛrɛdɛɛɗɛ diyabiloose sinaanɛɓa ɓɔŋŋɔɔrɛ ɛɛk nɛɛkik.

⁷In lak tiriya sigɔ mentaanaŋɔŋk joope sigɔɔgɛ kir ŋaadiɗiitik kɛnɔ mokoy ɗiiriri keenya a goomoya setanik.

⁸Maɓɔrɛ ɗɛyɛ diyakonaataka a sɛɛg joop sigɔ eemɛyɛɛŋɔŋk a tonur eekeer, ɛ kat uter ogool a ɓɔɔkaaŋ, ɛ kir golɛ woriya,

⁹ɛ koorɛr Pɛɛni sinɔ Ɓɛlkɛɛstank dugeeɗ kalbii sinɔɔnɛ mentanŋɔŋk.

¹⁰In tɛɛnan paarɛɛ sɛɛg tuki nɛɛkɛ nɛ ɔkɔn dɛnɛɛ a kɛɛ sɛɛg laaganyɛɛŋ, nɛ ɓaane in ijaagɗi diyakonikent.

¹¹Maɓɔrɛ jartiyatɔk gɛŋk ɗɛyɛ sɛɛga a eemɛyɛɛ sɛɛgiŋ, ɛ kir laaganyɛ joop, ɛ ikomur ɛkan gɛŋk, ɛ sɛɛg eekerkaanak olaatɛ baŋɛ.

¹²Maɓɔrɛ ɗɛyɛ diyakonaataka a latu jartiyatɔk a omoŋ omoŋ, ɛ ɓɔrɛ ɗɛyɛ sɛɛga a lowur tɔɔmɔk gɛŋk a wɛykɔk gɛŋk a ɓɛɛlɛ kɛ ɗɔm.

¹³Joop sigɔ ijaagir any sinɔ mentanŋɔŋk ijaag diyakonikentik nɛ laŋir eemɛyɔn sinɔ obiiŋɔŋk ɛɛka nɛŋk, ɛɓɔrɛ latu diirikeen ŋaadiyɛɛkɛ sigaagɛ atu Yeese Kereseek.

¹⁴Taapɛɛrana ola sigi sisɔ, kɛygun ŋaada kɛ mɛlɛɛrakɔɔ a gorgorŋ nɔnu kɛɛɗa dɛnaaŋ.

¹⁵Ɔkɔn kaɗɛɛŋ gaalaakakɔɔŋ nɛna taapiɗiira kɛnɔ ɗegerin kɛ ɗɛyɛ a beeɗir joop wɛy Waakoyotoŋk ɛk. Ege gode sini Sambatɛyoŋk Waakoyo sinɛ bɔdɛɛk sinɛ sɛɛn tuusi ɛ tuktan ɛ nyon tɛkɛnyoŋk sinɛ eekerkank.

¹⁶Ege sini obiiŋɔŋk dugtan ŋaadiyɛ gaŋkik sinɛ kiigiɗɛ koɓiiɗak a pɛɛyk. Yaaŋɛɓa Sɛŋk ɛɛk a sɛɛn iɗit, ɗegerɛɛɓa eekeer gɛɛŋk kɛ mentan taamɛkɛ Waakoyotoŋk Wɛɛŋakɛ, ɛɓa yaaŋɛ ɛɛk wosɛytaanaka Waakoyotoŋk, ɛɓa waasɛɛ joopa baŋɛ, ɛɓa ŋaadiɗiiɗ joop ɗookoŋk baŋɛ, ɛɓa ŋaar eemɛyɔɔn dariya.