Read majang Ibirawiyaan 8 Bible Online

Ibirawiyaan 8 - majang bible

Ibirawiyaan 8

¹Ege sini toniik Pɛɛni obiika nɛɛk. Lakii ɔɗɔwen tapa ŋaadiyɛɛkoŋk sinɔ ɛtɛ oko sinikik sinɔɓa dokuɗe ɗiɗikakɛ Waakoyo sinɛ Obiik.

²Ijaagɗi sɛŋk a sɛɛn ɔɗɔwen tapa ŋaadiyɛɛkoŋk duukaanoy ɗeegarɔɔnoŋk sinɔɔnɛ Geetitank, sinaanɛɓa rukɛɛ Suumiik, ma mokoɓa etek.

³Daamɛɛ ɔɗɔweer tapa ŋaadiyɛɛkoŋk baŋɛ kɛnɔ wideetar tigi a uduŋeet Waakoyota, nɛ agut sini ɗɛyɛ ɔɗɔwenta naŋk tapaɗa ŋaadiyɛɛkoŋk a lak any sinɔ uduŋeŋɔŋkuŋ.

⁴Ɔkɔnɓa sɛŋk ɓɛɛlɛ ɗook raŋkiŋ, nɛ gunɓa ki dakɛ a tapaɗ ŋaadiyɛɛkoŋk, agut sinɔ lakiɗɛ tapa ŋaadiyɛɛkoŋk sigɔ wideetar tigi oko sinɛɓa sekɛɛɗɛ higii nɛɛkɛkik.

⁵Ijaagɗi sɛɛk a dakɛr a rɔmɛ a tipi anta sinaana ar darik eekerkank. Saaɓa Muuse rukeeɗ duukaanoy nɛɛkik, nɛɓa tongeeɗ Waakoyot kɛ, "Ijaag any baŋɛ a koorun ɛɛk oko sinɛɓana yaaŋɛɛɗɛ kurkum saaɓak raŋk."

⁶Mayakana ijaag sinɛɓa boŋu Yeeseek oko sinɛ kaalɛɗ wogoy ɛ sɛɛn ɓɔɔrɔkenk. Nɛɓɔrɛ kaalɛ kuumeet sinɛɓa ɗeeŋkiŋ, ɛɓa laŋki kuumiyɛ sigɔ dɔɔsuk.

⁷Wogoy sinɛɓa tukik ɔkɔnɓa kiikiɗɛ laŋiiɗ any sinɔ bitakkiŋ, nɛgunɓa ki ɗɛyɛ kuumeet pɛɛyeen nɛɛkik.

⁸Yakana agut sinɔɓa Waakoyot laŋkiɗ any sinɔ bitakik joope gɛɛnɛkik, nɛ tonu sɛɛga kɛ, "Tonu Suumii kɛ, Mɛlki koy ɔɔtɛ sinɔ koy guugunyɗii kuumeeta sinɔɔna tɔɔnuk, a joop Israeelik a joop Yuudaakiŋ.

⁹Tonu Suumii kɛ, Moko sini ɓɛɛlɛ oko kuumeet sinɛɓa guugunygiɗii a ɔrɛyak gɛŋkik saaɓa gaamiɗa arin gɛŋk kɛnɔ boŋka sɛɛg ɗook Gibsik, agut sinɔɓa sɔɔkɛrɗi kuumiyɛ gaaŋkŋɔŋk, nɛɓati keelɛrŋ.

¹⁰Tonu Suumii kɛ, Ege sini kuumeet sinɛkoy guugunygiɗii a joop Israeelik a tukiɗi ɓeny saaɓakik, riiɓaakoy higi naak kalbiyɛɛkɛ gɛŋk, taapakoy ɓayɛtunɛɛkɛ gɛŋk, dakakoy a Waakoyo nɛŋk, makoy sɛɛg joop gaaŋk.

¹¹Kɛɛ koy seedi son iɗit sinɔkoy rɔɔriy iɗitik, maŋk manya kɛ, 'Ɗegeri Suumik,' agut sinɔ ɗegerarkoyti baŋɛ a tukiɗi sinaanɛ tɛmk nɔ mɛlɛɛɗa sinaana obiik.

¹²Ŋɔɗuraakoy sɛɛge ŋɛɛwɛnka nɛŋkiŋ, kiikaakoyɓɔ sɛɛga koɓiiɗ tikiyɛ gɛŋk a tukiɗi seedi son."

¹³Saaɓa Waakoyot tonɗiiɗ agut kuumeet sinɔ tɔɔnuk sinɔ kɛ aalɛɛr sinɛɓa tukikŋɔŋk. Ege ɔɔtɛ nɛɛkɛ sinɔ kɛɛɗi sinɛɓa bɔɔlɔŋk badɛɛɗak.