Read majang Dɛnɛɛ Pɛrka Yowanisik 12 Bible Online

Dɛnɛɛ Pɛrka Yowanisik 12 - majang bible

Dɛnɛɛ Pɛrka Yowanisik 12

¹Ɛkan dɛnɛɛ yaaŋtan sinɔ obi a reemɗigeeɗ ɓayaayik dari, jarti sinɔkan miinyɗi waawuyk, makan riiɓe derak gɛɛŋk eye raŋk, makan riiɓe aɗoy nɛɛkɛ dooroy maryɔ sigɔ aarin a pɛɛyk.

²Lakikan sɛŋk amɗ ɛkan bandurŋ a meegeeɗ a reŋɛ kɛnɔ ɓartɛɗ.

³Ɛkan dɛnɛɛ yaaŋtan om dari. Sinɛkan dɛnɛɛk wilaŋ sinɔ boobɛŋɔŋk dɛɛŋɔŋk sinɔ lak ɔɗɔɔk a tula pɛɛy a kolbɛɛ a aarin, ɛ lak ɔɗɔɔkɛ gɛɛnɛ raŋk doroyk eemɛyɔɔnoŋk a tula pɛɛy.

⁴Nɛkan puruutuk sɔɔs nɛɛkɛ maryɔ dariyoŋk sigɔɔgɛ jiitik a omoŋ nɛkan orku sɛɛg ɗooka. Ɛkan ɛtɛ wilaŋ sinɛ jartii sinaanɛ ɗɛyɛ ɓartɛɛtik taamɛkɛ, kɛnɔgun ɗam tɔɔn nɛɛk saa ɓartɛɛɗik.

⁵Ɓartɛkan tɔɔn sinɔ mooyk kɛnɔ ɓali joop ɗookoŋk baŋɛ baŋkawukaat sinɔɔnɛ obiiŋɔŋk, yakanakan boŋiiɗɛɛ tɔɔn nɛɛk son lak Waakoyok a barsuma nɛɛkaak.

⁶Nɛkan ɓɔrɛ pire jarti sinɛ paatoona, soonaɓa ragadgeeɗ Waakoyotuk kɛnɔ kɛɛɗɛ aawoyɛɛ sɛɛn a ɗoŋ kumɛ omoŋ a ɗibɛɛ pɛɛy a pɔlpɔlɛ joop jiitik.

⁷Nɛkan lakɛ kaarin dari. Timaaki Mikaeel sɛɛn a wosɛytaanak gɛɛŋk, maɓɔrɛ timaaki wilaŋ sinɛ sɛɛn a wosɛytaanak gɛɛŋk.

⁸Yakanakan lɔsɛɛ wilaŋ nɛɛk a wosɛytaanak gɛɛŋk, nɛkan saadi baŋiya kɛɛ sɛɛga laŋiiɗ nyon dari.

⁹Ɛkan orkɛɛ ɗooka wilaŋ sinɛ boobɛŋɔŋk. Sɛɛn kooko sinɛɓa ɗeeŋk sinɛ riyɛ kɛ diyabiloos maŋk setank, sɛɛn sinɛɓa ari joop ɗookoŋk a babadarŋɔŋk, orkɛɛɓa ɓɔrɛ wosɛytaanak gɛɛŋk a sɛɛn agut omoŋ.

¹⁰Nɛkan tiya koŋgoy sinɔ ɗooruŋɔŋk dari a tonu kɛ, "Sisɔ mɛlkikan ebɔdɛɛt a ɓaŋkawuka a burɛ Waakoyo naŋkik, ɛɓɔrɛ ɔɗɔwikent dakɛ a Kereseek, agut sinɔ orkɛɛkan ɗooka iɗit sinɛkan daririiy manyaakaka eteŋkaak, sinɛkan daririiy sɛɛga waawuy a kaay taamɛkɛ Waakoyo naŋkik.

¹¹Ɛkan lɔsɛr sɛɛn yɛrom jiŋkuy sinɛk a pɛɛnii eekeer sigɛkan waasɛrk, nɛkan aasi kir ɓuriit wɛɛŋakɛ gɛŋk mɛɛlɛɛɗa reta.

¹²Agut sini in kɔna yaa, iin dari a ola sigɛ atu iinek. Mayakana duri iinaka ɗooka a gɔrɔwa sinaana obiiŋɔŋk, agut sinɔ kɔrukan kɔna diyabiloos ŋadiiɗ sinɔɔnɛ obiiŋɔŋk. Ɗeger sɛŋk kɛ ŋayɗiɓɔ sɛɛne ɔɔtɛ sinɔ balaaŋɔŋk.

¹³Saakan dɛnɛɛɗ wilaŋ sinɛ a kan sɛɛn orkɛɛ ɗookak, nɛkan epay jarti sinɛkan ɓartɛ tɔɔn sinɛ mooyk.

¹⁴Yakanakan gaɓɛɛ jartiya sinaana tɔɓɔyɔ a pɛɛy sagi sinɔ boobɛŋɔŋk kɛnɔ pire paatoona, nyona sinaanakan ragadgiɗɛɛk, nɛkan aawoyɛɛ sɛɛn saadi a emeyi jiit a walakɛ nɛkan beeɗ a yowɛɛɗir wilaŋ nɛɛkɛŋ.

¹⁵Nɛkan wilaŋ sinɛ puwuku maawu ad nɛɛkɛk sigɔ ito gɔrɔk jartii sinaanɛ baŋi kɛnɔ diiler sɛɛn maawu sigɛ ɓɔɔkaaŋɔŋk.

¹⁶Yakanakan kɔnyɛ ɗook jarti sinɛ, ɛkan tayɛ ato kɛnɔ lokoosɛ gɔrɔ sinɛkan puwuku setan sinɛ ad nɛɛkɛk.

¹⁷Nɛkan ŋadi wilaŋ sinɛ jɛt jartiya sinaana, nɛkan ŋaar nɔ kaar tima a komoy nɛɛk sigɛkan ŋayɗiikik, sigɛkan kookorar sekiyɛ Waakoyotoŋkuk ɛkan waawasar eekeer Yeeseek.

¹⁸Ɛkan kɛɛ ɛtɛ wilaŋ nɛɛkɛ keewet sinaanɛ ar goroo sinaanɛ obiiŋɔŋk.