Read majang Dɛnɛɛ Pɛrka Yowanisik 11 Bible Online

Dɛnɛɛ Pɛrka Yowanisik 11 - majang bible

Dɛnɛɛ Pɛrka Yowanisik 11

¹Nɛ saadi baŋiya gaɓɛɛta sombal sinɔ ito kɛɛt rɔmɛɛɗoŋk nɛta tonɛɛ kɛ, "Mak nɔ kɛɛɗin rɔmun Gode sinɛ Geetitank Waakoyotoŋk a nyon sinɛ uduŋeetoŋk, ɛ ikomun joop sigɛ ugumer saadik.

²Mayakana kat kɛɛɗin rɔmun teete Gode sinɛ Geetitank, agut sinɔ gaɓɛɛkan joopa sigɔɔga moko Ayuuduk. Nɛkoy torokur katamɛ sinɛ Geetitank a ɛyɛkeer pɔlpɔlɛ joop pɛɛyk a pɛɛy.

³Ɛkoy gaɓa ɓaŋkawuka joopa gaanak sigɔɔga pɛɛyk waasɛr eekeer gɛɛŋkik nɛkoy kadir abiyak wuɗakoŋk, nɛ tonur pɛrka a ɗoŋ kumɛ omoŋ a ɗibɛɛ pɛɛy a pɔlpɔlɛ joop jiitik."

⁴Ege sigi yuuyayɛ sigɔ pɛɛyk a ola sigɔ riiɓeeɗɛɛ ɗaawank pɛɛyk sigɛ ɛtɛr taamɛkɛ Suumi ɗoo sinik.

⁵Ɔkɔn lakɛ iɗit sinɔ ɗɛykɛ a sɔɔkɛ sɛɛgŋɔŋkuŋ, nɛ ŋaarki maɗ atutunɛ gɛŋk nɛ moɗɛ gumaakeer gɛŋk. Ɔkɔn lakɛ iɗit sinɔ ɗɛykɛ a sɔɔkɛ sɛɛgŋɔŋkuŋ, nɛ ɗɛygeeɗ a ɓokotɛɛ sɛɛniŋ.

⁶Latu joop sigɛ pɛɛyk ɓaŋkawuka sinɔ korurɗu darik kɛnɔ kat ɛɛkɛ tul ɔɔtɛ sinaanɛ tonurɗu pɛrkaak, ɛ latu ɓaŋkawuka sinɔ weerɛrɗi mawun a yɛromk, ɛ latu ɓaŋkawuka sinɔ malɛrɗi ɗoo rakatɛyɛɛkɛ sigɔɔgɛ boobɛrŋɔŋk baŋɛ oko sinɛ aasi ɗɛyɛrɗik.

⁷Saakoy dusanɛrɗi waasiyɛ wosɛ nɛŋkik, nɛkoy ŋaarki keegun utul sinaanɛ kiidɛ sukuk, nɛ tim sɛɛgiŋ ɛ lɔsɛ sɛɛg ɛ ɓokor sɛɛg.

⁸Ɛkoy orɛɛ buusɛɛ gɛŋk sinɔɔnɛ gopak katamɛɛ sigɛ boobɛrk sigɛ riyɛ rɔmɛɛɗ kɛ Sɛdoom a Gibs sigɛkan ɓɔrɛ laalawuɗɛɛ Suumi nɛŋkik.

⁹Joop sigɛɓa ŋaaŋararki joopek, a komoyeerɛk, a atutunɛɛkɛk, a joope ɗokanɛɛkoŋk baŋɛ mermenarkoy buusɛɛ gɛŋk ɗoŋiika sigɔɔga jiitik a walakɛk, nɛkoy ɓaarii sɛɛge a kɛɛ diilɛ buusɛɛ gɛŋk tɔkɔwa.

