Read majang Omoŋ Petrosuk 1 Bible Online

Omoŋ Petrosuk 1 - majang bible

Omoŋ Petrosuk 1

¹Ege sini wargatɛ sinɔ taapɛɛrɛ seey lak Petros sinɛ wosɛytan Yeese Kereseek, iinaka sigaagaɓa kɔnu daam Waakoyotuk sigɛɓa kɛɛtiɗiikari nɛ ɓɛɛlɛɛr a iinak konan sinɔɔnɛ Pantoosuk a Gɛlatiyaak a Kɛpɛdookiyaak a Isiyaak a Bitaniyaak.

²Daamɓa kɔnu Baabɛ Waakoyot jeemɛ koɓiiɗ nɛɛkɛ sinaanɛɓa gaamuk, iinak sigɛɓa kɔna wasanɛɛ yɛrom Nɛɛk kɛnɔ tiiɗikari Yeese Kereseyaak sigɛɓa kɔnu geetɛɛ Wɛɛŋakɛ sigɔɔgɛ Geetitaanakik kɛnɔ kɔnu ŋaɗɛɛk. In kɔna obulur wookaan a bɔdɛ.

³In dakɛr pɔɔsiyɛɛk Waakoyota Ɛpɛna Yeese Kereseya, Suumiya naŋk. Ɓartɛkan tin Sɛŋk ɓartiyɛɛkɛ sigɔɔgɛ tɔɔmɔkuk a ŋaadiyɛɛkɛ sigaagɛ kookoriik sigɛkoy kir badɛɛk agut maariyeet Nɛɛk sinɛ obiiŋɔŋk a ŋaarin ret walasak Yeese Kereseek,

⁴arikan tin kɛnɔkoy laŋii any sinɛɓa tina riiɓkun Waakoyot darik sinɛkoy ki badɛɛk ɛkoy ki sɔɔkiɗiitik a kiiki bɔlɔŋurɔŋk.

⁵Kookorɛɛɓa ɓɔrɛ kɔnu goy ŋaadiyɛɛkoŋk, ɓaŋkawukaat Waakoyotoŋk bɔdɛɛɗa sinaanaɓa ragadɛɛ nɛkoy mɛlki waawuy sinaanɛkoy pediyaak,

⁶kɛygun aasi kɔnu oodɛr paariyɛ sigɔ ɓɛɛlɛr kundiyaakɛk, ɔɔtɛya sinɔɔna balaaŋɔŋkuŋ, nɛ in kɔna yaa Sɛɛne.

⁷Laŋirkɔ paariit sini kɛnɔ ɗegerɛɛ ŋaadiyɛ goŋk kɛ eekeer. Ŋaadiyɛ goŋk kɛygun eemɛyɛɛ, a kaalɛ worke sinɔkoy badɛŋɔŋk, nɛ paarɛ sɛɛg oko sinɛ paariɗɛ worke maɗik. Nɛkoy laŋiir pɔɔsiyɛ a eemɛyɔn a tukuun saakoy yaaŋɛɛɗ ɛɛk Yeese Kereseek.

⁸Kɛygun aasi iinak sigɛɓa kiir taanta Yeese Kereseek nɛ poriiriŋ, kɛygun iinak sigɛ kiir taanta sisɔk nɛ ŋaadiɗiɗɔɔŋ, nɛ yaa kɔna yaakaat sinɔɔnɛ eemɛytank sinɔɔnɛ ki gayɛ a yaaŋɛɛ pɛɛniik,

⁹agut sinɔ boŋiirkoy gati agut ŋaadiyɛ goŋk. Ege gati sini bɔdɛ wɛɛŋa goŋkuk.

¹⁰Joop pɛrkaakoŋk sigɛ waasɛr pɛrkaak, agut wookan sinɛkoy kɔna gaɓɛɛk ɓaŋkaawurarɓa nɛ mermenar bɔdɛ sini kɛ ɗɔm.

¹¹Nɛɓa yaaŋɛr jeemɛ Wɛɛŋa Kereseek sigɛ atu sɛɛge takik, rakatɛ sinɛkoy laŋkik a eemɛyɔn sinɛkoy laŋki rakatɛɛ nɛɛkɛ baŋiyaak, nɛɓa mermenar any sini baŋɛ kɛ ɓɛɛlɛkoy ɔɔtɛ sinɔɔnɛ ɛtɛ ɛkik a ɓɛɛlɛ ɛk.

