Read majang Ibirawiyaan 4 Bible Online

Ibirawiyaan 4 - majang bible

Ibirawiyaan 4

¹Agut sini a in ɓɛɛlɛr ŋaadiyɛ sigɛ kookoriik sigɛkan tina gaɓɛɛ kɛnɔ guugunyɗii nyona imiinyoŋkuŋ, nɛkoy koorii ɛɛk kɛnɔ mokɔɔ kɔne lakɛ iɗit sinɔ ki laŋiiɗ milki sinɔ guugunyɗu nyona imiinyoŋkuk.

²Waasɛɛkan ɓɔrɛ tina Pɛɛni sinɔ Ɓɛlkɛɛstank oko sinɛɓa waasɛɛɗɛɛ sɛɛgak. Yakanakan sɛɛg ki tokony Pɛɛni sinɛɓa tiyɛrk agut sinɔɓa kiiɗ makɛɗ ɛɛk a ŋaadiyɛ gɛŋkik.

³Ma eteŋk sigɛkan ŋaadiɗikik guugunyii nyona sinaana imiinyoŋk oko sinɛɓa toniiɗ Waakoyot kɛ, "Wogoyaɓa ŋadiiɗ naakɛ kɛ 'Kirkoy guugunyɔn imiinya naakak adaktan."' Kɛygun ɓɛlkɛ oko sinikiŋ ruumɛɛɓa ijaag nɛɛk a tukiɗik saaɓa riiɓeeɗɛɛ ɗook.

⁴Taapɛɛɓa Wargatɛɛ Waakoyotoŋk agut ɗoŋ tula pɛɛyeen nɛɛk kɛ, "Imiinyeɓa Waakoyot ijaag nɛɛkɛ baŋɛ ɗoŋikɛ tula pɛɛyeene nɛɛkɛk."

⁵Ɛɓa taapɛɛ Wargatɛɛ Waakoyotoŋk kɛkar kɛ, "Kiirkoy mɛlɛ nyona naaka imiinyoŋk a daktan."

⁶Lakɛ joop a omoŋ omoŋ sigɔ koy guugunyar nyona imiinyoŋk nɛɛkaakik, kirɓa guugunyɔn joop sigɛɓa sɛɛga waasɛɛ Pɛɛni sinɔ Ɓɛlkɛɛstank jeemɛk agut sinɔɓa kirɗi tiiɗitik.

⁷Agut sini oko sinɛɓa toniiɗɛɛ jeemɛk kɛ, "Saa tiyɛrɗɔ koŋgoy nɛɛkik Ɓenysek nɛ kat ariir ɓayɛtun goŋk a ɓaŋkaawarŋ. Oko sinɛɓa toniiɗɛɛ goy Daawitik emeyikɛ sigɔɔgɛ ɓɔɔkaaŋɔŋk baŋiya, kɛ "Ɓenysek" Nɛ pakati Waakoyot ɓɛɛnyɔ a omoŋ nɛ tonu kɛkar.

⁸Ɔkɔnɓa gaɓɛ sɛɛga Iyaasu imiinyiŋ, gunɓa Waakoyot ki tonɗiit baŋiya agut ɓɛɛnyɔ om.

⁹Agut sini in ŋayɗi joopa Waakoyotoŋk ɓɛɛnyɔ imiinyoŋk.

¹⁰Agut sinɔ joop sigɛkoy guugunyar nyona imiinyoŋk Waakoyotoŋk baŋɛ imiinyer joop baŋɛ oko sinɛɓa imiinyeeɗ Waakoyotuk.

¹¹Koy ɓaŋkaawurii kɛnɔkoy guugunyii nyona sinaana imiinyoŋk kɛnɔ kat lakɛ iɗit sinɔ nomɛ rɔmɛɛɗ joop sigɛɓa kir tiiɗitik.

¹²Agut sinɔ ege Pɛɛni Waakoyotoŋk bɔdɛ ɛ ijaagɗi, ɗɔmu a kaalɛ aarɛ sinɔɓa keewɛ gɔɔ baŋɛk, mumuki mɛlɛɛɗa nɔkɔɔ pakatiiɗ wɛɛŋa a wɛɛŋa etoŋk baŋɛ a meelatɛ a ɓɔlɔɔkak, mermen ɗɛyan ɓayaayoŋk a koɓi nɛɛk.

¹³Kɛɛ riiɓ sinɔ dugiɗi taamɛkɛ Waakoyotoŋkuk, yaaŋtaanak olaat baŋɛ ɛ ɓɛɛlɛr konaan taamɛkɛ gɛɛnɛk, ɗɛyɛkoy ɓɔrɛ tina a tonɗiikii taamɛkɛ gɛɛnɛ agut ɛkan gaŋkiŋ.

¹⁴Koy gaamii ŋaadiyɛ gaŋk a ɓaŋkawuŋ agut sinɔ lakiɗii ɔɗɔwen tapa ŋaadiyɛɛkoŋk sinɔ obiiŋɔŋk sinɛɓa ŋaar dariyaak Yeesee Tɔɔn Waakoyotoŋk.

¹⁵Sanɗikii Yeeseya bɔɔlaakat naŋkiŋ agut sinɔ paarɛɛɓa sɛɛn olaatɛ baŋɛ oko eteŋk, yakanaɓa sɛŋk ki ariiɗ tikiyɛ.

¹⁶Koy wideerii ɛɛk akii ɓuriit barsuma wookan Waakoyotoŋk sinaana tapaaɗanik kɛnɔ boŋii maariyeet ɛ laŋii mɛyin sinɔ obiiŋɔŋk sinɔ tin kɔnyɛ saa tina ɗɛyɛɛɗik.