Read majang Omoŋ Yowanisik 4 Bible Online

Omoŋ Yowanisik 4 - majang bible

Omoŋ Yowanisik 4

¹Iinak sigɛti poriirik, kat ŋaadɛɛ Wɛɛŋa baŋɛ, ma in mermenɛɛ Wɛɛŋa kɛ Waakoyotoŋk maŋk kɛ moko Waakoyotoŋk, agut sinɔkɔ ŋaararkiɗ ɗook raŋk joop pɛrkaakoŋk sigɔ nyonkaanakik a ɓɔɔkaaŋɔŋk.

²Ɗegerari Wɛɛŋa Waakoyotoŋk ant sineene tonur kɛ kusɓa Yeese Kerese a iɗit taarek. Ege sigi wɛɛŋa Waakoyotoŋk.

³Mayakana, wɛɛŋa sigɛ kir waasɛɛt kɛ kusɓa Yeese Keresee taarek baŋɛ, nɛ moko wɛɛŋa Waakoyotoŋk. Ege sigi wɛɛŋa sigɛɓa tiyɛɛr kɛ mɛlɛrkikoynɔŋɔŋk sigɔ ɓooyur Kereseek, nɛ aasi ɓɛɛlɛr sisɔ ɗook raŋkiŋ.

⁴Iinak tɔɔmɔk gaaŋk, sigɔ tɔɔmɔk Waakoyotoŋk, agut sinɔ kaalɛrɗi wɛɛŋa sigɛ latukarik wɛɛŋa ɗookoŋk baŋɛk, nɛɓa lɔsɛɛr rɔɔriytaanak sigɛ nyonkaanakiŋ.

⁵Ege sɛɛk joop pɛrkaakoŋk sigɔ nyonkaanakik sɛɛg joop ɗoo sinik, nɛ tonur any ɗookoŋk, nɛ ɓɔrɛ sɛɛga tiiɗi ɗookuŋ.

⁶Eteŋk seek Waakoyotoŋk, joop sigɛ ɗegerar Waakoyok baŋɛ nɛ tina tiiɗiŋ, ma joop sigɛ moko Waakoyotoŋk nɛ tina kir tiiɗit. Ɗegerii wɛɛŋa sigɔ eekerkaanakik a sigɔ nyonkaanakik ant sineene.

⁷Iinak sigɛti poriirik, koy mɛyikii ɛkanɛɛkɛ gaŋk agut sinɔ mɛyin sooy lak Waakoyok. Iɗit sinɔ mɛyii a joopuk sɛɛn tɔɔn Waakoyotoŋk ɛ ɗeger Waakoyo.

⁸Iɗit sinɔ kir mɛyiit a joopuk ki ɗegerɔɔn Waakoyo agut sinɔ ege Waakoyot mɛyink.

⁹Wosɛykiɓa Waakoyot Tɔɔn nɛɛk sinɔ Omoŋɔŋk ɗooka kɛnɔ laŋii wɛɛŋa goy nɛɛkɛk. Yaaŋɛɛɓa eteŋka mɛyin Waakoyotoŋk kɛ ɛtɛ ɛk ant sineene.

¹⁰Mɛyin any sinɔ ɓɛɛlɛ oko sinikik, moko agut sinɔɓa poriɗii Waakoyo seekik, maɓa tin poru sɛɛn nɛɓa tina wosɛyki Tɔɔn nɛɛk kɛnɔ tine ranyjɛɛr tikiyɛ gaŋk ɔɔtɛ rer nɛɛkik.

¹¹Iinak sigɛti poriirik, agut sinɔ tin poriiɗ Waakoyot oko sinikik, nɛ tina ɗɛyɛ a poporikii ɛkanɛɛkɛ gaŋkiŋ.

¹²Kɛɛ iɗit sinɔɓa dɛnɛ Waakoyok. Ɔkɔn poporikii ɛkanɛɛkɛ gaŋkiŋ, nɛ beeɗ Waakoyot eteŋkɛ, nɛ ege mɛyin nɛɛkɛ daktan eteŋkɛ.

¹³Ɗegerii kɛ beeɗii Waakoyote maɓɔrɛ sɛŋk beeɗ eteŋkɛ agut sinɔɓa tina gaɓɛɛɗ Wɛɛŋa gɛɛŋkŋɔŋk.

¹⁴Dɛniiɓa ɛ waasii kɛ wosɛykiɓa Ɛpɛna Tɔɔn nɛɛk a Ebɔdtan ɗookoŋkuŋ.

¹⁵Iɗit sinɔ ɗeger kɛ ege Yeese Tɔɔn Waakoyotoŋkuk beeɗ Waakoyot sɛɛne, maɓɔrɛ sɛŋk beeɗ Waakoyote.

¹⁶Agut sini ɗegerii ɛ ŋaadii mɛyin sinɛ tina lak Waakoyotuk. Ege Waakoyot mɛyin. Iɗit sinɔ beeɗ mɛyink, beeɗ Waakoyote, maɓɔrɛ Waakoyot beeɗ sɛɛne.

¹⁷Saa ege mɛyin naŋk daktank, nɛ lakii ŋaadiyɛ sigɔ enyaaŋɔŋk kɛnɔkoy wideerii ɛɛk taamɛka gɛɛna a kii ɓuriit Ɓeny sinaanɛkoy Pirdiyoŋk, agut sinɔ beeɗiɗii ɗook sineene oko sinɛ beeɗiɗ Yeeseek.

¹⁸Mɛyin sinɔ daktank boŋiir ɓɔɔjikeen nɛ oruŋ. Mayakana kɛɛ mɛyin tuɓur ara agut sinɔ gaagamiiɗ ɓɔɔjikent a goopanik[3]. Iɗit sinɔ ɓuriŋɔŋk moko mɛyin nɛɛkɛ daktan.

¹⁹Nɛ porii Waakoyoŋ, agut sinɔɓa tin poriiɗ sɛŋk jeemɛk.

²⁰Iɗit sinɔ tonu kɛ pora Waakoyo, ma ɓooyu manyaak nɛ sɛɛn nyonkan, agut sinɔ kiiɗ poriiɗ manya sinɛ dɛnɛkiŋ ki oolɛ a poru Waakoyo sinɛ ki taantakiŋ.

²¹Agut sini sekiyɛ sigɛɓa tina gaɓɛ Kereseek sigɔ kɛ'' Iɗit sinɔ poru Waakoyok, in ɓɔrɛ poru manya."