Read majang Yaykoob 2 Bible Online

Yaykoob 2 - majang bible

Yaykoob 2

¹Iinak manyaakak eeta sigɛ dooytaanakik, ɔkɔn ŋaadiɗiikari Suumii naŋk eemɛyɔɔnoŋk Yeese Kereseyeŋ, nɛ kat pakaatɛɛ joop.

²Kaɗɛɛŋ guugunyarki tolɛɛɗa noŋk iɗit sinɔ lak katii workeyoŋk polpoltuk ɛ lak abii sinɔ mentanŋɔŋkuk, a iɗit sinɔ sankank sinɔ lak abii sinɔ lak turik,

³nɛ ɔkɔn eemɛyari iɗit sinɛ lak abii sinɔ mentanŋɔŋkuk nɛ tonurguɗɔ kɛ, "Beeɗi seedi nyon sineene mentanŋɔŋk," ma iɗit sinɛ sankank tonurguɗɔ kɛ, "Ɛti seŋk saadi" maŋk "Dokuɗe derakɛ gaanɛ goyse ɗeek,"

⁴nɛ moko ijaagiir pakaatan eek noŋk a pɛrɛdɛɛr any sinɔ ŋɛɛwɛnŋɔŋk?

⁵Iinak manyaakak eeta sigɛ porɛɛk, in tiyɛɛ. A kiɓato Waakoyot daamɛ sankaanak ɗoo sinik kɛnɔ sɛɛg worikaanak ŋaadiyɛɛkɛ, ɛ kɛnɔkoy laŋir burɛ sinɛɓa kuumɗigeeɗ joopa sigaaga porur sɛɛnik?

⁶Mayakana sɔɔk daraayɛɛr sankaanakiŋ. Joop sigɛkɔnu laagoyɛrk a kɔnu puruuter godeya pirdiyoŋkuk moko worikaanak?

⁷Moko sɛɛg sigɛ nyɔɔnar tiriya sigɛ eemɛyɛɛk sigɛɓa kɔnu riyɗɛɛk?

⁸Ɔkɔn dusanɛɛr higi burɛ Waakoyotoŋkuŋ sinɛɓa taapɛɛ kɛ, "Poru iɗit sinɛ beeɗiir jɔkikentik oko sinɛ poriiɗin ɛɛk nookuk," nɛ ijaagiir any sinɔ mentanŋɔŋk.

⁹Ma ɔkɔn ijaagiir pakaatan joope kɔɔruŋ, nɛ ijaagiir tikiyɛ nɛ kɔnu gɔɔnyɛɛ agut sinɔ sɔɔkɛrɗɔ higi Waakoyotoŋkuk.

¹⁰Ɔkɔn iɗit sɔɔkɛ sekiyɛɛkɛ a omoŋ ma koorɛ sigɛ ŋayɗiik baŋɛŋ nɛ ikomɛ a kɔ sɔɔkɛ sɛɛg baŋɛ.

¹¹Waakoyo sinɛɓa tonu kɛ, "Kat ibiɗiikink," nɛɓa ɓɔrɛ tonu kɛ, "Kat ɓokoɗiikinŋ." nɛ ɔkɔn kin ibiɗiitiŋ ɛ ɓokotɗikinŋ nɛkɔ sɔɔkun higi.

¹²Saa tonɗiiɗɔɔk a saa ijaagɗiɗɔɔk, in koɓɛɛ soon kɛ pɛrɛdɛɛkoy kɔne higii sinaanɛ boŋɗiik yaakataakiŋ,

¹³agut sinɔ iɗit sinɔ ki maariyɗiitik pɛrɛdɛɗɛɛkoy a kɛɛ maariyeet, ma sɛŋk lɔsɛ maariyeet pirdi.

¹⁴Iinak manyaakak eeta sigɛ dooytaanakik, ɔkɔn iɗit tonu kɛ, "Laka ŋaadiyɛɛŋ," ma ki yaaŋɛɛt ŋaadiyɛ gɛɛŋk ijaag any sinɔ mentanŋɔŋkuŋ nɛ kɔnyageeɗ jikon? Oolɛ a ebɔdɛr sɛɛn ŋaadiyɛ gɛɛnɛŋ?

¹⁵Ɔkɔn lakɛ manya eteŋka om sinɔ mooyk maŋk peetkiŋ ɛ kiiɗɛ abii a any sinɔ ɗamŋɔŋkuŋ,

¹⁶ɛ kɔne iɗit omaay tongeeɗ kɛ, "Ŋaari digoya inna paakɛɗ, ɓooɗorukuŋ," ma kiigeeɗ gaɓɛɛɗ any sinɛ ɗɛygeeɗkiŋ, nɛ kɔnyageeɗ jikon?

¹⁷Oko sinik ŋaadiyɛ sigɔ kir ijaagɛ any sinɔ mentanŋɔŋk rɛrarɓaŋ.

¹⁸Mayakana ɔkɔn tonu iɗit omaay kɛ, "Lakin seŋk ŋaadiyɛɛŋ, ma saak laka ijaag sinɔ mentanŋɔŋkuŋ." Nɛ in tonguɗa kɛ, "Yaaŋita ŋaadiyɛ gooŋk ijaag nookɛ, maɓɔrana yaaŋa ŋaadiyɛ gaaŋk ijaag naakɛ."

¹⁹Iin ŋaadin kɛ lakɛ Waakoyo a omoŋ. Nɛ mentan siniŋ, ŋaadir aasi ɓɔrɛ setana siniŋ, nɛ piiɗer a ɓuriiŋ.

²⁰Iin gaagɛy, kin ɗegerɔɔn kɛ kɛɛ ɔɔtɛ ŋaadiyɛɛkɛ sigɔɔgɛ kiiɗɛ ijaagikiŋ?

²¹Ɔrɛɛ naŋk Abraham saaɓa widerkiɗ tɔɔn nɛɛk Iisiyaak a uduŋeet Waakoyota nyona uduŋeetoŋkuk, nɛɓa ijaag any sinɔ mentan taamɛkɛ waakoyotoŋkuk?

²²Kin ɗegerɔɔn kɛ kaarɓa ŋaadiyɛ gɛɛnɛ a ijaag nɛɛk ɛɓa ŋaadiyɛ gɛɛnɛ daktaanak ijaag nɛɛkɛkiŋ?

²³Dusanɛɛ sineene any sinɛɓa tonɛɛ Wargatɛɛ Waakoyotoŋk kɛ, "Ŋaadiɓa Abraham Waakoyo, nɛɓa ikomguɗɛɛ ŋaadiyɛ gɛɛŋk a mentanka taamɛkɛ Waakoyotoŋkuk," nɛɓa tonɛɛ Abraham kɛ tekaan Waakoyotoŋk.

²⁴Sisɔ dɛnin a moko iɗit mentan taamɛkɛ Waakoyotoŋk ŋaadiyɛɛkɛ dakɛɗa, maɓɔrɛ mentan ijaagiŋ.

²⁵Rɔmɛɛɗ, Rɛaab sinɛɓa ruunykank saaɓa boŋiiɗ joop Israeelik sigɛɓa wosɛykɛɛ nyaka nɛɛkaakik ɛɓa ari sɛɛg a kaar gopɛ omalteek, nɛ mokoɓa ɓɔrɛ mentan ijaag nɛɛkɛ taamɛkɛ Waakoyotoŋkuŋ?

²⁶Buusɛ sinɔɓa pakakati a wɛɛŋak rɛrɓaŋ, nɛɓɔrɛ ŋaadiyɛ sigɔ pakakata a ijaagik rɛrarɓaŋ.