Read majang Omoŋ Timotiyoosuk 5 Bible Online

Omoŋ Timotiyoosuk 5 - majang bible

Omoŋ Timotiyoosuk 5

¹Rɔɔriy gutarin a ito ɓaaɓa, ma kat goopun, ɛ arin atiinyi a masookoyak.

²Mermeni jartiyatɔk sigɔ bɔɔlɔŋeerk a ito ŋaaŋakak, ɛɓɔrɛ mermeni peetak ɓayaay sinɔɔnɛ mentanŋɔŋk a ito masookoyak.

³Eemɛy jartiyatɔk sigɔɓa rɛrar babuy gɛŋk eekeerɛk.

⁴Jarti sinɔɓa rɛr baabuy nɛɛkɛŋɔŋk ɔkɔn lak tɔɔmɔk maŋk kaakɛɛŋ, nɛ tɔɔmɔk sigɛ in kɔnyɛr ɛpɛnaakak a ɛmɛsaakak oko sinɛɓa sɛɛg kɔnyɛrɗik oko sinik in barɛr ijaag any sinɔ mentanŋɔŋk a kɔnyɛr ɛmɛsaakak a ɛpɛnaak. Ege sini any sinɔ yaa Waakoyotaŋɔŋk.

⁵Jarti sinɔɓa rɛr baabuy nɛɛkɛ eekeerɛ ɛ beeɗ mowank, riiɓe ŋaadiyɛ sigɛ kookoriik Waakoyote, nɛ ɗanɗama a kalɛyi tɔkɔny Waakoyotoŋk kaay a waawuy nɛ beeɗ a ɓaŋkawuŋ.

⁶Mayakana jarti sinɔɓa rɛr baabuy nɛɛkɛŋɔŋk ɔkɔn beeɗ yaakaata ɗoo sinik dakɛɛɗaŋ, nɛɓa rɛr wɛɛŋakɛɛŋ.

⁷Rɔɔriy sɛɛg a in ɓɔrɛ beeɗir a kɛɛ any sinɔ laaganyɗɛɛ sɛɛgik.

⁸Iɗit sinɔ ki kɔnyɛɛɗ tekaaneer gɛɛŋk kɛ ɗɔmk a joop wɛy nɛɛkik kaadɛɓa ŋaadiyɛ gɛɛŋkiŋ, ŋɛɛwɛn iɗit sini a kaalɛ iɗit sinɔɓa ki dooyank.

⁹Kat taapun wargatɛya jartiyatɔk sigɔɓa rɛrar babuy gɛŋkŋɔŋk, jarti sinɔɓa rɛr baabuy nɛɛkɛŋɔŋk sinɔ ege emeyi gɛɛnɛ pɔlpɔlɛ joop jiitik ɗɛɛga, ɛ inɓa waawugeeɗ baabuy sinɔ omoŋɔŋk,

¹⁰ɛ in ɗegerɛɛ ant sinɔɔnɛ lowiiɗ tɔɔmɔk gɛɛŋk kɛ ɗɔmk, ɛ boŋiiɗ konank, ɛ aadiiɗ derak joop Waakoyotoŋk, ɛ kɔnyɛɛɗ joop sigɛ rakatkaanakik, a sinɔ ijaagiiɗ any sinɔ mentanŋɔŋk baŋɛk.

¹¹Yakana kat taapun tagooneer sigɔɓa rɛrar babuy gɛŋkŋɔŋk wargatɛya jartiyatɔ sigɔ bɔɔlɔŋeerk sigɔɓa rɛrar babuy gɛŋkŋɔŋk, agut sinɔ sɛɛg lɔsɛɛɗ ɗɛyan taaroŋk nɛ saakɔɔ bitakɗiiɗ mɛyin sinɛ latu Kereseyaaak, nɛ ɗɛyɛr a waawur kɛkark.

¹²Nɛkoy pɛrɛdɛɛ sɛɛge agut sinɔ aalɛrɗi pɛɛni sinɛɓa guugunyargeeɗ tukik.

