Read majang Omoŋ Petrosuk 2 Bible Online

Omoŋ Petrosuk 2 - majang bible

Omoŋ Petrosuk 2

¹Sisɔ in ŋɔɗɛɛ tikiyɛ baŋɛ a raamiyɛ baŋɛ a tagay a nyeken a laaganyɔnak sigɔ ɓɛɛlɛr kundiyaakɛk.

²In ɗɛyɛɛ ɛrsɛɛ sigɔ arir wɛɛŋa goŋk a ɓaŋkaawuraŋɔŋk oko sinɛ ɗɛyɛrɗi sasalɛyɛ sigɔ in sɛɛg ɓartikaayɛŋɔŋk ɛrsɛɛk, nɛ in ɗɛyɛɛ ɛrsɛɛ Pɛɛni sinɔ kiiɗɛ ɗɛgɛk.

³Agut sinɔ lɛɛlɛmɛɛrɓa mentanka Suumiyoŋkuŋ.

⁴In widikɛɛ ɛɛk son lak Yeesee sinɛ giɗee sinɛ bɔdɛk, giɗee sini daraayɛrɓa joop nɛ orurŋ, mayakana sɛɛn sinɛɓa daam Waakoyot kɛnɔ eemɛyk.

⁵Nɔ widerkiɗɔ ɛɛk son lak Yeeseek kɛnɔ ariir ɛkan a ito iinak giɗeek sigɔ bɔdɛɛk kɛnɔ kɛnyaari ɛɛk a iinak gode sinɔ beedirɗi Wɛɛŋa Waakoyotoŋkuk. Oko sinik dakɛɛrkɔɔ a iinak tapa ŋaadiyɛɛkoŋk sigɔ geetitaanakik kɛnɔ wideetaarɔ uduŋeet sinɔ yaaŋɔŋk Waakoyota goy Wɛɛŋa sigɔ Geetitaanakik goy Yeese Kereseek.

⁶Agut sinɔ taapɛɛɓa Wargatɛɛ Waakoyotoŋk kɛ, "Riiɓaakoy giɗee sinɛ obiik sinɛɓa daamɛɛk ɛ eemɛyɛɛk Siyoone, iɗit sinɔ ŋaadiɗi Sɛɛnek kiiɗɛ keeny adaktan."

⁷Ege giɗe sini eemɛytan, sisɔ iinaka sigaaga ŋaadiirik, mayakana joopa sigaaga kir ŋaadiitik dakɛ sɛɛga a "Giɗee sinɛɓa daraayɛr joop sigɛ kɛnyar godeyik giɗeekɛk nɔɓa orurk, dakɛ sɛɛga a giɗee sinɛ obi giɗeekɛ baŋɛk,"

⁸maɓɔrɛ oko sinɛɓa toniiɗɛ kɛ, 'Ege sini giɗee sinɛ dakɛ a gaŋtan kɛnɔ ari joop a ɗiirarŋɔŋk.' " Pakatɛɛɓa sɛɛg agut sini.

⁹Mayakana sɔɔk iinak joop sigɔɓa daamɛɛŋɔŋk, iinak tapa ŋaadiyɛɛkoŋk Suumiyoŋk, iinak joop sigɔɓa geetɛɛŋɔŋk ɛ iinak joop sigɔɓa kɔnu ijaag Waakoyot ɛɛka nɛɛkakik sigɔɓa riykɛɛ nyuugur pɛɗɛrkaata sinɔɔna reemɗi ɓayɛk kɛnɔ waasɛɛr any Waakoyotoŋ sinɔ reemɗi ɓayɛk.

¹⁰Mokoɓa jeemɛ iinak joop Waakoyotoŋk, maɓɔ sisɔ iinak joop Waakoyotoŋk, kiirɓa jeemɛ laŋiiɗ maariyeet, makɔɓɔ sisɔ laŋiir maariyeetiŋ.

¹¹Iinak joop sigɛ kɔnu poraak, agut sinɔ iinak ɗook raŋk konan a woytataktaanak, nɛ kɔnu kalɛya kɛnɔ yowɛrkari ɗɛyaan taaroŋk sinɔɔnɛ kaarar a ɛkan goŋkuk.

