Read majang Dɛnɛɛ Pɛrka Yowanisik 1 Bible Online

Dɛnɛɛ Pɛrka Yowanisik 1 - majang bible

Dɛnɛɛ Pɛrka Yowanisik 1

¹Ege sini wargatɛ sinɔ yaaŋɗi agut any sinɛɓa ɓuukiɗi Yeese Kereseya sinɛɓa gageeɗ Waakoyotuk, kɛnɔ yaaŋɛ any sinɛkɔɔ ɓɛɛlɛ kɛ gonyuŋɔŋk ijaageera Gɛɛnaak. Ijaagɓa any sini Kerese kɛnɔ ɗeger ijaagen nɛɛkɛ Yowanis a wosɛyki wosɛytan nɛɛk sɛɛna,

²ɛkan Yowanis tonu ola sigɛkan dɛnɛ sɛɛgik baŋɛ. Ege sigi taapiyɛ sigɔ tonɗi wosɛ sinɔɔnɛ kus sooy lak Waakoyok ɛ agut eekeer sigɛɓa rɔɔriyaad Yeese Kereseek.

³Geetitan iɗit sinɔ ambabɛ pɛɛni nɛɛk sini pɛrkaakoŋk, ɛ geetitaanak joop sigɛ tiyɛr ɛ koorɛr any sinɛɓa taapɛɛkik, agut sinɔ wɔɔŋku eme nɛɛkɛkiŋ.

⁴Ege sini wargatɛ sinɔ taapiɗiira eet Yowanis, godeyika Sambatɛyɛɛkoŋk sigaaga tula pɛɛyk atu Isiyaakek, in kɔna dakɛ a wookan a bɔdɛ sooy lak Waakoyok sinaanɛ ɓɛɛlɛk, a sinaanɛɓa ɓɛɛlɛk, ɛkoy mɛlkik, a wɛɛŋakɛ sigaagɛ tula pɛɛyk[1] sigaagɛ atu barsum nɛɛkɛ taamɛkɛk,

⁵a Yeese Keresee sinaanɛ waasigiɗɛɛ eekeerik, sinɛ tekaayan reteerɛɛk, a sinɛ ɓali suumiyɛ ɗookoŋkuk. Sɛɛna sinaana tin poruk ɛɓa tin boŋku tikiyɛɛkɛ gaŋk yaakata yɛrom nɛɛkɛkik

⁶ɛɓa tin ari a suumiyɛ a ɔɗɔweer tapa ŋaadiyɛɛkoŋk Waakoyota Ɛpɛna, in dakɛ eemɛyɔɔn a ɓaŋkawuka sɛɛna nɔkoy nɔkoyk. Ameen.

⁷Dɛnko, mɛlkikoy sɛŋk tiimanakɛ, dɛnɛrkoy taamɛ joop baŋɛk akoy aasi kir dakɛ joop sigɛɓa muker sɛɛnik, ɛkoy duriyer joop ɗookoŋk baŋɛ agut sɛɛn. Ɓɛɛlɛkoy sini eekeerɛ. Ameen.

⁸Tonu Suumii Waakoyot sinɛ ɓɛɛlɛ, ɛɓa ɓɛɛlɛk, ɛkoy mɛlkik, sinɛ Oolɛ ola Baŋɛk kɛ, "Eet sinɛ Alpaa ɛ Omeegaak[2]."

⁹Eet masookoy noŋk Yowanis, sinɛ eet kaastan rakatɛ nɛɛk a burɛ nɛɛk, a ɓaŋkaawurɔn oolaanik Yeese Kereseek a iinak agut omoŋ, arkaakan asuulɛɛ sinɔɔnɛkan riyɛ kɛ Pitmook agut Pɛɛni Waakoyotoŋk a waasiyɛ Yeeseek.

¹⁰Arkaakan Ɓɛɛnyɔ Suumiyoŋk Wɛɛŋakɛ. Nɛkan tiya baŋi naakɛ koŋgoy sinɔ obiiŋɔŋk a ito luuriyɔŋkuk,

¹¹tonukanta koŋgoy nɛɛkɛ kɛ, "Taapu any sinɛ dɛnink wargatɛya nɔ wosɛyin godeyika Sambatɛyɛɛkoŋk sigaaga tula pɛɛyk atu Isiyaakek, Epesoona, Sɛmirnesa, Pergamoona, Tiyatiroona, Sɛrdesa, Piladɛlpiyaa, a Lodokiyaa."

¹²Nɛkan weera ɛɛk kɛnɔ dɛna koŋgoy sinɛta tonɗiik. Saakan weerɛɗa ɛɛkik, nɛkan dɛna ola sigɔ riiɓeeɗɛɛ ɗaawank sigɔɓa ijaagɛɛ workeek a tula pɛɛy,

¹³a iɗit sinɔ gayi a tɔɔn etoŋkuk sinɔ ar sɛɛge kɔɔr, a lak abii sinɔ mɛlɛ deraka gɛɛnaakik, ɛɓɔrɛ lak kokom nɛɛkɛ teeɓɛ workeyoŋk.

¹⁴Tupeenyɓa ɔɗɔ nɛɛkɛ a ami gɛɛnɛ a ito walak, ɛ ito malwan, ɛɓa ɗaawur taamɛ gɛɛnɛ a ito maɗ.

¹⁵Ɛɓa nyaalɛr derak gɛɛnɛ a ito awɛ sinɔ lorɛ maɗik, ɛɓa ɗooru koŋgoy nɛɛkɛ a ito uruur sinɔ ɓaŋkawuŋɔŋk.

¹⁶Lakɓa ariit nɛɛkɛ goysa ɗiɗikik maryɔ a tula pɛɛy, ɛɓa ŋaarki ad nɛɛkɛ aarɛ sinɔ ɗɔmu gɔɔ baŋɛk. Ɛɓa nyaalɛr taamɛ gɛɛnɛ a ito waawuy.

¹⁷Saakan dɛnɛɗaak, nɛkan ɗiirira deraka gɛɛnaak a ito eet iɗit sinɔkan rɛrŋɔŋk. Nɛkante riiɓe ari nɛɛk gɔɔ sinɛ ɗiɗikik nɛta tonu kɛ, "Kat ɓuriikin, Eet sinɛkan tukik ɛ sinɛkoy pediyaak,

¹⁸ɛ Eet bɔdtank makan rɛɛrkaayaŋ, nɛ dɛnko Eetɓɔ bɔdtan nɔkoy nɔkoyk. Laka kulpiyɛ retoŋk a siiooluk ariit naakɛk.

¹⁹Nɛ agut sini taapu ola sigɛkɔ dɛnink, sigɛ ɓɛɛlɛr sisɔk a sigɛkɔɔ baŋiyaak.

²⁰Any sinɛ dugaaŋɔŋk wooran nɛɛk sɛɛn sini, maryɔ sigɔ tula pɛɛyk sigɛkɔ dɛnink sɛɛg ariit naakɛ goyse ɗiɗikik, a ola sigɔ riiɓeeɗɛɛ ɗaawank sigɔ tula pɛɛyk sigɔɓa ijaagɛɛ workeek. Maryɔ sigɛ tula pɛɛyk wosɛytaanak Waakoyotoŋk godeyi Sambatɛyɛɛkoŋk sigɔ tula pɛɛyk, a ola sigɔ riiɓeeɗɛɛ ɗaawank tula pɛɛyk godeyi Sambatɛyɛɛkoŋk sigɔ tula pɛɛyk."