¹³Ɛ barɛr wooran ijaagoŋk a dɔɔkɛr wɛykɔka joopoŋk, moko wooran ijaagoŋk dakɛɗa ma laaganyar joop. A dakɛr a sɛɛg joop sigɔ guugunyar anta etoŋk ɛ waasɛr any sinɔ ki sɛɛga ɗɛyɛk.

¹⁴Agut sini rɔɔriy tagooneer sigɔɓa rɛrar babuy gɛŋkŋɔŋk kɛnɔ waawur kɛkar, kɛnɔ ɓartɛr tɔɔmɔk, kɛnɔ lowur wɛykɔk gɛŋk kɛ ɗɔm. Sanɛkɔɔ gumaaken naŋk any sinɔ ŋɛɛwɛnŋɔŋk sinɔ tonu sɛɛgek.

¹⁵Agut sinɔkan jeemɛ tagooneer sigɔɓa rɛrar babuy gɛŋkŋɔŋk a omoŋ omoŋ ŋaararkiɗ gopɛ ŋaadiyɛɛkoŋk nɛkan nomɛrɗi setan.

¹⁶Jarti sinɔ ŋaadtank ɔkɔn lak tagooneer sigɔɓa rɛrar babuy gɛŋkŋɔŋk nyaki nɛɛkɛŋ, in sɛɛk kɔnyɛɛɗ kɛnɔ mokɔɔ dakɛr a diil godeya Sambatɛyoŋk. Oolɛkɔɔ gode Sambatɛyoŋk tɔkɔny nɛŋk ant sinaanɛ ɗɛyɛ sɛɛgak oko sinik.

¹⁷Ɗɛyɛ eemɛyɔn sinɔ suɗaktank gutarɛyɛɛka sigɔɔga lowur gode Sambatɛyoŋk kɛ ɗɔmk a kaalɛ sigɛ waasɛr ɛ rɔɔriya Pɛɛni sinɔɔnɛ Ɓɛlkɛɛstank.

¹⁸Agut sinɔɓa taapɛɛɗɛɛ Wargatɛɛ Waakoyotoŋk kɛ, "Kat tusun ato jeguy sinɔ porootɛ ɗamak," maɓɔrɛ "Ɗɛyɛ ijaagenta koyiŋ."

¹⁹Nɛ kat boŋun daari sinɛ widikɛɛ gutarinte gode Sambatɛyoŋk, ɔkɔn kir waasɛɛt joop sigɔ pɛɛyk maŋk jiitikiŋ.

²⁰Koykoyu joop sigɛ ijaagir tikiyɛɛk joope taamɛkɛ kɛnɔ ɓuri joop ɔgɔɔk.

²¹Rɔɔrɔkaana kɛ ɗɔm taamɛkɛ Waakoyotoŋk a Yeese Kereseek, maɓɔrɛ wosɛytaanakɛ Waakoyotoŋk sigaagɛɓa daamɛɛk kɛnɔ koorun sekiyɛ sigi gaaŋk baŋɛ a moko arin iɗit om a kaalɛ mɛɛno a kat pakaatin joop.

²²Kat daamun joop ijaaga Waakoyotoŋk kɛnɔ sɛɛge riiɓin ari nook raŋk a gorgorŋ, kat lotɛɛr ɛɛk a joop ɔgɔ tikiyɛɛkɛ, kooru ɛɛk nook mentankaat ɛɛkoŋk.

²³Seedi son kat utun maawu dakɛɛɗa, ma utu ogool wɛyinik a tekerŋ agut gori nook amɗoŋk ɛ agut gori nook sinɔɔna mɛmɛlki otoopuk.

²⁴Ɗegerɛɛ tikiyɛ joop ɔgɔɔk a omoŋ omoŋ, nɛkoy yaaŋɛrkun pirdi nɛɛk ɔɗɔɔkɛ, makoy ɗegerɛɛ tikiyɛ joop ɔgɔɔk ma tɛɛnan gaalatarŋ.

²⁵Maɓɔrɛ yaaŋɛ ɛɛk ijaag sinɔ mentanŋɔŋk, kikoy aasi dakɛ any sinɛ kɛɛ taantaak a dugiɗiiŋ.