Read majang Dɛnɛɛ Pɛrka Yowanisik 16 Bible Online

Dɛnɛɛ Pɛrka Yowanisik 16 - majang bible

Dɛnɛɛ Pɛrka Yowanisik 16

¹Tiyaakan koŋgoy sinɔ obiiŋɔŋk sinɔ ŋaarki Godeey sinaanɛ Geetitank, a tonu wosɛytaanaka Waakoyotoŋk sigaaga tula pɛɛyk kɛ, "In kɛɛɗɛɛ, nɔ kɛɛɗɛɛ pakaayɛɛ ɗooka raŋana, tuutakɔ sigɛ tula pɛɛyk latu goopan Waakoyotoŋkuk."

²Nɛkan kɛɛ wosɛytan sinɛ tukik nɛ kɛɛ pakaayi tuu nɛɛk ɗooka raŋana, nɛkan ɓɛrɛrki doosoyɛ sigɔ meetar a ŋɛɛwɛɛŋɔŋk joope sigaagɛkan arɛɛ sɛɛga yaaŋtan keegun sinɛk a sigaagɛkan ugumer tagaytaana sinaanak.

³Nɛkan pakaayi wosɛytan pɛɛyeen nɛɛkɛ tuu nɛɛk gɔrɔwa sinɔɔna obiiŋɔŋk takana, nɛkan dakɛ gɔrɔ sinɛ obiiŋɔŋk a ito yɛrom iɗit sinɔkan rɛrŋɔŋk, ɛkan rɛrar ola sigɛ atu goroo sinaanɛ obiiŋɔŋk sigɛ latu wɛɛŋak baŋɛ.

⁴Pakaayikan wosɛytan jiiteen nɛɛkɛ tuu nɛɛk gɔrɔwika a tunyakɔɔka mawunoŋk takana, nɛkan dakɛr a yɛrom.

⁵Ɛkan tiya a tonu wosɛytan sinɛ ikomu mawunk kɛ, "Iin sinɛ ɓɛɛlin sisɔk ɛɓa ɓɛɛlin jeemɛk, iin sinɛ geetitank, pɛrɛdinkan seŋkiŋ.

⁶Agut sinɔ ɓuurerkiɓa sɛɛk yɛrom joop goŋkuk a ɓɔrɛ joop gooŋk pɛrkaakoŋk, nɛkan ɓɔre gaɓun sɛɛga kɛnɔ uter yɛrom nɛŋk oko gati ijaag nɛŋkik."

⁷Ɛkan tiya koŋgoy sinɔ ŋaark nyon sinaanɛ uduŋeetoŋk kɛ, "Ii, iin Suumi Waakoyo sinɛ Oolɛ ola baŋɛk, eekerkan pirdi nookɛ ɛ liki."

⁸Pakaayikan wosɛytan aŋaneen nɛɛkɛ tuu nɛɛk waawuya raŋana, nɛkan gaɓɛɛ waawuya nɛɛka ɓaŋkawuka kɛnɔ moɗɛ joop okokɔ maɗoŋk.

⁹Moɗikan joop paakaan sinɔɔnɛ obiiŋɔŋk, nɛkan nyɔɔnar tiriya Waakoyo sinɛ lak ɓaŋkawuka rakatɛɛkɛ sigɔɔgɛ bobɛrŋɔŋk sigeege raŋkik, makan kirki weeriit tikiyɛɛkɛ Waakoyota, ɛ kirgeeɗ gaɓɛɛɗ eemɛyɔn.

¹⁰Pakaayikan wosɛytan tuuleen nɛɛkɛ tuu nɛɛk barsuma keegun sinɛk raŋana, nɛkan dakɛ burɛ nɛɛkɛ a nyuugur, nɛkan ɗamar joop kaɗateer gɛŋk agut rakatɛ nɛŋk,

¹¹ɛkan koonyɛr Waakoyo dariyoŋk agut rakatɛyɛ gɛŋk a doosoyɛ gɛŋk, mayakana kirki weeriit Waakoyota agut ola sigɛɓa ijaagirk.

¹²Pakaayikan wosɛytan tula omeen nɛɛkɛ tuu nɛɛk gɔrɔwa sinaana obiiŋɔŋk Eepiratisik, nɛkan ookur kɛnɔ ragadi gopan tapaaka sigɔɔga kurak goyse mɛlkiɗ waawuyk.

¹³Dɛnaakan wɛɛŋa sigɔ somkaanakik a jiit sigɔ gayi a wɔwɔjaatɔkuk a ŋaarark ad wilaŋ sinɛk, a ad keegun sinɛk, a ad iɗit pɛrkaakoŋk sinɛ nyonkank.

¹⁴Ege sigi wɛɛŋa sigɔ somkaanakik sigɔ arir sɔɔriyɛɛk, nɛ kaar sinɔɔnɛ tapa ɗookoŋk baŋɛ kɛnɔ tolɛr sɛɛg kaarina ɓɛɛnyɔwa sinaanakoy obiiŋɔŋk Waakoyo sinɛ Oolɛ ola baŋɛk.

¹⁵"Dɛnko, mɛlɛɛra koy okokɔ agaltoŋk. Geetitan iɗit sinɛ ɓeɗi nɔ koorɛ abii nɛɛk kɛnɔ kat dɛdɛnɛɛ konaanikeen nɛɛk kɛnɔmo lak keenyk."

¹⁶Tolɛrkan wɛɛŋa sigɔ somkaanakik tapa gɛɛŋk nyon sinɔɔnɛ riyɛ ad Ibiraysitik kɛ Armagedoonuk.

¹⁷Pakaayikan wosɛytan tula pɛɛyeen nɛɛkɛ tuu nɛɛk walasa taamta, nɛkan ŋaark koŋgoy sinɔ obiiŋɔŋk barsum sinaanɛ ar Godeey sinaanɛ Geetitank sinɔ tonu kɛ, "Dusanɛɛkɔŋ."

¹⁸Ɛkan lakɛ talal, a koŋgoy, a tɛɓɛr, a yike ɗookoŋk sinɔ ɓaŋkawuŋɔŋk sinɔ inɓa kɛɛ yike ɗookoŋk sinɔ ito sinik a tukiɗi saaɓa riiɓeeɗɛɛ joop ɗook raŋkik, obiikan yike nɛɛkɛ jɛt.

¹⁹Kaasɛkan ɛɛk katamɛ sinɛ obiik a jiit, makan aalɗi katamɛɛ joop ɗokanɛɛkoŋkuŋ, koɓukukan Waakoyot Baabiloon sinɛ obiik, kɛnɔ gageeɗ any tuutoŋk sinɛ enya ogool wɛyinik goopan nɛɛk sinɛ ɓaŋkawuŋɔŋk.

²⁰Gonarkan asuulɛɛk baŋɛ, makan ɓɔrɛ kurkumɛɛk badɛrŋ.

²¹Ɗirkikan joopa raŋana malwan sinɔ obiiŋɔŋk dari sinɔ ɗilka nɛɛkɛ ito goorik, nɛkan joop koonyɛr Waakoyo agut goopan sinɛ malwantoŋk, agut sinɔ obiikan goopan nɛɛkɛ jɛt.