Read majang Omoŋ Petrosuk 3 Bible Online

Omoŋ Petrosuk 3 - majang bible

Omoŋ Petrosuk 3

¹Iinak ɓɔrɔ jartiyatɔk, in tiiɗikɛɛ babuyka goŋk. Ɔkɔn lakɛɛ babuyk sigɔ in kir ŋaadiɗiit Pɛɛnii Waakoyotoŋkuŋ, nɛ moko waasiyɛɛkɛ, ma oolɛr a weeriiki beeɗit jartiyatɔ gɛŋkik son lak Waakoyokuŋ,

²saa dɛnɛrɗ beeɗit noŋk sinɛ eemɛytan ɛ mentan adaktank.

³Mentanka noŋk kat ar olaatɛ sigaagɛko laŋkɛ walasik abiyakɛ sigɔɔgɛ obi gati nɛɛkɛŋɔŋk a workee weentoŋk a tɛkɛny amikoŋk.

⁴In ɗegerɛɛ kɛ ar mentanka noŋk iinakɛ tak. Ege sini mentanka eemɛyɔn sinɛ ar taamɛkɛ Waakoyotoŋk sinaanɛkoy ki badɛɛk wɛɛŋakɛ leemikeenoŋk a rikiteet ɛɛkoŋk.

⁵Agut sinɔ emeyikɛ sigaagɛɓa jeemɛk jartiyatɔk sigɛɓa geetitaanak sigɛɓa riiɓer ŋaadiyɛ sigɛ kookoorɛɛk Waakoyoteek nɛɓa ŋaɗɛr ɛkan gɛŋk babuyka gɛŋk.

⁶Rɔmɛɛɗ tiiɗiɓa Saara Abrahama a riy kɛ, "Suumi naakɛ," nɛɓɔrɔ ɔkɔn ijaagiir any sinɔ ɓɛɛlɛ kɛ ɗɔmk a kɛɛ any sinɔ ɓureerikiŋ nɛkɔɔ ito iinak tɔɔmɔk gɛɛŋk.

⁷Maɓɔrɛ iinak babuyk, in beeɗɛɛ a jartiyatɔk goŋk a koɓɛɛŋ, in eemɛyɛɛ sɛɛg agut sinɔ bɔɔlaaɗ a kɔnu kaalɛrŋɔŋk ɛkoy moonɛr wookan wɛɛŋakoŋk a iinak agut omoŋk. Saa ɓɛɛlɛɛɗ oko sinikik, kɛɛ any sinɔkɔɔ kɔna dakɛ a gaŋtan ɗanɗamɔɔna noŋkuk.

⁸Pedtan nɛɛk, in beeɗɛɛ a koɓi omoŋ ɛkanɛɛkɛ goŋk iinak baŋɛ, in kɔna sanɗi joop, in poporiikɛɛ mɛyin masiikikeenoŋk, in mentankɛɛ a rikitɛɛ ɛkan.

⁹Kat jumurɛɛ anta sinɔɔna ŋɛɛwɛnŋɔŋk any sinɔ ŋɛɛwɛnŋɔŋk, ɛ kat jumurɛɛ nyɔɔnaka nyɔɔna, ma in geetɛɛ joop sigɛ kɔnu nyɔɔnark, agut sinɔ riyɛɛkan kɔnu kɛnɔ ijaagiir any sini kɛnɔkoy laŋiir geet.

¹⁰Oko sinɛ toniiɗ Wargatɛ Waakoyotoŋk kɛ, "Iɗit sinɔ ɗɛyɛ beeɗit sinɔ yaaŋɔŋk, ɛ ɗɛyɛ a koy dɛnɛ emeyik sigɛkoy mentaanaŋɔŋk, in kol kaɗa nɛɛk ant sinɔɔnɛ ŋɛɛwɛnŋɔŋk, ɛ kol ato nɛɛk a kat toniiɗ ɗɛgɛ.

¹¹In wide ɛɛk ant sinɔɔnɛ ŋɛɛwɛnŋɔŋk, in ijaag any sinɔ mentanŋɔŋk, in ɗɛyɛ bɔdɛ, a in nomɛɛɗiɗ.

