Read majang Dɛnɛɛ Pɛrka Yowanisik 18 Bible Online

Dɛnɛɛ Pɛrka Yowanisik 18 - majang bible

Dɛnɛɛ Pɛrka Yowanisik 18

¹Seedi baŋiya dɛnaakan wosɛytan Waakoyotoŋk om sinɔ lak ɓaŋkawukaak sinɔ obiiŋɔŋk a worworiik dari, nɛkan ɗaawu ɗook baŋɛ nyaalaan eemɛyɔn nɛɛkɛk.

²Ɛkan ooyɛ koŋgoy sinɔɔnɛ ɗooruŋɔŋk kɛ, "Ɗiiriŋ, ɗiiriŋ Baabiloon sinɛ obiik! Dakɛkɔ a nyon beeɗitoŋk setanɛɛkoŋk, a nyon sinɔ beeɗirɗi wɛɛŋa sigɔ somkaanakik baŋɛk, a nyon beeɗitoŋk teetɔ sigɔ somkaanakik ɛ sɛɛg keerɛɛ baŋɛk.

³Agut sinɔ uterkan joop ɗokanɛɛkoŋk baŋɛ ogool wɛyinik goopan ruunyikeen nɛɛkik, ɗuŋarkan tapaak ɗookoŋk a sɛɛn, ɓɔlɔɔrɛrkan joop sigɛ nagadɗi ɗookuk yaakaat wori nɛɛkik."

⁴Tiyaakan saadi koŋgoy om dari a tonu kɛ, "In ŋaarkɛɛ sɛɛne, iinak joop gaaŋk. Kat ijaagɗiikari agut omoŋk tikiyɛɛkɛ gɛɛnɛ, kat kaasɛɛr rakatɛ nɛɛk sinɔ obiiŋɔŋk.

⁵Bosiɗi tikiyɛ gɛɛnɛ a mɛlɛr dariya, koɓukukan Waakoyot tikiyɛ gɛɛŋkiŋ.

⁶In koyɗiigiɗɛɛ oko sinɛkan koyɗiiɗik. In koyguɗɛɛ a suɗaktaanak pɛɛy oko sinɛkan ijaagiɗik. In saapɛygiɗɛɛ a suɗaktaanak pɛɛy oko sinɛkan saapɛyɗi ant tuutoŋkuk.

⁷In gagiɗɛɛ ooɗiyɛ a san oko sinɛkan gaɓɛɛɗ ɛɛka nɛɛka eemɛyɔn a yaakak. Meri ɛɛk ɓayaay nɛɛkɛkik a tonu kɛ, 'Eet tapaɗ, moko eet jarti sinɔɓa rɛrɗi baabuyk, Kaa sanɗit adaktan.'

⁸Agut sini mɛlatageeɗkoy goopana gɛɛnɛ a waawuy omoŋ, dakigeeɗkoy a rer, a san, a ŋaawu. Ɛkoy moɗɛɛ maɗ, agut sinɔ oolɛɛɗ any baŋɛ Waakoyo sinɛkoy pɛrɛdɛ sɛɛnekiŋ.

⁹"Tapa ɗookoŋk sigɛkan ɗuŋar a sɛɛnik ɛkan kaasɛr yaaka nɛɛkik, kuɗerkoy ɛkoy ooyɛr katamɛɛ sinaanɛ, saakoy dɛnɛrɗi a ŋaarki toor sinɛ moɗɛɛɗɛɛ sɛɛnik.

¹⁰Nɛkoy ɛtɛrki a yowɛɛɗiŋ agut sinɔ ɓurerɗi ooɗiyɛ gɛɛŋkik a tonur kɛ, " 'Durina, durina, iin katamɛ sinɛ obiik, iin Baabiloon sinɛ ɓaŋkawuk. Mɛlkikɔ goopan nookɛ sayitii sinɔɔnɛ omoŋɔŋk.'

¹¹"Kuɗergeeɗkoy ɛkoy sanɗi sɛɛga joop sigɛ nagadɗi ɗook nɛɛkɛkik, agut sinɔkoy kiiɗɛ iɗit sinɔ ɓali ola sigɛ diilerkik.

¹²Kɛɛ koy iɗit sinɔ ɓali sɛɛge worke, a biri, a giɗee sinɔ obi gati nɛɛkɛŋɔŋk, a giɗee sinɔ riyɛ kɛ inkuuk, a abii sinɔ kɛwkɛwŋɔŋk sinɔɓa ijaagɛɛ deran kɛɛt tɛlbakoŋk, a sinɔ dɛɛ a daamɛk, a sinɔ kɛ haarik, a sinɔ muuweŋɔŋk, a kɛɛt sinɔ ŋaa yaagɛrk baŋɛ, a ola sigɔɓa ijaagɛɛ ŋedan aŋɛyoŋk, a kɛɛt sinɔ obi gati nɛɛkɛŋɔŋk, a attarit, a awɛyt, a daawokaatɔkɛ baŋɛ,

¹³a orkak kɛɛt sinɔ ŋaadɛ yaagarŋɔŋk, a ola uusetoŋk, a kɛɛt sinɔ ŋaa yaagɛrk riyɛ kɛ kɛrbeek, a itaanɛ, a diikuy, a ogool wɛyinik, a jayti wɛyraak, a oti sinɔ nyelkeetŋɔŋk, a sindee, a tɔgi, a jiŋkuyɛ, a masoyɛ, a gaariyak, a laaŋoyeer a joop ɔgɔ.

