Read majang Omoŋ Yowanisik 5 Bible Online

Omoŋ Yowanisik 5 - majang bible

Omoŋ Yowanisik 5

¹Iɗit sinɔ ŋaadi kɛ ege Yeese Kereseek[4], nɛ sɛɛn tɔɔn Waakoyotoŋk. Iɗit sinɔ poru Ɛpɛnik nɛ ɓɔrɛ poru Tɔɔn nɛɛkiŋ.

²Nɔ ɗegerɗii kɛ porii tɔɔmɔk Waakoyotoŋkuk, saa poriɗii Waakoyok, ɛ saa dusanɛɛɗii sekiyɛ gɛɛŋkik.

³Saa kɛ porɛɛ Waakoyokuk saa eemɛyɗɛ sekiyɛ gɛɛŋkik. Kir ooɗit sekiyɛ gɛɛnɛk.

⁴Agut sinɔ tɔɔmɔk Waakoyotoŋk baŋɛ lɔsɛr ijaag ɗookoŋkŋɔŋk. Lɔsii ijaag ɗookoŋk ŋaadiyɛɛkɛ gaŋk.

⁵Wooɗ sinɛ lɔsɛ ijaag ɗookoŋkuk? Lɔsiɗi iɗit sinɔ ŋaadi kɛ ege Yeese Tɔɔn Waakoyotoŋk dakɛɗak.

⁶Ege sinɛɓa kurak a maawu a yɛromk Yeese Keresee sini, kurakɓa sɛŋk a maawu a yɛrom ma mokoɓa maawɛ dakɛɗa, waasiɗi eekeer gɛɛŋk Wɛɛŋa, ege Wɛɛŋak eekerkaanak.

⁷Lak ola sigɔ waasɛr sɛɛnŋɔŋk a jiit,

⁸nɛ sɛɛg Wɛɛŋa a maawu a yɛrom. Sigi jiitik mɛyii waasiyɛɛkɛɛŋ.

⁹Boŋii seek waasi sinɛ gaɓɛr joop, mayakana waasiyɛ Waakoyotoŋk kaalɗiŋ, agut sinɔ waasi Waakoyotoŋk sinɛɓa gaɓɛ agut Tɔɔn nɛɛkik sɛɛn sini.

¹⁰Iɗit sinɛ ŋaadiɗi Toomoy Waakoyotoŋk lak waasi sini ɓayaay nɛɛkɛk. Mayakana iɗit sinɛ ki ŋaadit Waakoyok ari sɛɛn a nyonkan. Agut sinɔ kiiɗ ŋaadit waasi Waakoyotoŋk sinɛɓa gaɓɛ agut Tɔɔn nɛɛkik.

¹¹Ege sini waasi nɛɛk sinɛɓa tina gaɓɛɛɗ Waakoyot wɛɛŋa sigɛkoy nɔkoy nɔkoyk, wɛɛŋa sigi atu Toomoy nɛɛkɛk.

¹²Iɗit sinɛ lak Tɔɔn nɛɛkik nɛ lak wɛɛŋa sigi. Ma iɗit sinɛ kiiɗɛ Tɔɔn Waakoyotoŋkuk nɛ kiiɗɛ wɛɛŋa sigɛ koy nɔkoy nɔkoyk.

¹³Iinak joop sigɛ ŋaadiɗikari tiriyaakɛ Tɔɔn Waakoyotoŋkuk, taapɛɛra kɔna kɛnɔ ɗegerar kɛ latukari wɛɛŋa sigɛkoy nɔkoy nɔkoyk.

¹⁴Eteŋk eekerkaanak sinɔɔna kɛ kɛygun jikon gaɓɛkɔɔ tinaŋɔŋk, ɔkɔn kalɛyii sɛɛn oko koɓi nɛɛkiŋ. Nɛ lakii diirikeen taamɛkɛ gɛɛnɛ agut sini.

¹⁵Ɔkɔn ɗegerii kɛ tiyɛ tina any sinɛ kalɛyiɗiikiŋ, nɛ eteŋk eekerkaanak sinɔɔnɛ kɛ gaɓɛkɔɔ tina any sinɛ kalɛyiɗiik baŋɛŋ.

¹⁶Kɛygun wooɗ ɔkɔn dɛnɛ manya a ijaag tikiyɛ sigɔ kir dilɗiit retaakiŋ[5], nɛ in ɗanɗamaageeɗ. Iɗit sinɛ ɔkɔn tikiyɛ gɛɛnɛ kir dilɗiit retaaŋ, nɛ Waakoyot gageeɗ wɛɛŋa. Mayakana lakɛ tikiyɛ sigɔ dilɗi retaakiŋ. Nɛ kaa toniiɗ kɛ in ɗanɗamaakɛɛ tikiyɛɛka sigɔɔga ito sigik.

¹⁷Ijaag sinɔ ŋɛɛwɛnŋɔŋk baŋɛ tikiyɛ, ma lakɛ tikiyɛ sigɔ kir dilɗiit retaakiŋ.

¹⁸Ɗegerii iɗit sinɔ sɛɛn tɔɔn Waakoyotoŋkuk kɛ kɛɛ sɛɛne barɛ sinɔ ijaagiiɗ tikiyɛɛk, agut sinɔ sɛɛn koorɛɛɗ Tɔn Waakoyotoŋkŋɔŋk, ki ɓɔrɛ sɛɛn setan oolɛ.

¹⁹Ɗegerii kɛ eteŋk tɔɔmɔk Waakoyotoŋk, ma ɗoo baŋɛ ar ikomiit setanik.

²⁰Ɛɓɔre ɗegerii kɛ kusɓa Tɔn Waakoyotoŋk nɛ tina gaɓɛ ɓayɛ sinɔ koɓiiŋɔŋk kɛnɔ beeɗii Yeese Keresee sineene eekerkank. Sisɔ arkii Waakoyote, agut sinɔ arkiɗ Toomoy nɛɛkɛ Yeese Keresee. Sɛɛn Waakoyo sinɔ eekerkank, ɛ sɛɛn Wɛɛŋa sigɛkoy nɔkoy nɔkoyk.

²¹Iinak tɔɔmɔk gaaŋk, in koorɛɛ ɛɛk jookakɛ sigɔɔgɛ nyonkaanakik.