Read majang Ibirawiyaan 13 Bible Online

Ibirawiyaan 13 - majang bible

Ibirawiyaan 13

¹In poporiikɛɛ ɛkanɛɛkɛ goŋk mɛyin masiikikeenoŋk.

²Kat monɗiikar boŋiɗ konanoŋk, agut sinɔ boŋurɓa joop a omoŋ omoŋ konan, nɛɓa wɔɔrɛr wosɛytaanak Waakoyotoŋk a kir ɗegerɔɔn.

³In koɓukɛɛ korkortaanak nɔ beeɗiir a sɛɛg agut omoŋ a ito iinak korkortaanak, ɛ ɓɔrɛ in koɓukɛɛ joop sigɛ rakatɛr ariit etoŋkuk a ito rakatɛɛr a sɛɛg agut omoŋ.

⁴In eemɛyɛɛ waawan gɔɔ baŋɛ, in jartiyatɔk a babuyk gɛŋk ŋaaŋadar ɛkan kɛnɔ kat jɔɔlɛyɗi waawan nɛŋk, agut sinɔ goopkoy Waakoyot joop sigɛ ibiɗiik a sigɛ ruunykaanakkiŋ.

⁵In koorɛɛ ɛɛk poriiɗ woriyoŋk, in beeɗɛɛ a kɔnu gayɛ sinɛ latukarik, agut sinɔɓa toniiɗ Waakoyot kɛ, "Kaan toŋoɗ, kaan oriiɗ a daktan."

⁶Nɛ agut sini tonii ɓayɛ baŋɛ kɛ, "Ege Suumii tɔkɔnytan naak, kaa ɓuriit, oolɛ iɗit ati ari ɛk?"

⁷In koɓukɛɛ ɔɗɔweer goŋk sigɛɓa kɔna tonur Pɛɛni Waakoyotoŋkuk, in mermenɛɛ taamɛ ɓɛɛl nɛŋkik, in sɛɛg gaayɛɛ ŋaadiyɛɛkɛ gɛŋk.

⁸Ege Yeese Kerese sɛɛn sinɛkɔ goorɛk kɛygunkɔ alɛ, kɛygun ɓenyse, kɛygunkoy nɔkoy nɔkoyk.

⁹Kat kɔnu weerɛɛ rɔɔriyɔɔnakɛ sigɔɔgɛ pakakataaŋɔŋk sigɔɔgɛɓa kɛɛ barɛɛɗik. Ɛtɛr ɓayɛtun goŋk wookaan, ma moko kooriyɛɛkɛ dambi ɗamatoŋkuk. Kɛɛɓa any sinɔ kɔnyku sini joopa sigaagaɓa koorɛr dambi sinik.

¹⁰Lakii seek nyon uduŋeetoŋk sinɔ ɗamiɗiŋɔŋkuŋ sinɔ kir oolɛ a ɗamiɗ tapa ŋaadiyɛɛkoŋk sigɛ ijaagɗi duukaanoy nɛɛkɛkiŋ.

¹¹Ɗɔku ɔɗɔwen sinɛ tapa ŋaadiyɛɛkoŋk Nyona sinaana Geetitan Geetitaanakoŋkuk yɛrom keegukoŋk kɛnɔ ranyjɛɛr tikiyɛ, mayakana moɗɛ taar sinɛ keegu gɛɛŋkik soodi beeɗirɗi joopk walas.

¹²Boŋuɓa ɓɔrɛ Yeese rakatɛ tugaat katamɛɛ nɛɛkɛ walas kɛnɔ geeti joop goy yɛrom nɛɛkik.

¹³Nɛ agut sini koyɓɔre ŋaaririi soodi beeɗirɗi joopk walasa nɔ kaasii daraayɛ nɛɛk.

¹⁴Agut sinɔ kɛɛ tine ɗook raŋk katamɛ sinɔ koy beeɗ nɔkoy nɔkoyk, yakana kookorii katamɛ sinɛkoy mɛlki ɔɗɔɔkɛk.

¹⁵Nɛ agut sini koy wideerii pɔɔsiyɛ Waakoyota ɓɛɛnyɔwɛ gɛɛŋk baŋɛ oko sinɛ widerkiɗii uduŋeet Waakoyota goy Yeese Kereseek, tonii pɔɔsiyɛ atutunɛkɛ gaŋk sigɛ waasiɗiɗii agut tiriya gɛɛŋkik.

¹⁶Kat monɗiikɛɛ ijaag any sinɔ mentanŋɔŋk, a sinɔ kaasɛrɗɔ any sinɛ latukarik joopa ɔgɔɔkak. Agut sinɔ yaa Waakoyota uduŋeet sinɔ ito sinik.

¹⁷In tiiɗikɛɛ ɔɗɔweera goŋk ɛ in sɛɛga ɓalɛɛ ɛɛk agut sinɔkoy sɛɛg kɔɔniyɗ Waakoyot agut ijaag nɛŋk nɛ lowur wɛɛŋa goŋk a kir imiiny. Ɔkɔn tiiɗikari sɛɛgaŋ, nɛ ijaagir ijaag nɛŋk yaakaat, ma ɔkɔn nɛ ijaagɗi a sanɗiŋ ɛ kɛɛ any sinɔkɔɔ kɔna kɔnyɛrkik.

¹⁸In ɓɔrɛ tina ɗanɗamaakɛɛ. Eteŋk eekerkaanak sinɔɔna kɛ kɛɛ tine any sinɔ tina tonu kalbi naŋk kɛ ijaagiirkan any sinɔ ŋɛɛwɛnŋɔŋk agut sinɔ ɗɛyii a ijaagii any sinɔ ɓɛɛlɛ kɛ ɗɔmk ɓɛɛnyɔwɛ gɛɛŋk baŋɛ.

¹⁹Kalɛya kɔnu kɛnɔta ɗanɗamaakari kɛnɔ weeriira son lak iinakik a gorgorŋ.

²⁰Boŋkuɓa Waakoyo bɔdɛɛɗoŋk irtan jiŋkuyɛɛkoŋk sinɛ obiik Suumi naŋk Yeesee ret walsa goy yɛrom kuumiyɛ sigɛkoy nɔkoy nɔkoyk.

²¹In kɔna Waakoyo sini kadiɗi ant sinɔɔnɛ mentanŋɔŋk baŋɛ kɛnɔ ijaagiir ɗɛyan nɛɛk, ɛ in tine ijaag any sinɛ yaageeɗik goy Yeeseek Kereseek. In dakɛ eemɛyɔɔn sɛɛna nɔkoy nɔkoyk. Ameen.

²²Iinak manyaakak eeta, oko sinɛ kɔna taapɛrkiɗa wosɛ sinɔ diŋŋɔŋk, nɛ kɔnu kalɛya kɛnɔ boŋiir pɛɛni naak rɔɔriyɔɔnoŋk ɓaŋkaawurɔɔn oolaanik.

²³Ɗɛya kɛnɔ ɗegerari kɛ ŋaarkikan manya eteŋka Timotiyoos godeey korkoɗɔɔnoŋkuŋ, ɔkɔnkɔɔ mɛlki seen kɛ gonyuŋ, nɛkɔɔ kɔrii a sɛɛn agut omoŋ nɛ kɔnu kɛɛ dɛnɛɗ.

²⁴Inta digoyɛɛ ɔɗɔweer goŋk a ŋaadtaanak baŋɛ. Digoyɛrtarnɔ kɔnu ŋaadtaanak sigɛkan kurak ɗook Itaaliyaak.

²⁵In wookan a iinak agut omoŋ baŋɛ. Ameen.