Read majang Omoŋ Timotiyoosuk 6 Bible Online

Omoŋ Timotiyoosuk 6 - majang bible

Omoŋ Timotiyoosuk 6

¹In koɓur ijaager sigɛ atu laaŋoyk baŋɛ soon kɛ ɗɛyɛ sɛɛga a eemɛyar suumiyɛ gɛŋkŋɔŋk kɛnɔ kat nyɔɔnɛɛ tiriya Waakoyotoŋk a rɔɔriyɔn nɛɛk.

²Kat daraayɛr ijaager sigɛ latu suumiyɛ sigɔ ŋaadtaanakik agut sinɔ sɛɛg manyaakak sɛɛgak Suumii Yeeseek, in ijaagɗi sɛɛga a kaalɛ sinɛkan ɔɗɔɔkɛk agut sinɔ laŋiiɗ tɔkɔny ijaag nɛŋkik suumiyɛ gɛŋk sigɔ ŋaadtaanakik a manyaakak sɛɛga sigɛ porɛɛkik.

³Nɛ rɔɔriy sɛɛg ɛ waasin sɛɛga ola sigi. Ɔkɔn lakɛ iɗit sinɔ rɔɔriyaaɗ rɔɔriyɔn om sinɔ kir mɛyit a Pɛɛni Suumi naŋk Yeese Kereseekiŋ, ɛ ari a kiiɗɛ eemɛyɔɔn Waakoyokuŋ,

⁴ege sini iɗit sinɔ ɓɔŋgɔɔrɛ ɛɛk rakayaak, kɛɛ any sinɔ ɗegerk ara. Lak sɛŋk ɗɛyan sinɔ ŋɛɛwɛnŋɔŋk a palamɛ a ɗaakan pɛɛniyɛɛkoŋk agut sini laŋɛ sineene nyeken a man a nyɔɔna a koɓi sinɔ ŋɛɛwɛnŋɔŋk.

⁵Joop sigi agut sinɔɓa sɔɔkiɗiiɗ kalbiyɛ gɛŋk nɛɓa badɛr eekeerɛk nɛ lakɛ sɛɛge kɔɔr palamɛ a ɗaakan sinɔkoy ki pediik. Koɓur kɛ ege ŋaadit Waakoyotoŋk any sinɔ laŋiiɗɛ worik.

⁶Iɗit sinɔ lak koɓi sinɔ kɛ gayɛta sinɛ lakakiŋ, laŋi wori sinɔ obiiŋɔŋk saa ŋaadiiɗ Waakoyok.

⁷Kɛɛ any sinɔɓa ɗɔkii ɗooka sineena raŋanaak, maɓɔrɛ kɛɛ any sinɔkoy diilii ɗook sineene raŋk ara.

⁸Ɔkɔn laŋii any sinɔ ɗamiiŋɔŋk a sinɔ kadiiŋɔŋkuŋ, gayɛ tinaaŋ.

⁹Mayakana joop sigɛ ɗɛyɛr a sɛɛg worikaanakik ɗiirarkoy paariyɛɛkɛ, nɛkoy lowɛɛ sɛɛg ɗɛyaan sinɔɔnɛ ki kɔnyɗiit ɛ sɔɔkiɗiŋɔŋk nɛ guugunyar ɗiirina a badɛɛɗa.

¹⁰Agut sinɔ ege pori woriyoŋk tiltil any sinɔ ŋɛɛwɛnŋɔŋk. Ɗɛyɛrɓa joop a omoŋ omoŋ a laŋir wori nɛɓa wider ɛɛk ŋaadiyɛɛkɛ, ŋɔɗutarɓa ɛkan gɛŋk rakatɛya sanoŋk.

¹¹Mayakana iin iɗit Waakoyotoŋk, togon olaatɛ sigeege ŋɛɛwɛɛŋɔŋk baŋɛ, nomu mentankaat taamɛkɛ Waakoyotoŋk, a tuɓur Waakoyotoŋk a ŋaadiyɛɛkɛ a mɛyin a ɓaŋkaawurɔn oolaanik, a ɓɛlɛɛt kɛ lɔtuk.

¹²Tima kaarin ŋaadiyɛɛkoŋk sinɔ mentanŋɔŋk, gaamu bɔdɛ sinɛkoy nɔkoy nɔkoyk sinɛɓani riygiɗɛɛk nɔɓa ŋaadin kɛnɔ waasin joope sigɔɔgɛ ɓɔɔkaaŋɔŋk waasɛr eekeerik.

¹³Sekaana taamɛkɛ Waakoyo sinɛ gaɓɛ bɔdɛ olaata baŋɛk a Yeese Keresee sinaanɛɓa waasɛ eekeer taamɛkɛ Pilatoosuk.

¹⁴Kooru sekiyɛ sigi kɛ ɗɔm a kɛɛ any sinɔne dakɛk ɛ kɛɛ any sinɔnu laaganygiɗɛɛk mɛlɛɛɗa ɓɛɛnyɔwa saakoy mɛlkiɗ Suumi naŋk Yeese Kereseek.

¹⁵Mɛlkikoy Suumi Yeese Kerese saakoy gayɛɛɗ ɔɔtɛ sinɛɓa gaamu Waakoyot sinɛ Oolɛ ola Baŋɛk, ɛ Tapaɗ tapaakoŋk, ɛ Suumi suumiyɛɛkoŋkuk.

¹⁶Sɛɛn dakɛɛɗa sinɛkoy ki rerink, beeɗ pɛɗɛrkaat sinɔɔnɛ kɛɛ iɗit sinɔ oolɛ a widergeeɗ ɛɛkik. Kɛɛ iɗit sinɔɓa dɛnɛ Sɛɛnik, ɛ kɛɛ iɗit sinɔ oolɛ a dɛnɛ Sɛɛnik. In dakɛ eemɛyɔɔn a ɓaŋkawuka Sɛɛna nɔkoy nɔkoyk. Ameen.

¹⁷Seki worikaanaka ɗoo sinik kɛnɔ kat ɓɔŋgɔɔrɛr ɛɛk rakaaya, ɛ kat ŋaadir wori nɛŋk sinɔkoy badɛŋɔŋk, ma in ŋaadiɗi a tina yaaŋ Waakoyote sinaanɛ tina gaɓɛ any a ŋaaŋayikŋɔŋk.

¹⁸Seki sɛɛga kɛnɔ arir any sinɔ mentanŋɔŋk, kɛnɔ in sɛɛg worikaanak ijaag any sinɔ mentanŋɔŋk, ɛ sɛɛg ragadtaanak tigiya a wokaana any sinɛ latuk.

¹⁹Oko sinik tolɛrkoy wori sinɔ ɓaŋkawu nyon nɛɛkɛŋɔŋk ɛɛka nɛŋk eme saakoy mɛlkik kɛnɔkoy laŋir bɔdɛ sinɔ eekerkank.

²⁰Iin Timotiyoos, kooru any sinɛɓana gaɓɛɛ a adaratik. Yowɛɛɗiir palamɛɛ ɗookoŋk kanysɛyaak sinɔɔnɛ gayi a ɗegerɔn ma moko ɗegerɔnk.

²¹Joop a omoŋ omoŋ tonurɓa kɛ, lakii ɗegerɔn siniŋ, nɛɓa badɛr ŋaadiyɛɛkɛ. In wookan Waakoyotoŋk a iin agut omoŋ.