Read majang Dɛnɛɛ Pɛrka Yowanisik 19 Bible Online

Dɛnɛɛ Pɛrka Yowanisik 19 - majang bible

Dɛnɛɛ Pɛrka Yowanisik 19

¹Seedi baŋiya tiyaakan koŋgoy sinɔ ito ɗooran joop sigɔ ɓɔɔkaaŋɔŋk dari nɛkan ooyɛ a ɗooruŋ kɛ, "Halɛluya, ege ebɔdɛ a eemɛyɔn a ɓaŋkawuka Waakoyo naŋkik,

²agut sinɔ ege pirdi nɛɛkɛ eekeer ɛ liki. Pɛrɛdɛkan ruunykan sinaanɛ taŋɛgɔŋk sinaanɛkan ari ɗoo a somkan ruunyikent nɛɛkɛkik, ɛkan tiijiɗi sɛɛne agut yɛrom ijaageer gɛɛŋkik."

³Ɛkan ooyɛr kɛkar kɛ, "Halɛluya, ŋaaŋarkikoy toor sɛɛne nɔkoy nɔkoyk."

⁴Ɛkan gutarɛɛ sigɛ ruumer iɗit a aŋank a riiɓakɔ sigɔ latu wɛɛŋa sigɛ aŋank, ɛtɛr korontunɛ nɛ ugumer Waakoyota sinaanakan dokuɗe barsum sinaanɛk a arir kɛ, "Ameen. Halɛluya."

⁵Ɛkan seedi baŋiya ŋaarki barsum nɛɛkɛ koŋgoy sinɔ tonu kɛ, "In pɔɔsɛɛ Waakoyo naŋk, iinak ijaageer gɛɛŋk baŋɛ sigɛ ɓurer sɛɛnik sigɛ temetuk a sigɛ boobɛrk."

⁶Nɛkan tiya koŋgoy sinɔ ito joop sigɔ ɓɔɔkaaŋɔŋk, a maawu sigɔ gonar a ɓaŋkawuŋɔŋk, a tɛɓɛr sinɔ ɓaŋkawuŋɔŋk a tonu kɛ, "Halɛluya, agut sinɔ tapaaɗaani Suumi Waakoyo naŋk sinɛ Oolɛ ola baŋɛk.

⁷In tina yaa koy arii yaaka koy gagiɗii eemɛyɔn, agut sinɔ gayɛkɔ ɔɔtɛ sinɔ waawiɗɛɛ Jiŋkuya nɛɛkaakik, ɛkan ragadi tagoon nɛɛkɛ ɛɛk nɛɛk.

⁸Gagiɗɛɛkan abii sinɔ nyaalɛŋɔŋk sinɔɓa ijaagɛɛ kɛɛt tɛlbakoŋk deran nɛɛk, sinɔ mentanŋɔŋk ɛ kɛwkɛw kɛnɔ kadiɗ." Yaaŋɛ abii sini mentanŋɔŋk sinɛɓa ijaagɛɛ deran kɛɛt tɛlbakoŋkuk ijaag joop Waakoyotoŋk sinɔ mentanŋɔŋk.

⁹Ɛkanta tonu wosɛytan sinɛ kɛ, "Taapun kɛ, 'Geetitaanak joop sigɛkɔ wakɛɛ sɛɛg wɔɔra ajigeyoŋk waawan Jiŋkuy sinɛk.'" Ɛkanta tonu kɛ, "Ege sigi Pɛɛniyɛ Waakoyotoŋk sigɔ eekerkaanakik."

¹⁰Nɛkan ɗiiriraa deraka gɛɛnak kɛnɔ gun ugumguɗa, yakanata tonu kɛ, "Kat arin any sini. Eet ɓɔrɛ ijaagen Waakoyotoŋk oko iin a masookoyak sigɛkan gaamur waasiyɛ eekeer Yeeseek. Ugumu Waakoyota agut sinɔ eekeer sigɛ waasiɗi agut Yeeseek wɛɛŋa pɛrkaakoŋk."

