Read majang Ibirawiyaan 12 Bible Online

Ibirawiyaan 12 - majang bible

Ibirawiyaan 12

¹Agut sini lakii joop sigɔ tina waasiɗiiŋɔŋk tookɛɛta a ito tiimanik. Koy orii ola sigɛ tina dakɛr a diilk a tikiyɛ sigɛ tina ɗaabiɗikik balatuŋɔŋk, ɛkoy reerii arampɛ reeranoŋk sinɛ tine ar taamɛkɛk oolaan a ɓaŋkaawurɔn.

²Koy mermenii Yeesee sinɛ tuktan ɛ pedtan ŋaadiyɛ gaŋkik, sinɛɓa ɓaŋkaawur oolaan laalawutant raŋk agut yaaka sinɛ arkun sɛɛne ɔɗɔɔkɛk, ɛɓa ki ikomiit daraayɛ rer laalawutant nɛɛkɛ raŋk, nɛɓa dokuɗe barsum Waakoyotoŋk goysa ɗiɗikik.

³In koɓɛɛ sinɛɓa ɓaŋkaawurɗu oolaanik ɓooyaan sinaanɛɓa laŋki tikitaanakɛɛk, kɛnɔ kɔne kat nyɛɛɗorku nɔ jibaatɛriɗ.

⁴Kɛɛ inɓa kɔnu ɓooyɛɛ a kɔne ɓuurkɛɛ yɛrom saaɓa arirɗɔ ɗɔŋkɔɔlɛ a tikiyɛɛk.

⁵Monɗiikariɓa Pɛɛnii gaananitoŋk Waakoyotoŋk sinaanɛɓa kɔna tonuk oko sinɛ iinak tɔɔmɔk gɛɛŋkik? "Iin tɔɔn naak, kat arin goopan Suumiyoŋk a balaaŋ, kat jibaatin saani koykoyɛɛɗik,

⁶agut sinɔ koykoyɛ Suumii iɗit sinɛ porukuŋ, goop ɓɔrɛ oko tɔɔn sinɛ boŋkuŋ."

⁷In ɓaŋkaawurɛɛ oolaan koykoyɛɛta, goop kɔnu Waakoyot oko tɔɔmɔk gɛɛŋk. Tɔɔn kɛ wooɗ sinɛ ki goopɛ ɛpɛnaak?

⁸Ɔkɔn moko iinak kaastaanak goopan sinɛ goopɗɛɛ tɔɔmɔkukuŋ, nɛ iinak lukak, ma moko iinak tɔɔmɔk.

⁹Lakiiɓa ɛpɛnaakak eteŋka sigɔɓa tin ɓartɛrŋɔŋk sigɔɓa tin gooparŋɔŋk, nɛɓa sɛɛg eemɛyiŋ. Anɛ kii ɓaliiɗ ɛɛk a kaalɛŋ ɛk Ɛpɛna wɛɛŋaka kɛnɔ beeɗii wɛɛŋakɛ?

¹⁰Koykoyɛrɓa tin ɛpɛnaakak eteŋka a bala ɔɔtɛ nɛɛkɛŋ oko sinɛɓa dɛnɛrɗi a mentanŋɔŋk. Yakana koykoyɛ tin Waakoyot agut tɔkɔny naŋk kɛnɔkoy dakii a eteŋk kaastanak geetiyɛ gɛɛŋkik.

¹¹Ki yaaka goopan ɔɔtɛya sinɔɔna balaŋɔŋk, ma yogukɛɛŋ. Mayakana saadi baŋiya gaɓɛ taamɛ mentankaatoŋk a bɔdɛɛɗoŋk joopa sigaagaɓa barɛrk tiyan goopanoŋkuk.

¹²Agut sini in kemɛɛ arin goŋk sigɛ waarɛrk, ɛ arɛɛ korontun sigɛ bɔɔlaak aɓaŋkaawurariŋ.

¹³In kemɛɛ deraka goŋk gopan a ɓɛɛlɛ kɛ sɛm kɛnɔ kat dedeeri iɗit sinɛ kamk, ma kɛnɔ in bɔdɛɗ.

¹⁴In arɛɛ any sinɛ kɔna gayɛ a beeɗirɗɔ a joop baŋɛ bɔdɛɛɗik, in ɓaŋkaawurɛɛ kɛnɔ iinak geetitaanak agut sinɔ kɛɛ oolɛ a dɛnɛɛ Suumi ma moko geeɗɛɛ geetitan,

¹⁵In koorɛɛ ɛɛk kɛnɔ kat lakɛ iɗit sinɔ kɔne bitakɗiɗ wookan Waakoyotoŋkuk, ɛ ɓɔrɛ kat ɗiigarki wɛykon sinɔ ɓaayŋɔŋk sinɔ ɓɔlɔɔrɛ nɛ boŋku rakatɛ joopa sigɔɔga ɓɔɔkaaŋɔŋk a ari sɛɛg a somkaanak.

