Read majang Omoŋ Yowanisik 2 Bible Online

Omoŋ Yowanisik 2 - majang bible

Omoŋ Yowanisik 2

¹Iinak tɔɔmɔk gaaŋk, taapɛɛra kɔna sini kɛnɔ kat ijaagiir tikiyɛ, ma ɔkɔn lakɛ iɗit sinɔ ijaag tikiyɛɛkiŋ, nɛ lakii tokoltan sooy lak Baabɛɛkiŋ. Sɛɛn Yeese Keresee sinɛ mentan taamɛkɛ Waakoyotoŋkuk.

²Ranyjɛɛ tikiyɛ gaŋk ɔɔtɛ rer nɛɛkik, moko tikiyɛ gaŋk dakɛɗa, ma tikiyɛ joopoŋk baŋɛ.

³Ɔkɔn koorii sekiyɛ Waakoyotoŋkuŋ, nɛkɔɔ ɗegerii sineene kɛ ɗegerii sɛɛniŋ.

⁴Ɔkɔn lakɛ iɗit sinɔ tonu kɛ ɗegera Waakoyoŋɔŋk, ma ki koorɛɛt sekiyɛ gɛɛŋkiŋ, sɛɛn nyonkan, kɛɛ eekeer sɛɛne tak.

⁵Mayakana iɗit sinɔ tiiɗi pɛɛniya Waakoyotoŋkuk baŋɛ, ege mɛyin sinɛ lak Waakoyotak daktan. Ɗegerii sinɔ kɛ beeɗii Waakoyotek eekeerɛ sineene.

⁶Iɗit sinɔ tonu kɛ beeɗaa Waakoyotek ɗɛygeeɗ a beeɗ oko sinɛɓa beeɗiɗ Kereseek.

⁷Iinak sigɛti poriirik, moko kɔna taapɛɛra sekiyɛ sigɔ tɔɔmɔkuk, ma sigɛɓa ɗeeŋk sigɛɓa latukari a tukiɗik tukik. Ege sekiyɛ sigi pɛɛni sinɛɓa tiyɛɛr jeemɛk.

⁸Yakana taapɛɛra kɔna sekiyɛ sigɔ tɔɔmɔkuk, sigɛ dɛnɛɛ eekeer gɛɛŋk Keresee a iinakɛk. Agut sinɔ aalɛkan nyuugur nɛɛk nɛ tipeyɗi pɛɗɛrka sinɔ eekerkank.

⁹Iɗit sinɔ tonu kɛ beeɗaa pɛɗɛrkaatik, ma ɓooyu manyaak in ar nyuugur.

¹⁰Iɗit sinɔ poru manyaak beeɗ pɛɗɛrkaat, ɛ joop kirki weeriit gopɛ Waakoyotoŋk agut sɛɛn.

¹¹Ma iɗit sinɔ ɓooyu manyaak beeɗ nyuugur. Weeweri nyuugur, ki ɗegerɔɔn kɛ kɛɛ etena agut sinɔkan miinyeeɗ nyuugur taamɛ gɛɛŋk a motararŋɔŋk.

¹²Iinak tɔɔmɔk gaaŋk, taapiɗiira kɔna agut sinɔkan kɔne ŋɔɗurkuɗɛɛ tikiyɛ goŋk tiriyaakɛ gɛɛnɛkik.

¹³Iinak baabɛyak, taapiɗiira kɔna agut sinɔ ɗegerarɗɔ sinɛkan ɓɛɛlɛ tukikŋɔŋk. Iinak atiinyi, taapiɗiira kɔna agut sinɔkan lɔsɛrɗɔ setanik.

¹⁴Iinak tɔɔmɔk, taapiɗiira kɔna, agut sinɔ ɗegerarɗɔ Baabɛɛ naŋkŋɔŋk. Iinak baabɛyak, taapiɗiira kɔna, agut sinɔ ɗegerarɗɔ sinɛɓa ɓɛɛlɛ tukikŋɔŋk. Iinak atiinyi, taapiɗiira kɔna, agut sinɔ ɓaŋkaawarkiɗɔŋɔŋk, ɛ agut sinɔ beeɗiɗ pɛɛni Waakoyotoŋk iinakɛ takik, ɛ agut sinɔɓa lɔsɛrɗɔ setanik.

¹⁵Kat porɛɛ ɗoo maŋk ola sigɛ atu ɗookuk. Iɗit sinɔ poru ɗook, kɛɛ mɛyin Baabɛɛk sɛɛne tak.