¹²Agut sinɔ mermena Suumii son lak, joop sigɛ mentaana taamɛkɛ Waakoyotoŋkuk, geleewɛ kɛnɔ tiyɛ ɗanɗamɔn nɛŋk, mayakana ŋadi Waakoyotuŋ, joopa sigɔɔga ijaagir any sinɔ ŋɛɛwɛnŋɔŋkuŋ."

¹³Ɔkɔn ɗɛyɛɛr kɛnɔ ijaagiir any sinɔ mentanŋɔŋk jɛtiŋ, wooɗ sinɛ kɔnu ari a meeŋɔŋk?

¹⁴Ɔkɔn aasi laŋirkɔ rakatɛ maakɔ ijaagiir any sinɔ mentanŋɔŋkuŋ, geetikoy kɔnu Waakoyotuŋ. Kat ɓurɛɛ epɛɛran ɛɛkoŋk joopoŋk, ɛ kat ɓakɛyɗiikɛɛ.

¹⁵In eemɛyɛɛ Keresee sinɛ Suumik ɓayɛtunɛɛkɛ goŋk, in ɓɛɛlɛɛ a ragadtaanak ɓɛɛnyɔwɛ gɛɛŋk baŋɛ kɛnɔ jumurari kɔɔniyɔn sinɛ kɔnu kɔɔniyɗɛɛ agut ŋaaɗiyɛ sigɛ latukarik. Mayakana, in jumurɛɛ any sinɔ yaaŋɔŋk eemɛyɔɔn.

¹⁶In lakɛɛ kalbi sinɔ kɛɛ laaganyɛɛk, kɛnɔkɔɔ latu keeny nyɔɔnaka gɛŋk joop sigɛ kɔnu laaganyar agut koɓi sinɔ mentanŋɔŋk sinɛ latukari agut sinɔ iinak Kereseek.

¹⁷Ɔkɔn ɗɛyan Waakoyotoŋkuŋ, dɔɔs a laŋirkɔ rakatɛ, ma ariir any sinɔ mentanŋɔŋk, ma moko arɛɛ any sinɔ ŋɛɛwɛnŋɔŋk.

¹⁸Rɛrɓa Kerese agut omoŋ agut tikitaanak kɛnɔ kɔnu wideer son lak Waakoyok. Saa Sɛɛn iɗit sinɔ mentan taamɛkɛ Waakoyotoŋkuk nɛɓa rɛr agut tikitaanak, rɛrɓa sɛŋk taare ma Sɛɛn bɔdtan Wɛɛŋakɛ.

¹⁹Kɛɛɓa Sɛŋk Wɛɛŋakɛ kɛnɔ kɛ waasɛ Pɛɛni sinɔ Ɓɛlkɛɛstank wɛɛŋaka joop sigɛɓa rɛrark sigaaga atu korkoɗɔɔnuk.

²⁰Sɛɛg sigɛɓa jeemɛ kir tiiɗitik saaɓa Waakoyot koorɛɛɗ sɛɛg kɛ many saaɓa Nooh ragadiiɗ emɗ sinɛɓaakik. Joop sigɛɓa guugunyar emɗa nɛɛkakik nɔɓa bɔdɛr maawɛɛk egeɓa ɓɔɔkaaka nɛŋk joop tula jiit dakɛɛɗa.

²¹Ege maawu sigi rɔmɛ aadiitoŋk sinɛ kɔnu ebɔdɛ sisɔk. Moko ege sini aadi turi ɛɛkoŋk, kalɛy sinɔ wideerɛɛ son lak Waakoyok kɛnɔ gaɓɛ kalbi sinɔ kɛɛ laaganyɛɛk. Ebɔdɛ kɔnu aadi sini goy ŋaarin Yeese Kereseek ret walasak.

²²Ŋaarɓa Sɛŋk dariya nɛ sisɔ ar ɗiɗikɛ Ɛpɛnaak ɓalɗigeeɗ wosɛytaana a ola sigɛ latu ɓaŋkawukaak a ɓaŋkawukaatak baŋɛ.