Read majang Ibirawiyaan 5 Bible Online

Ibirawiyaan 5 - majang bible

Ibirawiyaan 5

¹Daamɛɛ ɔɗɔwen tapa ŋaadiyɛɛkoŋk baŋɛ joope kɔɔr, ɛ daamɛɛ sɛɛn ant Waakoyotoŋk raŋk kɛnɔ dakɛ ɔɔtɛ joopoŋk kɛnɔ wideer uduŋeet a tigi agut tikiyɛ gɛŋk.

²Oolɛ a sanɗi sɛɛna joop sigɛ kir ɗegerɔɔn ɛɛkik a sigɛ babadarkiŋ, agut sinɔ sɛŋk ɗegerɗi bɔɔlaakaŋɔŋk.

³Agut any sini ɗɛygeeɗ a wideer uduŋeet agut tikiyɛ gɛɛŋk a joop ɔgɔɔk.

⁴Kɛɛ iɗit sinɔ boŋu eemɛyɔn sini nɔ dakɛ a ɔɗɔwen tapa ŋaadiyɛɛkoŋk ɛɛka nɛɛkaakik. Ɗɛygeeɗ a riyɛ sɛɛn Waakoyote oko sinɛɓa riyɗɛɛ Aroonuk.

⁵Kiɓa ɓɔrɛ Kerese boŋiɗ eemɛyɔn ɗuma sinɔ sɛɛn ɔɗɔwen tapa ŋaadiyɛɛkoŋkuk, yakanaɓa tongeeɗ Waakoyot kɛ, "Iin Tɔɔn naak, daka kɔna ɓenyse a Ɓaaɓa."

⁶Maɓa ɓɔrɛ tonu nyon omalte kɛ, "Iinkoy ɔɗɔwen tapa ŋaadiyɛɛkoŋk nɔkoy nɔkoy, oko tapaaɗikeen ŋaadiyɛɛkoŋk Mɛlkɛsedekik."

⁷Saaɓa arkiɗ Yeese ɗook sineene raŋkik, nɛɓa ɗanɗama ɛ kalɛyiɗi a ɗooruŋ a pileetakɛ sɛɛna sinaana oolɛ a koy boŋku sɛɛn ret walsak. Nɛɓa tiiɗigeeɗ Waakoyotuŋ agut sinɔɓa tiiɗiɗ ɛ rikite ɛɛkik.

⁸Barɛɓa tiyan rakatɛ sinaanɛɓa laŋkik, kɛygunɓa aasi sɛɛn Tɔɔn Waakoyotoŋkuŋ.

⁹Saaɓa laŋkiɗɛɛ a kɛɛ any sinɔ bitakɗi sɛɛnek, dakɛɓa joopa sigaaga sɛɛna tiiɗik baŋɛ a tuny bɔdɛɛɗoŋk sinɛkoy nɔkoy nɔkoyk.

¹⁰Daamɓa sɛɛn Waakoyot a ɔɗɔwen tapa ŋaadiyɛɛkoŋk oko tapaaɗikeen ŋaadiyɛɛkoŋk Mɛlkɛsedekik.

¹¹Lakɛ any sinɔgun tonii agut any sini a obiiŋɔŋk, yakana ooɗi rɔɔriyɔn noŋkuŋ agut sinɔ kɔna kiiɗi mɛlɛ kɛ gonyuŋɔŋk.

¹²Gunɓɔ sise iinak rɔɔriytaanak, yakana inkɔna ɗɛyɛ iɗit sinɔ kɔnu rɔɔriy tuki rɔɔriyɔɔn Pɛɛni Waakoyotoŋkuk. Ɗɛyɛ kɔna ɛrsɛɛ, ma moko ɗama sinɔ ɓaŋkawuŋɔŋk.

¹³Agut sinɔ ɗamiiɗ ɛrsɛɛ baŋɛ sasalɛk, nɛ in kir babariit a rɔɔriyɔn sinɔ tonɗi agut mentanka taamɛkɛ Waakoyotoŋk.

¹⁴Yakana ɗɛyɛ ɗama sinɔ ɓaŋkawuŋɔŋk joopa sigɔɔga aaɗitaŋɔŋk joop sigɔ bɔɔlɔŋeerk sigaagakan barɛr pakatiit any sinɔ mentanŋɔŋk a sinɔ ŋɛɛwɛnŋɔŋk.