Read majang Dɛnɛɛ Pɛrka Yowanisik 17 Bible Online

Dɛnɛɛ Pɛrka Yowanisik 17 - majang bible

Dɛnɛɛ Pɛrka Yowanisik 17

¹Kuskan wosɛytaanakɛ Waakoyotoŋk sigaagɛ tula pɛɛyk latu ola tuutoŋk sigɛ tula pɛɛyk a omoŋ nɛta tonu kɛ, "Waɗik. Yaaŋa kɔɔna goopan jarti sinɛ ruunykan sinɛ taŋɛk sinɛ beeber mawunɛ sigɔɔgɛ ɓɔɔkaaŋɔŋkuk.

²Nɛkan ɗuŋar tapaak ɗookoŋk a sɛɛn, ɛ pɔyar joop sigɛ beeɗir ɗook raŋk ogool wɛyinik ruunyikeen nɛɛkik."

³Diile kanti wosɛytan sinɛ wɛɛŋakɛ paatoona, nɛkan dɛna jarti sinɔkan beeber keegunt sinaanɛ dɛɛŋɔŋk raŋk sinaanɛ lak eek nɛɛkɛ baŋɛ tiriya nyɔɔnakoŋk, ɛ lak ɔɗɔɔk a tula pɛɛyk ɛ lak kolbɛɛ a aarink.

⁴Lakkan jarti sinɛ eek abii sinɔ dɛɛ a boolɛya a daamɛk, ɛkan ruukɛɛ workee, a giɗeek sigɔ obi gati nɛŋkik sigɔ ɓɛɛlɛr kundiyaakɛk. Makan lak ariit nɛɛkɛk any tuutoŋk sinɔɓa ijaagɛɛ workeek sinɔɓa enya somikeen ruunyikeen nɛɛkik.

⁵Ɛkan taapɛɛ tepeen nɛɛkɛk tiriya any sinɔ dugaaŋɔŋk kɛ, "Baabiloon sinɛ obiik sinɛ ɛmɛs ruunykaanaka ɛ sɛɛn ɛmɛs somkaanaka ɗookoŋkuk."

⁶Nɛkan dɛna jarti sinɛ a pɔy yɛrom joop Waakoyotoŋk a yɛrom joop sigɔ waasiɗi agut Yeeseek. Saakan dɛnɛɛɗa sɛɛnik, nɛkanti reemɗi ɓayɛ jɛt.

⁷Nɛ yakanakanta tonu wosɛytan sinɛ Waakoyotoŋk kɛ, "Reemɗini ɓayaay agut jikon? Yaaŋakɔɔna any sinɔ dugaaŋɔŋk jarti sinɛk a any sinɔ dugaaŋɔŋk keegun sinɛ lak ɔɗɔɔk, a tula pɛɛy a kolbɛɛ a aarink sinɛ arkiɗ jarti sinɛ raŋkik.

⁸Keegun sinɛkan dɛnink ɓɛɛlɛɓa jeemɛŋ, ma kɛɛ sisɔ ara, makoy ŋaark baŋiya utul sinɔɔnɛ kiidɛ sukuk nɛkoy kɛɛ badɛɛɗa. Joop ɗookoŋk sigɛɓa kɛɛ taapɛɛt tiriya gɛŋk wargatɛya wɛɛŋakoŋk a tukiɗiik saaɓa riiɓeeɗɛɛ ɗook, nɛkoy reemɗi ɓayɛtun gɛŋk saakoy dɛnɛrɗi keegun nɛɛkik, agut sinɔɓa ɓɛɛlɛɛɗ jeemɛ ma kɛɛ sisɔ makoy mɛlki ɔɗɔɔkaaŋɔŋk.

⁹"Ɗɛyɛ sineena kalbi sinɔ lak ɗegerɔn ɛɛkoŋk. Ɔɗɔɔk sigɛ tula pɛɛyk kurkumɛ sigɛ tula pɛɛyk sigɛ beeɗiɗ jarti sinɛk,

¹⁰Ɛɓɔrɛ tapaak sigɔ tula pɛɛyk nɛkan badɛr sigɛ tuulkuŋ, ma a omoŋ tapaaɗaani sisɔ, ma omaay in kiiki mɛlɛ, saakoy sɛŋk mɛlkiɗik nɛ ɗɛygeeɗ a beeɗ a diny ɔɔtɛ nɛɛkɛŋ.

¹¹Ege keegun sinɛɓa ɓɛɛlɛ ma kɛɛ sisɔk tapaɗ tula jiiteen nɛɛk. Sɛɛn sigaagɛ tula pɛɛyk om, nɛɓɔrɛ sɛŋk kɛɛ badɛɛɗa.

¹²"Kolbɛɛ sigɛkan dɛnink aarink tapaak sigɔ aarink sigɔ in kir boŋiiɗ tapaaɗikeenk, mayakana koy boŋur ɓaŋkawuka kɛnɔ tapaaɗaanir a keegun sinɛ sayitiya sinɔɔna omoŋɔŋk.

¹³Latukoy koɓi sinɔ omoŋɔŋk, gaɓɛrkoy ɓaŋkawuka nɛŋk a ɔɗɔwikeen nɛŋk keegunta sinaana.

¹⁴Kaararkoy sɛɛk a Jiŋkuy nɛɛkiŋ, yakanakoy sɛɛg lɔsɛ Jiŋkuy nɛɛkɛŋ, agut sinɔ sɛɛn Suumi suumiyɛɛkoŋk ɛ sɛɛn Tapaɗ tapaakoŋk, lɔsiɗiikoy a sɛɛn agut omoŋ joop sigɛɓa riyɛ sɛɛg ɛ sɛɛg daamɛɛk ɛ sɛɛg ŋaadɛɛk."

¹⁵Tonukanta wosɛytan sinɛ kɛ, "Mawun sigɛkan dɛnink a beeberɗi ruunykan sinɛk, komoyeer, joop sigɔ ɓɔɔkaaŋɔŋk, a joop ɗokanɛɛkoŋk, a atutun.

¹⁶Keegun sinɛ a kolbɛɛ sigɛkan dɛnink aarink ɓooyurkoy ruunykan sinɛŋ, karkararkoy sɛɛn nɛ ŋɔɗar konaan, ɗamarkoy buusɛ nɛɛkiŋ, ɛkoy moɗɛr maɗ.

¹⁷Agut sinɔ riiɓeɓa Waakoyot koɓi sinɛɓa gaamuk kalbiyɛɛkɛ gɛŋk tak, kɛnɔ dusanɛr any sinɛɓa gaamuk, a mɛyi a koɓi omoŋ kɛnɔ gaɓɛr ɔɗɔwikeen nɛŋk keegunta sinaana, mɛlɛɛɗa nɔkoy dusanɛɛɗɛɛ Pɛɛni Waakoyotoŋkuk.

¹⁸Jarti sinɛkan dɛnink katamɛ sinɛ obiik sinɛkoy tapaaɗaani tapaakɛ ɗookoŋk raŋk.