Read majang Dɛnɛɛ Pɛrka Yowanisik 13 Bible Online

Dɛnɛɛ Pɛrka Yowanisik 13 - majang bible

Dɛnɛɛ Pɛrka Yowanisik 13

¹Dɛnaakan keegun om a ŋaarki walasa goroo sinɔɔnɛ obiiŋɔŋk. Nɛkan lak kolbɛɛ a aarin a ɔɗɔɔk a tula pɛɛy, nɛ lak doroyk eemɛyɔɔnoŋk a aarin kolbɛɛkɛ gɛɛnɛ raŋk, ɛ lak tiriya nyɔɔnakoŋk ɔɗɔɔkɛ gɛɛnɛ raŋk a omoŋ omoŋ.

²Keegun sinɛkan dɛnaak gayi a dɔmɔn, ma gayi derak gɛɛnɛ a keegun sinɔ kɛ dibik, ma gayi ato nɛɛkɛ a ɗɛpɛyoŋk. Nɛkan gageeɗ wilaŋ sinɛ ɓaŋkawuka nɛɛk a barsum nɛɛk a ɔɗɔwikeen sinɔ obiiŋɔŋk.

³Gayikan ɔɗɔɔk gɛɛnɛ sinɔ omoŋɔŋk a lak doosoy sinɔ rɛɛrɛŋɔŋk, yakanakanɓɔ aaɗorŋ doosoy sinɛ rɛɛrɛŋɔŋkuŋ. Nɛkan reemɗi ɓayɛtun joop ɗookoŋk baŋɛ nɛkan nomɛr keegunt sinaanɛ.

⁴Nɛkan ugumer joop baŋɛ wilaŋa sinaana, agut sinɔkan gaɓɛɛɗ ɔɗɔwikeen nɛɛk keegunta sinaanak, ɛ ugumer keegunta nɛɛka a tonur kɛ, "Wooɗ sinɛ gayi a keegun sinɛk ɛ wooɗ sinɛ oolɛ a kaarar a sɛɛnik?"

⁵Nɛkan gaɓɛɛ keegunta sinaana ato sinɔ tonɗiiɗ a ɓɔŋgɔɔrɛ ɛɛk rakaayak a pɛɛniyɛ nyɔɔnakoŋk, ɛ kan pɛgɛdgiɗɛɛ kɛnɔ lak ɓaŋkawuka a ɛyɛkeer pɔlpɔlɛ joop pɛɛyk a pɛɛy.

⁶Tayɛkan ato nɛɛk kɛnɔ nyɔɔn Waakoyo, ɛ nyɔɔn tiriya gɛɛŋk a nyon sinɛ beeberɗik a joop baŋɛ sigɛ beeɗir darik.

⁷Ɛ kan ɓɔrɛ pɛgɛdgiɗɛɛ kɛnɔ kaarar a joop Waakoyotoŋk ɛ lɔsɛ sɛɛg, ɛ kan gagiɗɛɛ ɔɗɔwikeen tuukaanakɛ baŋɛ, a joope baŋɛ, a atutunɛ baŋɛ, a joope ɗokanɛɛkoŋk baŋɛ.

⁸Ɛ koy ugumer joop sigɛ beeɗir ɗook raŋk baŋɛ keegunta nɛɛka. Ege sigi joop baŋɛ sigɛkan kɛɛ taapɛɛt tiriya gɛŋk Wargatɛya Wɛɛŋakoŋk Jiŋkuy sinɛɓa ŋɔɔlɛɛk a tukiɗi saaɓa riiɓeeɗɛɛ ɗook.

⁹Ɔkɔn lakɛ iɗit sinɔ lak weena sinɔ tiiɗiŋɔŋkuŋ, nɛ in tiyɛɗ.

¹⁰Ɔkɔn lakɛ iɗit sinɔkoy diilɛɛŋɔŋkuŋ, nɛkoy diilɛɛŋ. Ɔkɔn lakɛ iɗit sinɔkoy ɓokotɛɛ aarɛɛkiŋ, nɛkoy ɓokotɛɛ aarɛɛ. Agut sini ɗɛyɛ joopa Waakoyotoŋk ɓaŋkaawurɔn oolaanik a ŋaadiyɛ.

¹¹Nɛkan dɛna keegun om sinɔ ŋaarki ɗookuk. Nɛkan lak kolbɛɛ a pɛɛy sigɔ gayi a jiŋkuyoŋkuk, ɛkan tonɗi oko wilaŋoŋk.

¹²Ijaagkan ola baŋɛ tiriyaakɛ keegun sinɛkan tukik, nɛkan ari ɗoo a ola sigɛ beeɗir sɛɛne takik kɛnɔ ugumer keegunta sinaanakan tukik, sinaanakan bɔduku doosoy sinɔɔnɛ rɛɛrɛŋɔŋk.

¹³Nɛkan sɛŋk ijaag sɔɔriyɛ sigɔ boobɛrŋɔŋk, joope gɛɛnɛ taamɛkɛ a aasi ari a ɗirki maɗ dari ɗooka.

¹⁴Agut sinɔkan gagiɗɛɛ ɓaŋkawuka kɛnɔ ijaag sɔɔriyɛ tiriyaakɛ keegun sinɛkan tukik, nɛkan ari a babadar joop sigɛ beeɗir ɗook raŋk. Nɛkan tonu sɛɛga kɛnɔ ruker tagaytan keegunta, sinaanakan ɗam aarɛɛk nɔkan bɔdukuk.

¹⁵Gaɓɛɛkan keegunta pɛɛyeena nɛɛka ɓaŋkawuka, kɛnɔ gaɓɛ yiipo wɛɛŋakoŋk tagaytaana keegun sinɛɓa tukik, kɛnɔ oolɛ a ari a tonɗi tagaytan nɛɛkɛ, ɛ kɛnɔ ɓokootɛɛ sigɛ kir ugumeet tagaytaana nɛɛkaakik baŋɛ.

¹⁶Ɛ ɓɔrɛ remɛ joopa sigaaga temetuk a sigaaga boobɛrk, a worikaanaka a sankaanak, a joopa baŋɛ sigaaga atu yaakatik a laaŋoyeera, kɛnɔ arɛɛ yaaŋtaanak arna gɛŋk gɔɔtaase ɗiɗikik maŋk tɛpɛɛnaka gɛŋk,

¹⁷kɛnɔ kat oolɛ a ɓalɗi maŋk ɓaliiɗɛɛ any, ete sinaanɛ kiiɗɛ yaaŋtan tiriya keegun nɛɛkik, maŋk ikomiit tiriya gɛɛŋkik.

¹⁸Ɗɛyɛ sineena ɗegerɔn ɛɛkoŋk kɛnɔ ɗegerɗɛɛ sinik. Iɗit sinɛ lak ɗegerɔnk in ikomu ikomiit keegun sinɛk, agut sinɔ ege ikomiit nɛɛkɛ ikomiit etoŋk. Ege ikomiit nɛɛkɛ ɗibɛɛ tula om a pɔlpɔlɛ joop jiitik a tula om.