¹⁴"Tonur nagaadeyɛɛk kɛ, 'Wider kɔne ɛɛk ola sigɛ ɗɛɗɛyink mentaanakiŋ, badɛkɔ ɓɔlɔɔrɛ nookɛ a eemɛyɔn nookɛ baŋɛ, kiikikɔɔɓɔ weeriit son lak iinik adaktan.'

¹⁵Joop sigɛkoy ɓaɓali olaatɛ sigeege kɛnɔ ɓɔlɔɔrɛrk ɛtɛrkikoy a yowɛɛɗiŋ, agut sinɔ ɓurerɗi ooɗiyɛ gɛɛŋkik, nɛkoy kuɗer ɛ sanɗi.

¹⁶Nɛ tonur a ɗooruŋ kɛ, " 'Durina, durina, iin katamɛ sinɛ obiik, sinɛkɔ kadi abii sinɔ kɛwkɛwŋɔŋk a sinɔ dɛɛ a daamɛk, katamaya sinaanakɔ ruuke ɛɛk workeek, aɓɔrɛ giɗeekɛ sigɔɔgɛ obi gati nɛɛkɛŋɔŋk, a giɗee sinɔ riyɛ kɛ inkuuk.

¹⁷Badɛɛɗkan wori sinɛ obi a ɛtɛ oko sinɛk sayitii sinɔɔnɛ omoŋɔŋk.' "Joop sigɛ ɔɗɔweer emɗoŋk baŋɛ, a joop sigɛ ŋawiiter emɗ sinɔɔnɛ obiiŋɔŋk baŋɛ, a ijaageer emɗoŋk baŋɛ, a joop sigɛ nagadɗiik goroo sinɔɔnɛ obiiŋɔŋk baŋɛ, ɛtɛrkikoy a yowɛɛɗiŋ.

¹⁸Saakoy dɛnɛrɗi toor sinɛ ŋaarki saa moɗɛɗɛɛkik nɛkoy ooyɛr kɛ, 'A lakɛɓato katamɛ om sinɔ obi a ɛtɛ oko sinikiŋ?"

¹⁹Wasanirkoy duudur ɔɗɔɔka gɛŋk nɛkoy kuɗer ɛ sanɗi nɛ ooyɛr kɛ, " 'Durina, durina, iin katamɛ sinɛ obiik, agut sinɔ joop sigɛ latu emɗakɔ sigɔ boobɛrŋɔŋk goroo sinɔɔnɛ obiiŋɔŋk raŋk baŋɛ ɓɔlɔɔrɛrɗikan joop sigɛ wori nɛɛk. Nɛkan badɛ sayitii sinɔɔnɛ omoŋɔŋk tak.

²⁰Inna yaa iin dari, a iinak joop sigɔ geetitaanakik, a wosɛytaanak, a joop pɛrkaakoŋk, agut sinɔ pɛrɛdɛkɔ Waakoyot ant sinaanɛkan kɔne ijajag raŋkik.' "

²¹Nɛ saadi wosɛytan sinɔ ɓaŋkawuŋɔŋk boŋu giɗee sinɔ boobɛŋɔŋk ito goorik nɛ oriir gɔrɔwa sinɔɔna obiiŋɔŋk, a tonu kɛ, "Yegɛɛkoy Baabiloon sinɛ obiik ɓaŋkawukaat sinɔɔnɛ ito sinik, nɛkoy ɗiri oko sinik, nɛkoy kiiki ŋaarin kɛkar adaktan.

²²Kɛɛkoyɓɔne weenta kɛkar koŋgoyi soŋguyatɔ sigɔ meenɛɛ sɛɛgŋɔŋk, a joop iiliyagoŋk, a koŋgoyi gotɛ seetɛɛkoŋk a luuriyatɔkoŋk. Kɛɛ koyne laŋiiɗ kɛkar joop sigɔ oolɛr ijaagak baŋɛk, kɛɛ koyne weenta kɛkar koŋgoy giyanoŋk.

²³Kikoyne tipeyɗiit kɛkar pɛɗɛrkaat ɗaawanoŋk, kɛɛ koyne weenta kɛkar koŋgoy iɗit sinɛ waawuguɗɛɛk a iɗit sinɛ waawuk. Egekan joop sigɛ ŋaadiɗi iinek joop sigɔkan booɓɛrŋɔŋk ɗookoŋk, babadarkan joop ɗokanɛkoŋk baŋɛ ŋɛyikeen nookɛk.

²⁴Laŋkɛɛkan sɛɛne tak yɛrom joop pɛrkaakoŋk a joop Waakoyotoŋk, a joop sigɛkan sɛɛg ɓokootɛɛ ɗook raŋk baŋɛ."