¹²Saa beeɗirɗɔ joope sigɔɔgɛ kir ŋaadiit Waakoyok kɔɔruk in lakɛɛ kalbi sinɔ mentanŋɔŋk. Kɛygun aasi kɔnu laaganyarkɛ kɛ ijajagari any sinɔ ŋɛɛwɛnŋɔŋkuŋ. Nɛkoy dɛnɛr ijaag noŋk sinɔ mentanŋɔŋk, nɛ pɔɔsɛr Waakoyo ɓeny saakoy mɛlkiɗ lɛɛwɛɛtak.

¹³In tiiɗikɛɛ ɔɗɔweera ɗookoŋk agut Suumi, agut sinɔ arkiɗ rakaay ɔɗɔwenk. In tiiɗikɛɛ suumiya sinaana obiik,

¹⁴in tiiɗikɛɛ joopa sigaaga lowur ɗook agut sinɔ wosɛykɛɛkan sɛɛg sooy lak suumi sinɛ obiik kɛnɔ goopar joop sigɛ ijaagir any sinɔ ŋɛɛwɛnŋɔŋk ɛ pɔɔsɛr joop sigɛ ijaagir any sinɔ mentanŋɔŋk.

¹⁵Ɗɛyan Waakoyotoŋk sinɔ arirɗɔɔ any sinɔ mentanŋɔŋk kɛnɔ ariir toni gaagɛɛkoŋk a dakɛ kɛ manyk sinɛ tonur a kir ɗegerɔɔnuk.

¹⁶In beeɗɛɛ yaakaat oko laaŋoyeer Waakoyotoŋk, ma kat ariir beeɗit noŋk sini yaakatik a miinytan any sinɔ ŋɛɛwɛnŋɔŋkuk.

¹⁷In eemɛyɛɛ joop baŋɛ, in porɛɛ ŋaadtaanak, in ɓurɛɛ Waakoyo, in eemɛyɛɛ suumi ɗookoŋk.

¹⁸Iinak laaŋoyeer, in tiiɗikɛɛ suumiyɛɛka goŋk eemɛyɔɔn, moko tiiɗigiɗɔ joop sigɛ mentaanak a joop sigɔ mentaana koɓiɗa gɛŋkik dakɛɛɗa. Kɛygun sɛɛk ŋɛɛwɛɛkɛɛŋ nɛ in sɛɛga tiiɗikɛɛ.

¹⁹Iɗit sinɔ laŋki dire a rakatɛ sinɔ moko likik nɛ ɓaŋkaawur oolaanik agut Waakoyok nɛ pɔɔsɛɛŋ.

²⁰Ɔkɔn kɔnu goopɛɛ maakɔ ijaagiir tikiyɛ ɛ ɓaŋkaawurariŋ nɛ latukari pɔɔsiyɛ kɛ jikonak? Ma ɔkɔn laŋirkɔ rakatɛ maakɔ ijaagiir any sinɔ mentanŋɔŋkuŋ ɛ ɓaŋkaawurariŋ nɛ laŋiir pɔɔsiyɛ sooy lak Waakoyok.

²¹Riyɛɛɓa kɔnu agut sini, agut sinɔ laŋkiɓa Kerese rakatɛ nɛkɔna dakɛ a rɔmɛ kɛnɔ nomɛɛr Sɛɛne.

²²Kiɓa Sɛŋk ijaagɛ tikiyɛ, ɛɓa kiikɛ laŋiiɗ ɗɛgɛ ad nɛɛkɛ.

²³Nyɔɔnɛɛɓa nɛ ki jumurɛ, saaɓa laŋkiɗ rakatɛk nɛɓa gaɓɛ ɛɛk Nɛɛk Jooka sinaana mentank sinaanakoy pɛrɛdɛ eekeerɛɛk, maɓa ki epɛɛrɛ ɛɛk.

²⁴Ɓatakiɓa Sɛŋk tikiyɛ gaŋk eek nɛɛkɛ laalawutant raŋk kɛnɔ pakatii ɛɛk tikiyɛɛkɛ kɛnɔ beeɗii mentankaat. Bɔdɛɛrɓa doosoy nɛɛkɛk.

²⁵Yoyoŋikariɓa a ito iinak jiŋkuyɛ sigɔkan badɛrŋɔŋk, makɔɓɔ sisɔ weerikɔɔ son lak Irtan a Koortan wɛɛŋa goŋkuk.