Read majang Ibirawiyaan 10 Bible Online

Ibirawiyaan 10 - majang bible

Ibirawiyaan 10

¹Ege higi Muuseek tagaytan any sinɔ mentanŋɔŋk sinɛkoy mɛlkik ɔɗɔɔkaak, ma moko any sinɔ eekerkank. Nɛ agut sini uduŋeet sinɛ wideerɛɛ emeyikɛ otoop a ki yawuɗiitik ki ariiɗ a daktaanak joop sigɛ wideetar ɛɛk kɛnɔ ugumerk.

²Ɔkɔnɓa higii oolɛ a ari joop a daktaanakiŋ, nɛ gunɓa yogurku joop sinɔ kɛ kɛɛ sɛɛge tikiyɛɛkiŋ nɛ gunɓa nyɛyɛr uduŋeet baŋɛ.

³Mayakana ege sigɛ uduŋeetak sigɔ kokoɓarkiɗ joop tikiyɛ gɛŋk emeyikɛk.

⁴Agut sinɔ ki oolɛ yɛrom jeguyatɔkoŋk a kemtekoŋk a ranyjɛɛr tikiyɛŋ.

⁵Nɛ agut sini saaɓa mɛlkiɗ Kerese ɗooka sineenak, nɛɓa tonu kɛ, "Kin ɗɛyɛ tigi a uduŋeet, mayakanaɓata ragadin buusɛ.

⁶Kini yaaka ɓayaay agut uduŋeet sinɛ moɗɛɛk a uduŋeet sinɛ wideerɛɛ agut tɔŋɔɗ tikiyɛɛkoŋkuk.

⁷Nɛɓa tona saaɓak kɛ, 'Iin Waakoyo, isi eet ɓɛɛlak, kɛnɔ dusana ɗɛyan nook, oko sinɛɓa taapɛɛɗɛɛ Wargatɛɛ Waakoyotoŋk agut eetik.' "

⁸Nɛɓa Kerese tonu tuki kɛ, "Kin ɗɛyɛ tigi a uduŋeet maŋk uduŋeet sinɔ moɗɛɛŋɔŋk a uduŋeet sinɔ wideerɛɛ agut tikiyɛɛk. Kini yaaka ɓayaay agut ola sigi kɛygunɓa aasi sekɛ higi Muuseekiŋ.

⁹Nɛɓa topu kɛ, "Isikɔ mɛlkaak kɛnɔ dusana ɗɛyan nook, nɛ ant sinɔɔnɛ ito sinik ranyjɛɛ uduŋeet sinɛɓa tuktank ma riiɓɛɛ nyon nɛɛkɛk uduŋeet pɛɛyeen nɛɛk.

¹⁰Geetɛɛɓa tin ɗɛyaan Waakoyotoŋk goy Yeese Keresee sinɛkan wideer buusɛ nɛɛk a uduŋeet agut omoŋ a pedtank.

¹¹Ijaagir sɛɛg tapa ŋaadiyɛɛkoŋk baŋɛ ijaag nɛŋk a ɛtɛr ɓɛɛnyɔ baŋɛ a wideetar uduŋeet agut ɓɔɔkaaŋ. Mayakana uduŋeetak sigi kir oolɛ a ranyjɛɛtar tikiyɛŋ.

¹²Yakanaɓa Kerese wideer uduŋeet sinɔ omoŋɔŋk agut tikiyɛ, nɛɓa dokuɗe ɗiɗikakɛ Waakoyotoŋk,

¹³nɛ sisɔ kookor sɛŋk kaarna gɛɛŋk mɛlɛɛɗa nɔkoy atukuɗ derakɛ gɛɛnɛ goyse ɗeekik,

¹⁴agut sinɔ ariɓa joop sigɛ geetɛɛk a kɛɛ any sinɔ bitakɗi sɛɛgek uduŋeet sineene omoŋɔŋk.

¹⁵Nɛ ɓɔrɛ tina waasiɗi Wɛɛŋa sigɔ Geetitaanakik agut any sini, tonur tuki kɛ,

¹⁶"Tonu Suumii kɛ kuumiyɛ sigɛkoy guugunygiɗii a sɛɛgik seedi baŋiyaak sɛɛg sigi, riiɓaakoy higi naak ɓayɛtunɛɛkɛ gɛŋk, ɛkoy taapa kalbiyɛɛkɛ gɛŋk."

¹⁷Ɛ ɓɔrɛ tonu kɛ, "Kiikaakoy sɛɛga koɓiiɗ tikiyɛ a ŋɛɛwɛnka nɛŋk kɛkar seedi son."

¹⁸Nɛ agut sini saakɔɔ ŋɔɗirkiɗɛɛ tikiyɛ joope sigeegek, nɛkɔɔɓɔ kɛɛ seedi son uduŋeet sinɔkoy wideerɛɛ agut tikiyɛɛk.

¹⁹Sisɔ iinak manyaakak eeta, lakii ɓayɛ sinɔ ɓaŋkawuŋɔŋk sinɔ guugunyɗii Nyona sinaana Geetitan Geetitaanakoŋk yɛrom Yeeseek,

²⁰tayɛɓa tina gopan sinɔ tɔɔnuk bɔdɛɛɗoŋk goy buusɛ nɛɛkik kɛnɔ guugunyii biriittant nɛɛkɛ.

²¹Agut sini lakii ɔɗɔwen tapa ŋaadiyɛɛkoŋk sinɔ lak ɔɗɔwikeen joope Waakoyotoŋk raŋk.

