Read majang Dɛnɛɛ Pɛrka Yowanisik 14 Bible Online

Dɛnɛɛ Pɛrka Yowanisik 14 - majang bible

Dɛnɛɛ Pɛrka Yowanisik 14

¹Seedi baŋiya mermenaakakan nɛ dɛna jiŋkuy nɛɛk a ɛtɛtɛr kurkum Siyoonuk raŋk, a sɛɛn a joop sigɛ kumɛɛ ɗibɛ omoŋ a pɔlpɔlɛ joop pɛɛyk a aŋank, sigɛɓa sɛɛge taapɛɛ tiriya gɛɛŋk a tiriya Ɛpɛnaak tɛpɛɛnakɛ gɛŋkik.

²Ɛkan tiya koŋgoy dari sinɔ ito uruur sinɔ ɗooru a ɓangkawuŋɔŋk, a ito tɛɓɛr sinɔ obiiŋɔŋk. Ito koŋgoy sinɛkan tiyaak soŋguy sinɔ soŋguyer sɔŋguytaanak.

³Joop sigɛ kumɛɛ ɗibɛ omoŋ a pɔlpɔlɛ joop pɛɛyk a aŋank, iiliyarkan iiliya sigɔ tɔɔmɔkuk barsum nɛɛkɛ, a keegukɛ sigaagɛ latu wɛɛŋak aŋank a gutarɛyɛɛkɛ taamɛkɛ. Kɛɛ iɗit sinɔkan oolɛ a barɛ iiliya sigik, joope sigaagɛkan bɔdɛr ɗookuk sigaagɛ kumɛɛ ɗibɛ omoŋ a pɔlpɔlɛ joop pɛɛyk a aŋank sɔgɔɔsɔyk.

⁴Ege sigi joop sigɔkan kir ariiɗ ɛkan gɛŋk a somkaanak ɗeegarɔɔn a peetakik, agut sinɔ koorɛrkan sɛɛk ɛkan gɛŋk a mentaanaŋ. Nomɛrɗikan sɛɛk Jiŋkuy nɛɛk saana kegeeɗik baŋɛ. Sɛɛg joop sigɔkan bɔdɛr joope kɔɔr kɛnɔ dakɛr a tigi sinɔ pakattank Waakoyota a Jiŋkuya nɛɛkaak.

⁵Kirkan sɛɛk toniiɗ nyon a daktan, ɛkan sɛɛg kɛɛ laaganyɛɛ.

⁶Nɛkan mermenaaka nɛ dɛna wosɛytan Waakoyotoŋk om, sinɔ pire sinɔɔnɛ kɔɔr walɛ taama nɛɛkik, a lak Pɛɛni sinɔ Ɓɛlkɛɛstank sinɛkoy nɔkoy nɔkoyk, a waasɛ joopa, a komoyeera, a atutunɛɛka, a tuukaanaka baŋɛ sigaaga beeɗir ɗook raŋk.

⁷Ɛkan tonu a ɗooruŋ kɛ, "In ɓurɛɛ Waakoyo ɛ in gagiɗɛɛ eemɛyɔn, agut sinɔ mɛlkikɔ sayiti pirdiyoŋk. In ugumɛɛ sɛɛna sinaanaɓa riiɓe ɗoo a dari a gɔrɔ sinɛ obiik a tunyakɔ mawunoŋk.

⁸Ma wosɛytan pɛɛyeen nɛɛkɛ nomɛɛɗ sinɛkan tukik a tonu kɛ, "Ɗiiriŋ, ɗiiriŋ, Baabiloon sinɛ obiik sinɛ a'ar joop ɗookoŋk baŋɛ, kɛnɔ uter tuu sinɛ pɔɔyɛɛk wɛyinik ruunyikeenoŋk."

⁹Ma wosɛytan jiiteen nɛɛkɛ nomɛ sɛɛge a tonu a ɗooruŋ kɛ, "Ɔkɔn lakɛ joop sigɔ ugumer keegunta nɛɛka, a tagaytaana nɛɛka ɛkan arɛɛ sɛɛga yaaŋtan nɛɛk tɛpɛɛnaka maŋk arna gɛŋkik,

¹⁰nɛkoy uter ogool wɛyinik goopanoŋk Waakoyotoŋk, ogool sigi seeɗɛɛkan sɛɛg anta tuutoŋk goopanoŋk a in sɛɛg kɛ selɓɛɛt. Rakatɛrkoy sɛɛk moɗɛɛɗ maɗoŋk a koonoŋk wosɛytaanakɛ sigaagɛ geetitaanakik a Jiŋkuy nɛɛkɛ taamɛkɛ.