¹¹Nɛkan dɛna saadi a tayɗi dari, nɛkan lakɛ masoy sinɔ tupeenyŋɔŋk, nɛkan ar masoy nɛɛkɛ raŋk any sinɔ riyɛ kɛ, "Ŋaadɛɛ ɛ Eekerkank," Pɛrɛdɛ sɛŋk ɛ tima a mentan.

¹²Ito kan taamɛ gɛɛnɛ taparpar maɗoŋk, lakkan aɗoy nɛɛkɛ doroyk eemɛyɔɔnoŋk a ɓɔɔkaaŋ. Taapɛɛɗɛɓa raŋk tiriya sigɔ ɗegeera Sɛɛn dakɛɗak.

¹³Lakkan sɛŋk abii sinɔɓa supkɛɛ yɛromk riyɛkan tiriya gɛŋk kɛ pɛɛni Waakoyotoŋk.

¹⁴Ɛkan nomɛrɗi amaasiniyɛ dariyoŋk a atu masoyɛɛkɛ sigɔɔgɛ tupenyjuŋɔŋk a latu abiyak sigɔ mentaanaŋɔŋk sigɔɓa ijaagɛɛ kɛɛt tɛlbakoŋk sigɔ tupenyjuŋɔŋk.

¹⁵Nɛkan ŋaarki ad nɛɛkɛ aarɛ sinɔ ɗɔmuŋɔŋk kɛnɔ yayawuɗu joop ɗokanɛɛkoŋk, nɛ ɓali sɛɛg gumboy awɛytoŋk. Torookurkoy sɛɛg nyona sinɛɛna soorɛɛɗɛɛ wɛyin goopan sinɔ ɓaŋkawuŋɔŋk Waakoyo sinɛ Oolɛ ola baŋɛk.

¹⁶Taapɛɛɗɛɛɓa abiye nɛɛkɛ a derɛ nɛɛkɛ kɛ, "Tapaɗ tapaakoŋk ɛ Suumi suumiyɛɛkoŋk."

¹⁷Nɛkan dɛna wosɛytan Waakoyotoŋk sinɔ ɛtɛtɛr waawuy raŋk, nɛkan sɛŋk ooyɛ koŋgoy sinɔɔnɛ obiiŋɔŋk teetɔka sigaaga pirer darik baŋɛ kɛ, "In kusɛɛ, tolɗiikɛ ɗamata sinaana obiiŋɔŋk ajigeyoŋk Waakoyotoŋk.

¹⁸Tolɗiikari kɛnɔ ɗamari taar tapaakoŋk, a ɔɗɔweer beyaakik, a joop sigɛ ɓaŋkaawarkik, a masoyɛɛkoŋk a joop sigɛ beeɗir masoyɛɛkɛ gɛɛnɛk, a joop baŋɛk, a joop sigɔ atu yaakatik, a laaŋoyeeroŋk, a taar joop sigɛ temetuk a joop sigɛ boobɛrk."

¹⁹Ɛkan dɛna keegun sinɛ a tapaak ɗookoŋk a amaasiniyɛ gɛŋk a tolɗi kɛnɔ kaarar a iɗit sinɛkan dokuɗe masoy sinaanɛk a amaasiniyɛ gɛɛŋk.

²⁰Yakanakan gaamɛɛ keegun nɛɛkiŋ, ɛkan gaamɛɛ iɗit sinɛ pɛrkaakoŋk nyonkank sinɛkan ijaagɗi a sɛɛn agut omoŋ sɔɔriyɛɛkɛ sɛɛne taamɛkɛk. Arikan joop a babadar yaaŋtaanakɛ sigeege joop sigɛkan arɛɛ sɛɛga yaaŋtan keegun sinɛk ɛ ugumer tagaytaana nɛɛkaakik. Oriirɛɛkan sigɛ pɛɛyk a ɓɛɛlɛr wɛɛŋakɛ gɔrɔwa maɗoŋk koona sinɔɔna moɗiŋɔŋk.

²¹Ɛkan ɓokootɛɛ sigɛ ŋayɗiikik aarɛɛ sinaanɛ ŋaarki ad iɗit sinɛ ar masoy sinaanɛ raŋkik, nɛkan ɗamar taarak gɛŋk teetɔɔk baŋɛ nɛ ɓooɗorarŋ.