¹⁶Ola sigɛ atu ɗook sineene raŋk baŋɛ, ɗɛyan taaroŋk, a mararɛɛt taamtoŋk, a meri ɛɛkoŋk. Moko sigi kurak sooy lak Baabɛɛ naŋkik, ma kurak ɗook sineene raŋk.

¹⁷Ɗoyurkoy ɗook a ɗɛyan nɛɛk sinɔ ŋɛɛwɛnŋɔŋkuŋ. Mayakana, iɗit sinɔ dusanɛ ɗɛyan Waakoyotoŋkuk, beeɗkoy nɔkoy nɔkoyk.

¹⁸Iinak tɔɔmɔk, wɔɔŋku ɔɔtɛ pedtan ɗookoŋk. Tiyɛɛrɓa sinɛɓa tonɛɛ kɛ, "Mɛlkikoy iɗit sinɔkoy ɓooyu Kereseekiŋ," ŋaararkikɔ sisɔ joop sigɔ ɓooyur Kereseek a ɓɔɔkaaŋ. Agut sini ɗegerii kɛ ege sini sayiti sinɛ pedtank.

¹⁹Ŋaartarɓa sɛɛk eteŋkɛ kɔɔr, mayakana mokoɓa sɛɛk jeemɛ tekaaneer gaŋk. Ɔkɔnɓa sɛɛk tekaaneer gaŋkiŋ, gunɓa ɓaŋkaawurar nɛ beeɗir a eteŋk agut omoŋ. Yakanaɓa pakatir ɛɛk eteŋkɛ kɛnɔ ɗegerɛɛ kɛ mokoɓa sɛɛg tekaaneer gaŋk.

²⁰Yakana iinak ɗonyɛkan kɔnu Kerese Wɛɛŋakɛ sigɔɔgɛ Geetitaanakik, nɛ ɗegerari eekeer gɛɛŋk iinak baŋɛ.

²¹Moko kɔna taapiɗiira agut sinɔ kirɗɔ ɗegerɔɔn eekeerik, ɗegerari sɔɔk eekeeriŋ, agut sinɔ ɗegerari kɛ kɛɛ laŋiiɗ nyon eekeerɛ.

²²Sisɔ nyonkan wooɗ ete sinaanɛ kaadɛ sinɔ kɛ ege Yeese Kereseek sɔgɔɔsɔyk? Ege sɛŋk iɗit sinɔ ɓooyu Kereseek, nɛ kaadɛ Baabɛɛ a Tɔɔn nɛɛkik.

²³Iɗit sinɔ kaadɛ Tɔɔn nɛɛkik, kɛɛ Epɛn sooy lak sɛɛnik. Iɗit sinɔ ŋaadiɗi Toomoy nɛɛkɛkik, ŋaadiɗi Ɛpɛne.

²⁴In kɔne beeɗ a ɓaŋkawuŋ pɛɛni sinɛɓa tiyɛɛr tukik ɓayɛtunɛɛkɛ goŋk. Nɛ iinak ɔkɔn kɔne beeɗ ɓayɛtunɛɛkɛ pɛɛni sinɛɓa tiyɛɛr tukikiŋ, nɛ beeɗiir a Tɔɔn nɛɛk a Ɛpɛn eteŋka.

²⁵Ŋaadiyɛ sigɛɓa tina gaɓɛr wɛɛŋa sigɛkoy nɔkoy nɔkoyk.

²⁶Taapɛɛra kɔna sini agut joop sigɔ kɔnu raaramarŋɔŋk.

²⁷Agut sinɔ atukuɗ Wɛɛŋa sigɛkan boŋiir sɛɛg sooy lak Sɛɛnik iinakɛ takik, ki kɔna ɗɛyɛ rɔɔriytan om. Rɔɔriyar kɔnu sɛɛk olaatɛ baŋɛ, eekeer any sinɛ kɔnu rɔɔriyarɗik, ma moko nyon. Agut sini in beeɗɛɛ Keresee.

²⁸Sisɔ iinak tɔɔmɔk, in beeɗɛɛ Sɛɛne kɛnɔkoy dɛnii a kii ɓuriit saakoy sɛŋk yaaŋɛɛɗ ɛɛkik, ɛkoy kat lakii keeny Ɓeny sinaanɛkoy mɛlkiɗik.

²⁹Ɔkɔn ɗegerari kɛ mentan sɛŋk taamɛkɛ Waakoyotoŋkuŋ, nɛ ɗɛyɛ kɔna a ɗegerari kɛ iɗit sinɛ ijaag any sinɔ mentanŋɔŋkuk baŋɛ sɛɛn tɔɔn Waakoyotoŋk.