¹¹Ɛkoy duuŋe rakaaya toor maɗ sinɛkoy laaŋoyɛɛɗɛ sɛɛgik nɔkoy nɔkoyk, nɛ joop sigɛ ugumer keegunta nɛɛka a tagaytaana nɛɛka a joop sigɛkan arɛɛ sɛɛga yaaŋtan tiriya gɛɛŋkik baŋɛ kɛɛkoy sɛɛge imiiny waawuy a kaay.

¹²Ɗɛyɛ ɓaŋkaawurɔn oolaanik joopa Waakoyotoŋk sigaaga koorɛr sekiyɛ Waakoyotoŋk ɛ ɓaŋkaawurar ŋaadiyɛɛkɛ Yeeseek ant sineene.

¹³Ɛkan tiya koŋgoy dari sinɔ tonu kɛ, "Taapuk, geetitaanak joop sigɛ koy rɛrar ma sɛɛg joop sisɔ Suumi Yeeseek." Nɛ tonur Wɛɛŋa sigɔ Geetitaanakik kɛ, "Ii, imiinyerkoy bɔɔlakaat nɛŋkiŋ agut sinɔ nomɛkoy sɛɛge ijaag nɛŋkiŋ."

¹⁴Nɛkan mermenaaka nɛ dɛna tiiman sinɔ tupeenyŋɔŋk, nɛkan tiimane nɛɛkɛ raŋk beeber iɗit sinɔ gayi a tɔɔn etoŋkuk, a lak dooroy workeyoŋk aɗoy, ɛ lak aarɛ ɗootaanoŋk sinɔ ɗɔmuŋɔŋk ariit.

¹⁵Nɛkan ŋaarki wosɛytan om Godeey sinaanɛ Geetitank, nɛ tonu a ɗooruŋ eta sinaanakan dokuɗe tiimane raŋk kɛ, "Boŋu aarɛ nook ɗootaanoŋk nɔ ɗootiɗiikin, agut sinɔ gaykɔ ɔɔtɛ ɗootaanoŋk, mɛlkikɔ ɗootan ɗookoŋk.

¹⁶Nɛ iɗit sinɛkan dokuɗe tiimane raŋk orkukan aarɛ nɛɛk ɗootaanoŋk ɗooka, nɛkan ɗootiɗiikɛɛ ɗook.

¹⁷Nɛkan ŋaarki wosɛytan om Godeey sinaanɛ Geetitank sinaanɛ ar darik, lakkan ɓɔrɛ aarɛ ɗootaanoŋk sinɔ ɗɔmuŋɔŋk.

¹⁸Ŋaarkikan wosɛytan Waakoyotoŋk om, sinɔ ikomu maɗik nyon sinaanɛ uduŋeetoŋk, nɛ tonu wosɛytaana sinaana lak aarɛ ɗootaanoŋk sinɔ ɗɔmuŋɔŋk a ɗooruŋ kɛ, "Agut sinɔkɔ aaɗorarɗi taamɛ turkiyaatɔk sigɛ wɛyinikŋɔŋk, nɛ ɗootu sigɛ taamɛ wɛyinik rɛkɛnakɛ gɛɛnɛk sigaagɛ atu ɗook raŋk nɔ tolun sɛɛg."

¹⁹Nɛkan wosɛytan nɛɛkɛ orku aarɛ nɛɛk ɗooka, nɛ ɗootu taamɛ wɛyinik ɗookoŋk, nɛ oriir sɛɛg nyona sooraanoŋk goopan Waakoyotoŋk takana.

²⁰Nɛ soorɛɛ sɛɛg ant sooraanoŋk sinaanɛ ar katamɛɛ nɛɛkɛ walasik, nɛ deelɛ yɛrom nyon sinaanɛ sooraanoŋk rakaaya mɛlɛɛɗa koomosa masoyoŋk, a ege jeeɗoka nɛɛkɛ kiilo meetera ɗibɛɛ jiit.