¹⁶In koorɛɛ ɛɛk kɛnɔ kat lakɛ iɗit sinɔ ruunykank maŋk ki eemɛyɔɔn Waakoyo oko Eesawu sinɛɓa ɓalɗi tekaayikeent nɛɛkɛ agut ɗama sinɔ gut omoŋ dakɛɗaak.

¹⁷Ɗegerari kɛ saaɓa ɗɛykɛɛɗ boŋiɗa geet nɛɛkik baŋiya, nɛɓa ɓaarɗɛɛ sɛɛniŋ. Kɛygunɓa ɗɛykɛɛ geet sinɛ aɓaŋkawuŋ akuɗugeeɗiŋ nɛɓa ki laŋiiɗ. Kiɓa laŋiiɗ milki sinɔ weeriikiɗ tikiyɛɛkɛ Waakoyotaak.

¹⁸Kiirɓa mɛlɛ kurkuma sinaana Siinaak kumɛɛ ariitik maŋk ɗaawu a ito maɗik, a nyuugura sinaana, a duuŋaana sinaana, a lumɛya sinaana, a koŋgoya luuriyoŋk, a koŋgoya sinaana tonɗiŋɔŋk.

¹⁹Saaɓa tiyɛrɗi joop koŋgoyk nɛɓa kalɛyɗi kɛnɔ kat aasi sɛɛga tonɛɛ pɛɛni om,

²⁰agut sinɔ kirɓa oolɛ a ɓatakir sekiyɛ sigɛɓa tonɛɛ kɛ, "Ɔkɔn aasi ɓeesɛ keegunt kurkum nɛɛkiŋ, nɛ in baabaalɛ giɗeekɛ kɛnɔ rɛr."

²¹Agut sinɔɓa ɓureeɗɛɛ any sinɛɓa dɛnɛɛ saadik jɛtik, nɛɓa aasi tonu Muuse kɛ, "Ɓuriika a piiɗaaŋ."

²²Yakana mɛlɛɛrkɔ kurkuma Siyoonuk a katamɛya Waakoyo sinɛ bɔdɛɛk, Yorsaleema dariyoŋk, son atukuɗ wosɛytaana Waakoyotoŋk sigɛ ikomɛɛ kumɛɛkɛk,

²³son tolɛɛɗa yaakaatoŋk tɔɔmɔk sigɛ tekaayanɛ sigɛɓa taapɛɛ tiriya gɛŋk darik, son lak Waakoyo sinɛ pɛrɛdɛ joope baŋɛk, son lak wɛɛŋa joop sigɛ mentaana taamɛkɛ Waakoyotoŋk sigɛɓa ari sɛɛg a kɛɛ any sinɔ bitakɗi sɛɛgek,

²⁴a son lak Yeesee sinɛ ɓɔɔrɔken kuumeeta sinɔɔna tɔɔnuk, a yɛroma sinaanaɓa wasanɛɛk sinɔɔna kaalɛ Pɛɛni yɛrom sinɛɓa Aabeelik.

²⁵In koorɛɛ ɛɛk kɛnɔ kat kiir tiiɗit sɛɛna saa kɔna tonɗiik. Joop sigɛɓa kir tiiɗit sɛɛnak sinaanaɓa gaki sɛɛga wosɛ ɗookak nɛɓa kir pordan. Anɛkoy seek pordii ɛk ɔkɔn weerikii baŋiyaaŋ sɛɛne sinaanɛ tina tonɗiik darikiŋ.

²⁶Yikeɓa ɔɔtɛ saaɓak koŋgoy nɛɛkɛ ɗoo, mayakanakɔ sisɔ kuumɗi sɛɛga kɛ, "Mokokoy yika kɛkar ɗoo dakɛɗa, makoy yika dariŋ agut omoŋ."

²⁷Pɛɛni sinɛ tonu kɛ "Kɛkark" yaaŋɛ sinɔ kɛ ɓeesiɗikoy ɛkoy ɔɔyɛɛ ola sigɛɓa riiɓɛɛ sɛɛgkiŋ, makoy sɛɛk dakɛr ola sigɛ kir ɓeesiɗiitkiŋ.

²⁸Agut sini koy pɔɔsii Waakoyo agut sinɔkoy boŋiɗii burɛ sinɔkoy ki ɓeesiɗiitik, ɛkoy ugumguɗii gopɛ sinɔɔnɛ yaageeɗŋɔŋk, a gagiɗii eemɛyɔn sinɔ obiiŋɔŋk, a tuɓur.

²⁹Ege Waakoyo naŋk maɗ sinɔ ɗamiŋɔŋk.