²²Koy wideerii ɛɛk Waakoyota ɓayɛ baŋɛ, a ŋaadiyɛɛkɛ sigɔɔgɛ enyaaŋɔŋk, a tina wasanɗiikɛɛ ɓayɛtunɛɛka, ɛ aadii ɛɛk naŋk maawɛ sigɔɔgɛ mentaanaŋɔŋk kɛnɔ arii kalbiyɛ gaŋk a mentaanaŋ olaatɛ sigɔɔgɛ ŋɛɛwɛɛŋɔŋk.

²³Koy gaamii a ɓaŋkawuŋ ŋaadiyɛ gaŋk sigɛ kookoriik sigɛ tonii kɛ lakii ŋaadiyɛ sigiŋɔŋk, agut sinɔ eekerkan Waakoyo sinɛɓa tina gaɓɛ Pɛɛni ŋaadiyɛ sigɛ kookoriik.

²⁴Koy yaayaŋikii ɛkanɛɛkɛ gaŋk kɛ beeɗii ɛk mɛyina a ijaaga any sinɔ mentanŋɔŋk.

²⁵Kat ŋɔɗii tolɛ naŋk oko sinɛ ŋɔɗarɗi joop a omoŋ omoŋɔŋk. Makoy ɓaŋkaawurii ɛkanɛɛkɛ gaŋk a kaalɛŋ saa dɛnɛrɗɔ mɛlɛ nɛɛk a wɔɔŋkuŋɔŋk.

²⁶Ɔkɔnkɔɔ ijaagii tikiyɛ ma ɗegeriiŋ makan laŋii eekeer ɗegerɔɔnoŋk baŋiyaaŋ, nɛkɔɔɓɔ kɛɛ seedi soon uduŋeet agut tikiyɛ,

²⁷yakana dakɛ koorɛɛt goopan sinɛ ɓurɛɛk a maɗ sinɛ ɓurɛɛk ɓaŋkawuŋɔŋk sinɛkoy ɗam gumaakeer Waakoyotoŋk.

²⁸Iɗit sinɔɓa daraayɛ higi Muuseek ɔkɔn waasɛrgeeɗ joop sigɔ pɛɛyk maŋk jiitikiŋ nɛ ɓokotɛɛ a kiiɗɛ maariyeet.

²⁹Anɛ gayi kɔna a koy boŋu goopan sinɔ ɛtɛ ɛkik iɗit sinɔ daraayɛ Tɔɔn Waakoyotoŋk, ɛ ikomu kuumiyɛ yɛrom sinɛɓa sɛɛn geetiɗɛɛk a any sinɔ kiiɗɛ ɔɔtɛk, ɛ nyɔɔn wookan Wɛɛŋa sigɔ Geetitaanakik?

³⁰Ɗegerii iɗit sinɛɓa tonu kɛ, "Ege tiije naak, jumura tiijeet saak," ɛ tonu kɛ, "Pɛrɛdɛkoy Suumii joope gɛɛnɛ raŋk."

³¹Ege ɗiirin ariit Waakoyo sinɛ bɔdɛɛk any sinɔ ɓurɛɛŋɔŋk.

³²In koɓukɛɛ eme sinɛɓa jeemɛk sinɛɓa arirɗɔ ɗɔŋkɔɔlɛ rakatɛ takik a ɛtɛrɗɔ a ɓaŋkawuŋɔŋk saaɓa kɔna tipeyɗiikiɗ pɛɗɛrkaat baŋiyaak.

³³Ɓɛɛnyɔwɛɛkɛ a omoŋ omoŋ dɛnɛɛɓa kɔnu joope taamɛkɛ nyɔɔnaka a laaŋoya, maɓa ɓɔrɛ ɓɛɛnyɔwɛɛkɛ ɔgɔɔkɛ laŋirkɔ rakatɛ a joop sigɛkan laŋirki rakatɛ sinɔ ito sinik agut omoŋ.

³⁴Iinak sanɗikɔna joop sigɛɓa korkoɗɛɛk, saaɓa weelɛɗɛɛ wori noŋkuk nɛɓa boŋiir yaakaat, agut sinɔɓa ɗegerarɗɔ kɛ latukari wori sinɔ dɔɔsuk ɛkoy ɓɛɛlɛ nɔkoy nɔkoyk.

³⁵Agut sini kat ŋɔɗari ŋaadiyɛ goŋk sigɛ latu gati sinɔ obiiŋɔŋkuk.

³⁶Ɗɛyɛ kɔna a ɛtɛɛr a ɓaŋkawuŋ a dusanɛɛr ɗɛyan Waakoyotoŋk kɛnɔkoy boŋiir kuumiyɛ gɛɛŋk.

³⁷Agut sinɔ taapɛɛɓa Wargatɛɛ Waakoyotoŋk kɛ, "Ɔɔtɛ sinɔɔnɛ dinyŋɔŋk, iɗit sinɛkɔɔ mɛlkik mɛlkikɔɔŋ, kiirkɔɔ gaalat,

³⁸ɛɓɔrɛ iɗit sinɔ mentan taamɛkɛ Waakoyotoŋk beeɗ ŋaadiyɛɛkɛ, ma ɔkɔn weeri baŋiyaaŋ, nɛ ki yaaka ɓayɛ naakɛ agut sɛɛn."

³⁹Moko seek eteŋk joop sigɛ weeri baŋiya nɔkoy badɛrk, mayakana eteŋk joop sigɛ ŋaadiɗi nɔkoy bɔdɛrk.