Read majang Yaykoob 4 Bible Online

Yaykoob 4 - majang bible

Yaykoob 4

¹Kurak eet kaarin a ɗaakan sigɛ kone atu kɔɔruk? Moko ɗɛyaan taaroŋk sinaanɛ enya kɔnek?

²Ɗɛyɛrkaayari any nɛ kiir laŋiiɗ, nɛ ɓokootari joop. Ɗɛyɛrkaayari any jɛt nɛ kiir oolɛ a laŋiiriŋ, nɛ ɓokootaakariŋ, kiir kalɛyiit Waakoyo nɛkɔna ki gayɛ.

³Kalɛyɗikari nɛ kiir laŋiiɗ any sinɛ kalɛyiirik, agut sinɔ arirɗɔ yaaka taaroŋk ant sinaanɛ laŋiirik, nɛ ɗanɗamaakari koɓiiɗ sinɔɔnɛ ŋɛɛwɛnŋɔŋk.

⁴Iinak joop sigɔ kɛɛ sɛɛg ŋaaditik, kiir ɗegerɔɔn iɗit sinɔ poru ɗook kɛ gumaaken Waakoyotoŋk? Sisɔ iɗit sinɔ daam pori ɗookoŋkuk sɛɛn gumaaken Waakoyotoŋk.

⁵Maɓɔrɛ koɓiir kɛ taapɛɛɓa Wargatɛɛ Waakoyotoŋk sɔkɔn? kɛ, "Poru Waakoyot nyekent jɛt wɛɛŋa sigɛɓa riiɓe sɛɛg eteŋkɛ tak kɛnɔ gɛɛŋk dakɛɗak."

⁶Gaɓɛkoy tina Waakoyot wookan a obiiŋ. Agut sinɔɓa taapɛɛɗɛɛ Wargatɛɛ Waakoyotoŋk kɛ, "Ɓooyu Waakoyot joop sigɔ ɓɔŋgɔɔrɛr ɛɛk nɛŋk rakaayakiŋ, makoy Sɛŋk gaɓɛ wookan joopa sigɔɔga rikiter ɛɛkkiŋ."

⁷Agut sini in ɓalɛɛ ɛkan goŋk Waakoyota, ma in ɓooyɛɛ diyabiloos, gonkɔɔ kɔneeŋ.

⁸In wideerɛɛ ɛɛk Waakoyota, widikikɔɔ ɓɔrɛ kɔna ɛɛkiŋ. Iinak tikitaanak, in ŋaɗɛɛ arin goŋk. Iinak walwaatikaanak, in ŋaɗɛɛ ɓayɛtun goŋk.

⁹In ɓakɛyɗiikɛɛ in sanɗikɛɛ, in kuɗɛɛ, in weerɛɛ tɔrɔ noŋk tukuɗa. In weerɛɛ yaaka noŋk sana.

¹⁰In rikitɛɛ ɛkan goŋk ɗooka taamɛkɛ Suumiyoŋk, ɓɔŋgɔɔrɛkɔɔ Sɛŋk kɔnu rakaaya.

¹¹Iinak manyaakak eeta sigɛ dooytaanakik, kat tonɛɛ any sinɔ ŋɛɛwɛnŋɔŋk ɛkanɛɛkɛ goŋk, iɗit sinɔ tonu iɗit a ŋɛɛwɛnŋɔŋk maŋk iɗit sinɔ pɛrɛdɛ etek tonu higi a ŋɛɛwɛnŋ, ɛ pɛrɛdɛ higii. Ɔkɔn pɛrɛdin higiiŋ, nɛ iin iɗit sinɔ pɛrɛdɛŋɔŋk, ma moko dusanin higi.

¹²Sinɛ gaɓɛ higi ɛ pɛrɛdɛk Waakoyo dakɛɗa, Sɛɛn dakɛɗa sinɛ oolɛ a tin ebɔdɛ ɛ tin sɔɔkɛk. Anɛ iin wooɗ sinɛ pɛrɛdɛ etek?

¹³In tiyɛɛ, iinak sigɛ toniir kɛ, "Kɛɛɗiikɔɔ ɓenyse maŋk alɛ katamɛya sineena maŋk sinɔɔna nɛ kɛɛɗii beeɗii a eme omoŋ nɛ nagadɗiikiiŋ nɛkɔɔ laŋii wori a obiiŋ," in koorɛɛ ɛɛk.

¹⁴Ma ɗegerari kɛ ɓɛɛlɛkɔɔ alɛ ɛkiŋ? Ege wɛɛŋa goŋk jikonak? Ito iinak gumoy sinɔ duuŋe nɛ dɛnɛɛ ɔɔtɛya sinɔɔna balaaŋɔŋk makɔɔ saadi badɛŋɔŋk.

¹⁵Dɔɔs a sɔɔk toniir kɛ, "Ɔkɔn ɗɛyɛ Suumiiŋ, ɛ ɔkɔnkɔɔ ɓɛɛliiŋ nɛkɔɔ ijaagii sini maŋk sinɔyŋ."

¹⁶Mayakana merirɗɔ ɛɛk ŋaɗɛɛkaay. Meri ɛɛkoŋk sinɔ ito sinik baŋɛ ŋɛɛwɛnŋ.

¹⁷Iɗit sinɔ ɗeger any sinɔ mentanŋɔŋk, ɛ ki ijaagɛk nɛ sɛɛna tikiyɛ.