Read majang Tiito 3 Bible Online

Tiito 3 - majang bible

Tiito 3

¹Koɓa joopa gɛɛna kɛnɔ tiiɗi ɔɗɔweera a suumiyɛɛka, kɛnɔ ragadir ɛɛk nɔ ijaagir any sinɔ mentanŋɔŋk.

²Tonu sɛɛga kɛnɔ kat tonur any sinɔ ŋɛɛwɛnŋɔŋk ete omalte, nɛ kat ɗaaki a joop ɛ in mentaana a yaaŋɛr mentanka sinɔ ŋaarki ɓayaayk joopa baŋɛ.

³Eteŋkɓa ɓɔrɛ gaagɛɛ jeemɛ, kiiɓa tiiɗit Waakoyota, ɛɓa tin raaramɛɛ, ɛɓa eteŋk laaŋoyeer tikiyɛɛkoŋk, ɛɓa eteŋk ɗɛgɛjaak, ɛɓa eteŋk aabuurekaanak, ɛɓa tin ɓooyɛɛ, ɛɓa ɓooɓooyikii ɛkanɛɛkɛ gaŋk.

⁴Yakana saakan yaaŋɛɛɗ ɛɛk mentanka ɓayaayoŋk a mɛyin Ebɔdtan naŋk, Waakoyotoŋkuk,

⁵moko kan tin ebɔdɛ agut any sinɔ mentanŋɔŋk sinɔkan ijaagii seekik, mayakana ebɔdɛkan tin maariyeet nɛɛkɛk. Sinɛkan tin ebɔdɛɛɗik aadit ɓartiyɛ sigɔ tɔɔmɔkuk, a ari a tɔɔnuk sinɔ laŋɛɛ goy Wɛɛŋa sigɔ Geetitaanakik.

⁶Gupatikikan tina Waakoyot Wɛɛŋa gɛɛŋk a ɓɔɔkaaŋ a ŋaaŋayikiŋ goy Ebɔdtan naŋk Yeese Kereseek.

⁷Nɔkan ariiɗ sinik kɛnɔ mentankii taamɛkɛ Waakoyotoŋk wookaan nɛɛkɛk, kɛnɔkoy moonii wɛɛŋa sigɛkoy nɔkoy nɔkoyk sigɛ kookorii sɛɛg ŋaadiyɛɛkɛk.

⁸Ŋaadɛɛ sɛŋk Pɛɛni nɛɛkiŋ. Ɗɛya kɛnɔ yaaŋin any sini kɔna tonaak a ɓaŋkawuŋ. Joop sigɔ ŋaadiɗi Waakoyoteek kɛnɔ ɓaŋkaawurar ijaaga sinɔɔna mentanŋɔŋk. Ege sini any sinɔ mentan ɛ kɔnyɛ joopuk.

⁹Mayakana widi ɛɛk palamɛɛ sɔkɔnk, a ikomiit komoyɛɛkoŋk, a ɗaakan a kaarin sinɔ ŋaarki agut higi Muuseek agut sinɔ ola sigi kɛɛ sɛɛge tɔkɔny ɛ kɛɛ sɛɛge ɔɔtɛ.

¹⁰Iɗit sinɔ ɗɔku pakakatik, koykoyu agut omoŋ maŋk agut pɛɛy, nɛ ɔkɔn ki weentaaŋ, nɛɓɔ kat lakɛ any sinɔ latukarik.

¹¹Iɗit sinɔ ito sinik ɗegeri kɛ sɔɔkiɗikan, ɛ kan goop ɛɛk nɛɛk ijaag tikiyɛɛkoŋk.

¹²Saakɔɔ wosɛyɛɛrkiɗa Artimoon maŋk Tikikoos son lak iinik, nɛ seŋk ɓaŋkaawur nɔ kusun son lak eetik Nikopiliyoona, agut sinɔ gaamakɔ kɛ kaalakɔɔ baŋgi sini saay.

¹³Mermeni iɗit sinɔ ɗeger higik Jeemas, a Apiloos kɛnɔ kɔnyun sɛɛg ant sinaanɛ ɗɛyɛ sɛɛga ŋawita nɛŋkik baŋɛ.

¹⁴Joop gaŋk in barɛr ijaag any sinɔ mentanŋɔŋkuk kɛnɔ mokɔɔ dakɛr a kɛɛ any sinɔ laŋirk, ɛ kɛnɔkɔɔ oolɛr beeɗit rakatɛyoŋk.

¹⁵Digoyɛɛtarnɔnu joop sigɛ eteŋk a sɛɛgik baŋɛ, tonu tina joopa sigaaga tin porur ŋaadiyɛɛkɛk kɛ digoyɛnɔ sɛɛg. In wookan Waakoyotoŋk a iinak agut omoŋ baŋɛ.