Read majang Omoŋ Petrosuk 5 Bible Online

Omoŋ Petrosuk 5 - majang bible

Omoŋ Petrosuk 5

¹Rɔɔriya gutarɛɛ Gode Sambatɛyoŋk sigɛ atu iinakɛ kɔɔruk. Eet sinɛ gutarin Gode Sambatɛyoŋk eet a sɛɛgik ɛɓa dɛna kɛnɔ ɗegera rakatɛ ɛ kaasa eemɛyɔn sinɛkoy yaaŋɛ ɛɛk ɔɗɔɔkak.

²In lowɛɛ joop Waakoyotoŋk sigɛ ito pony jiŋkuyɛɛkoŋk sigɛkan kɔna gaɓɛɛ a adaratik. Moko lowiir sɛɛg direeɗ, ma lowiir sɛɛg yaakaat oko sinɛ ɗɛyɛɛɗ Waakoyotuk. Moko lowiir sɛɛg a rererigiɗɔ wori, ma in ɓɛɛlɛɛ oko sinɛ ɗɛyɛrɗɔ ijaag nɛɛkik.

³Maɓɔrɛ joop sigɛɓa kɔna gaɓɛɛ a adaratik moko lowiir sɛɛg a laaŋoyɛɛr sɛɛgiŋ, in yaaŋɛɛ rɔmɛ sinɔ mentanŋɔŋk jiŋkuyɛɛka gɛɛnaak.

⁴Ɔkɔnkɔɔ ijaagiir siniŋ boŋiirkoy dooroy eemɛyɔɔnoŋk, sinɔkoy ki sɔɔkiɗiit a daktank, saakoy yaaŋɛɗ ɛɛk Ɔɗɔwen sinɛ Koortaanakoŋkuk.

⁵Maɓɔrɛ iinak atiinyi baŋɛ, in tiiɗikɛɛ gutarɛɛka. In rikitɛɛ ɛkan goŋk ɗooka kɛnɔ kɔkɔnyikɛ ɛkanɛɛkɛ goŋk, agut sinɔ taapɛɛɓa Wargatɛɛ Waakoyotoŋk kɛ, "Ɓooyu Waakoyot joop sigɔ ɓɔŋgɔɔrɛr ɛkan rakaayakiŋ, ma joop sigɛ rikiter ɛkan gɛŋkik gaɓɛkoy sɛɛga wookan nɛɛk"

⁶Sisɔ in rikitɛɛ ɛkan goŋk ɗooka ariit Waakoyotoŋk sinaanɛ ɓaŋkawuŋɔŋk kɛnɔkoy kɔnu ɓɔŋgɔɔrɛ Sɛŋk ɔɔtɛ saakoy ruumeɗik.

⁷In oriirɛɛ any sinɛ kɔnu ooɗɛk baŋɛ son lak Sɛɛnik, agut sinɔ kɔna koɓiiɗŋɔŋk.

⁸Nɛ in beeɗɛɛ kɛ ɗɔm ɛ in ɓeɗɛɛ. Gumaaken noŋk diyabiloos rereri kɔne tookɛɛta a gindɛyɛ a ito ɗɛpɛ sinɔ ɗɛyɛ any sinɔ ɗamŋɔŋk.

⁹In ɗegerɛɛ kɛ masookoyak sigɛ atu ɗook raŋk laŋirkikoy rakatɛ sinɔ ito sinikiŋ nɛ in ɛtɛɛ ŋaadiyɛɛkɛ kɛnɔ ɓooyɛɛ sɛɛn.

¹⁰Ɔkɔn boŋiir rakatɛ ɔɔtɛya sinɔɔna balaaŋɔŋk, Waakoyo sinɛ ɗumaat tigiyak baŋɛk sinɛɓa kɔnu riy eemɛyɔɔna sinaanakoy nɔkoy nɔkoyk goy Kereseek, gaɓɛkɔɔ kɔna any sinɛ ɗɛyɛɛrkiŋ, Sɛɛn titikekɔɔ kɔnuŋ, arikɔɔ kɔnu a ɓaŋkaawurariŋ, arikɔɔ kɔnu a ɛtɛɛriŋ.

¹¹In dakɛ ɓaŋkawukaat Sɛɛna nɔkoy nɔkoyk. Ameen.

¹²Taapɛɛrakan kɔna wosɛ sini a diny goy Siilaasik sini koɓa kɛ manya eteŋka sinɔ ŋaadɛɛŋɔŋk, kɛnɔ kɔnu rɔɔriy ɛ kɔna yaaŋa kɛ ege sini wookan Waakoyotoŋk sinɔ eekerkank. Nɛ in ɛtɛɛ a ɓaŋkawuŋ wookaan sineene Waakoyotoŋk.

¹³Digoyɛɛtarnɔ kɔnu joop Gode Sambatɛyoŋk sinɛ ar Baabloonek sinɛɓa daamɛɛ a iinakik ɛnɔ kɔnu digoyɛɛr Markoos sinɛ tɔɔn naakik.

¹⁴In digogoyikɛɛ a samɓoɓoyikɛɛ ɛkanɛɛkɛ goŋk mɛyin. Digoy kɔna baŋɛ iinak sigɛ joop Kereseek.