¹²Joop pɛrkaakoŋk sigi yaaŋɛɛkan sɛɛga kɛ ijaagɗigeeɗkan iinak, ma mokokan ɛkan gɛŋk. Nɛ sisɔ waasɛr kɔna Pɛɛni sinɔ Ɓɛlkɛɛstank ɓaŋkawukaat Wɛɛŋakɛ sigɔɔgɛ Geetitaanakik sigɔɔgɛkan wosɛykɛɛ rakaayk, a yaaŋɛr kɔna any sinɛ kɔna tonur joopk. Ɗɛyɛrkɛɓa aasi wosɛytaana a gun dɛnɛr any siniŋ.

¹³Agut sini in ragadɛɛ ɓayɛtun goŋk ijaaga, in beeɗɛɛ kɛ ɗɔm, in lakɛɛ ŋaadiyɛ sigɔ enyaaŋɔŋk, kɛ laŋiirkoy wookan Nɛɛk saakoy yaaŋɛɗ ɛɛk Yeese Kereseek.

¹⁴Oko sinɛ iinak tɔɔmɔk sigɔ tiiɗiŋɔŋkuk, kat nomɛɛ ɗɛyaan sinɔɔnɛ ŋɛɛwɛnŋɔŋk, sinaanɛkan latukari jeemɛ a inɓa kiir ɗegerɔɔn ɛɛkik.

¹⁵Mayakana, Sɛɛn sinɛkan kɔnu riyk, oko sinɛ Sɛɛn geetitank in ɓɔrɔ iinak geetitaanak beeɗit noŋk baŋɛ.

¹⁶Agut sinɔ taapɛɛɓa Wargatɛɛ Waakoyotoŋk kɛ, "Eet geetitan, nɛ ɓɔrɔ in iinak geetitaanak."

¹⁷Ɔkɔn riyari kɛ, "Baabɛɛ naŋk," Waakoyo sinɛkoy ari a omoŋ omoŋ eta oko ijaag nɛɛkik a kɛɛ iɗit sinɔ pakatikiŋ, nɛ in beeɗɛɛ a ɓurɛɛ Sɛɛn saa beeɗirɗɔ ɗook raŋk koonatikenk a iinak woytataktaanakik.

¹⁸Agut sinɔ ɗegerari kɛ ɓalkiɓa kɔnu Waakoyot kɛnɔ ŋaararkɔ yaakata beeɗit sinɔɔnɛ ɓɛɛlɛ kanysɛyaak sinaanɛɓa boŋiir ɓaaɓakakɛk, ma mokoɓa kɔnu ɓalki birii maŋk workee sinɔɔnɛkoy badɛŋɔŋk.

¹⁹Yakanaɓa kɔnu ɓalki yɛrom sinaanɛ eemɛytank Yeese Kereseek, sinɔɔnɛ ito Jiŋkuy sinɔ kiiɗɛ turik maŋk kiiɗɛ any sinɔ ŋɛɛwɛnŋɔŋk.

²⁰Daamɛɛɓa Sɛɛn a inɓa kɛɛ riiɓɛɛ ɗoo nɛɓɔ sise yaaŋɛɛ ɛɛk agut iinak emeyikɛ sigeege pediyaak.

²¹Ŋaadiɗiikari Waakoyote sinaanɛɓa boŋku Sɛɛn ret walasak, ɛɓa gageeɗ eemɛyɔnk goy nɛɛkɛk. Nɛ atu ŋaadiyɛ goŋk a ŋaadiyɛ sigɛ kookoorarik Waakoyote.

²²Ŋaɗɛɛrkɔ ɛkan goŋk a tiiɗikari eekeera kɛnɔ latukari mɛyin sinɔ kiiɗɛ daraayɛ masookoyakaak. Agut sini in poporiikɛɛ ɛkanɛɛkɛ goŋk ɓayɛtun goŋk baŋɛ.

²³Ɓartɛɛɓa kɔnu kɛkar Pɛɛnii Waakoyotoŋk sinaanɛkoy beeɗ nɔkoy nɔkoyk wɛykont sinaanɛkoy ki bɔdɛɛk, ma moko wɛykont sinaanɛkoy badɛŋɔŋk.

²⁴Oko sinɛ toniiɗ Wargatɛ Waakoyotoŋk kɛ, "Joop baŋɛ gayi a ŋɔnyi, ito eemɛyɔn nɛŋk makɛ ɗukoŋk, paalorar ŋɔnyi gɛɛnɛŋ, nɛ roorowɛ makɛ nɛɛkɛɛŋ.

²⁵Mayakana beeɗkoy Pɛɛni Waakoyotoŋk, nɔkoy nɔkoyk." Pɛɛni sinɛɓa kɔna waasɛɛk Ɓɛlkɛɛstank sɛɛn sini.