¹⁰Ɛkoy yaa joopa sigaaga beeɗir ɗook raŋkik ret nɛŋk ɛkoy gagaɓar tigiyak ɛkanɛɛkɛ gɛŋk agut yaakatak gɛŋk, agut sinɔ joop sigi pɛɛyk pɛrkaakoŋk ooɗɛrkan joop sigɛ beeɗir ɗook raŋk.

¹¹Yakana ɗoŋiikɛ sigaagɛ jiitik a walakɛk baŋiya kuskan yiipo wɛɛŋakoŋk sooy lak Waakoyok nɛ guuguny sɛɛgaŋ, nɛkan ɛtɛrŋ, nɛkan ɓuri jɛt joop baŋɛ sigɛkan dɛnɛr sɛɛgik.

¹²Nɛkan tiyɛr koŋgoy sinɔ ɗooruŋɔŋk dari a tonu sɛɛga kɛ, "In kusɛɛ sen rakaaya." Nɛkan ŋaarar dariya tiimanakɛ a dɛnɛr sɛɛg gumaaker gɛŋkiŋ.

¹³Ɔɔtɛ sinaanɛkank lakɛkan yike ɗookoŋk sinɔ obiiŋɔŋk ɛkan aalɗi katamɛ nɛɛkɛ sigɔɔgɛ aarin sinɔ omoŋɔŋk. Nɛkan rɛrar joop a kumɛɛ tula pɛɛy yikeeɗ sinaanɛ ɗookoŋk, makan ɓuri joop sigɛkan ŋayɗiikkiŋ nɛkan gaɓɛr eemɛyɔn Waakoyota dariyoŋk.

¹⁴Ɗoyukan duri pɛɛyeen nɛɛkɛkiŋ, dɛnko, duri jiiteen nɛɛk mɛlkikɔɔ kɛ gonyuŋ.

¹⁵Gotɛkan wosɛytan Waakoyotoŋk tula pɛɛyeen nɛɛkɛ luuri nɛɛk, nɛkan tiyɛ koŋgoyiik sigɔ ɗoorurŋɔŋk dari a tonur kɛ, "Dakɛkan burɛ ɗookoŋk a burɛ Suumi Waakoyo naŋkik ɛ Kereseek, ɛkoy tapaaɗaani nɔkoy nɔkoyk."

¹⁶Gutarɛyɛ sigɛ ruumer iɗit a aŋank sigɛkan dokurɗe barsumatɔkɛ gɛŋk taamɛkɛ Waakoyotoŋk supkerkan tɛpɛɛnakɛ gɛŋk ɗoo nɛ ugumer Waakoyota,

¹⁷a tonur kɛ, "Gaɓii pɔɔsiyɛ iina Suumiya Joohka sinaana Oolɛ ola baŋɛk, iin sinɛ ɓɛɛlin ɛɓa ɓɛɛlink, agut sinɔ boŋunkan ɓaŋkawuka sinɔ obiiŋɔŋk, ɛkan tukun tapaaɗaan.

¹⁸Ŋadirkan joop ɗookoŋk, nɛkɔ ɓɔrɛ mɛlki ŋadi nookɛŋ. Mɛlkikan ɔɔtɛ sinɔ goopɗɛɛ reteerk, a sinɔ koyɗiiɗɛɛ laaŋoyeera goonaak a joopa pɛrkaakoŋkuk, a joopa goonaak, a joopa sigaaga ɓurer iinik sigaaga temetuk a sigaaga boobɛrk, a sinɔ sɔɔkɛɛɗɛɛ joop sigɛkan sɔɔsɔkar ɗook.

¹⁹Nɛkan tayɛɛ Gode sinɛ Geetitank Waakoyotoŋk sinɛ ar darik, ɛkan dɛnɛɛ sanduk kuumeetoŋk Godeey sinaanɛ Geetitank tak. Ɛkan lakɛ nyaalan, a koŋgoy, a tɛɓɛr, a yike ɗookoŋk, a malwan sinɔ obiiŋɔŋk.