Read majang Dɛnɛɛ Pɛrka Yowanisik 15 Bible Online

Dɛnɛɛ Pɛrka Yowanisik 15 - majang bible

Dɛnɛɛ Pɛrka Yowanisik 15

¹Mermenaakakan nɛkan dɛnɛɛra dariya yaaŋtan om sinɔ obiiŋɔŋk ɛ reemɗigeeɗ ɓayaayik, sigɛkan dɛnaak wosɛytaanak Waakoyotoŋk a tula pɛɛy sigɔ latu rakatɛɛ sigɔ boobɛŋɔŋk a tula pɛɛy sigɛ pediyaak. Nɛkan dusanɛɛ olaatɛ sigeege goopan Waakoyotoŋk.

²Ɛ kan dɛna any sinɔ gayi a gɔrɔ sinɔ obiiŋɔŋk ɓɛɛrawoyoŋk sinɔɓa repɛɛ a maɗik. Ɛ kan dɛna joop sigɔkan lɔsɛr keegun sinɛk a tagaytan nɛɛkik, a ikomiit sinɛ yaaŋɛr tiriya gɛɛnɛkik. Nɛkan ɛtɛtɛɗar goroo sinaanɛ obiiŋɔŋk ɓɛɛrawoyoŋk kɛntɛɛ a latu soŋguyatɔk sigɔɓa sɛɛga gakɛɛ sooy lak Waakoyok.

³Ɛ kan iiliyar iiliya Muusee sinɛ ijaagen Waakoyotoŋk, a iiliya Jiŋkuy sinɛk kɛ, "Iin Suumi Waakoyo sinɛ Oolɛ ola Baŋɛk, obi ijaag nookɛ a reemɗigeeɗ ɓayaay. Iin tapaɗ joop ɗokanɛɛkoŋk baŋɛ, ege gopak goonɛ liki ɛ eekeer.

⁴Iin Suumi, wooɗ sinɛni ki tuɓurk? Ɛ wooɗ sinɛ ki eemɛyɔɔn tiriya gooŋkuk? Geetitan iin dakɛɗa. Kurak joop ɗookoŋk baŋɛ, nɛ ugumer taamɛkɛ goonɛk, agut sinɔkan yaaŋɛɛɗ ɛɛk ijaag mentanka nookuk."

⁵Ɛ kan seedi baŋiya dɛna a tayɗi Gode sinɛ Geetitank ar darik sinɛ Duukaanoy Kuumeet Waakoyotoŋk.

⁶Nɛkan ŋaararki Godeey sinaanɛ Geetitank wosɛytaanak a tula pɛɛy sigɔ latu rakatɛɛ sigɔ boobɛrŋɔŋk a tula pɛɛyk, nɛkan kadir abiyak sigɔ mentaana a nyaalɛrŋɔŋk, ɛ kan tuser kokomeera gɛŋk teeɓɛɛ workeyoŋk.

⁷Ɛ kan riiɓakɔkɛ sigaagɛ latu wɛɛŋak aŋank gaɓɛ omaay wosɛytaanaka sigɔɔga tula pɛɛyk ola tuutoŋk sigɔɓa ijaagɛɛ workeek sigɔ tula pɛɛyk sigɔɓa enyɛrgiɗɛɛ goopan Waakoyo sinɛkoy beeɗ nɔkoy nɔkoyk.

⁸Ɛ kan enyɛɛri Gode sinɛ Geetitank toor sinɛkan ŋaarki eemɛyɔɔn Waakoyotoŋk a ɓaŋkawukaat nɛɛkɛkik. Kɛɛ iɗit sinɔkan oolɛ a guuguny Godeya sinaana Geetitank mɛlɛɛɗa nɔ dusanɛrɗi wosɛytaanak sigɛ tula pɛɛyk rakatɛɛ sigɔ boobɛrŋɔŋk sigɛ tula pɛɛyk.