Read majang Dɛnɛɛ Pɛrka Yowanisik 2 Bible Online

Dɛnɛɛ Pɛrka Yowanisik 2 - majang bible

Dɛnɛɛ Pɛrka Yowanisik 2

¹"Taapar wargatɛ wosɛytaana Waakoyotoŋk gode Sambatɛyoŋk sinaana ar Epesoonek, Ege sini pɛɛni iɗit sinɛ lak maryɔ a tula pɛɛy ariit nɛɛkɛk goyse ɗiɗikik, ɛ sɛŋk weeweri olaatɛ sigaagɛ riiɓeeɗɛɛ ɗaawank tula pɛɛyk kɔɔruk maɓa sɛɛg ijaagɛɛ workeek.

²Ɗegera ijaag nookkuŋ, a bɔɔlaaka nook ijaagikiŋ a ɓaŋkaawurɔn nook oolaanik, ɛ ɗegera kɛ kinkan ɓaŋkaawurɔn oolaan joopa sigɔɔga ŋɛɛwɛɛŋɔŋk, joop sigɔ tonur kɛ sɛɛgnɔ wosɛytaanak ma moko sɛɛg wosɛytaanakiŋ, nɛkan ɗegera kɛ mermeninkan sɛɛg nɛkan laŋkin a sɛɛg nyonkaanakiŋ.

³Ɛ ɗegera ɛtɛɗɔ gooŋk ɓaŋkaawurɔɔn oolaanik a sinɛkan laŋkiɗin rakatɛ agut tiriya gaaŋkik, ɛkan kin bɔɔlaat.

⁴Mayakana, lakɛ any sinɔne ɓooyaŋɔŋk. Ŋɔɗunkan mɛyin nook sinɛɓa jeemɛkiŋ.

⁵Koɓak sisɔ soon kɛ ɗirkinkan soodi ɛtɛ ɛkik, nɔ weeriikin tikiyɛɛkɛ Waakoyota kɛnɔ ijaagin any sinɛɓa ijaajagin jeemɛk. Ɔkɔn kiikin weeritiŋ, nɛkɔɔna mɛlɛɛra nɛkɔɔ kɛɛɗa boŋa any sinɛ ririɓɗin ɗaawank nyon nɛɛkɛkiŋ.

⁶Mayakana, lakin any sinɔnu pɔɔsuguɗɛɛŋɔŋkuŋ. Ɓooyunkɔ ɓɔre ijaag joop Nikolaak sinɛ ɓooyakiŋ.

⁷In tiyɛ iɗit sinɛ lak weena sinɔ tiiɗiŋɔŋk any sinɛ tonur Wɛɛŋak godeyika Sambatɛyɛɛkoŋkuk. Iɗit sinɛ lɔsiɗiik araakɔɔ a ɗam taamɛ kɛɛt wɛɛŋakoŋk sinɛ ar Gɛnɛte Waakoyotoŋkuk."

⁸"Taapar wargatɛ wosɛytaana Waakoyotoŋk gode Sambatɛyoŋk sinaana ar Sɛmirneseek, Ege sini pɛɛni iɗit sinɛɓa tukik ɛkoy pedtank, ɛɓa rɛr nɛɓa bɔdukuk kɛkark.

⁹Ɗegera rakatɛ a giroy nookkuŋ, mayakana iin worikan. Ɛ ɗegera kɛ sɔɔkɛrkan tiriya gooŋk joop sigɔ tonur kɛ sɛɛgnɔ joop Ayuuduk ma moko sɛɛg joop Ayuuduk, mayakana ege sigi joop sigɔ tolɛ setanik.

¹⁰Kat ɓurun rakatɛ sinɛkɔɔna mɛlkik. Dɛnko, gaɓɛkɔɔ kɔnu setan a omoŋ omoŋ godeya korkoɗɔɔnoŋk kɛnɔ kɔnu paariɗ, nɛkɔɔ laŋirkɔ rakatɛ a ɗoŋ aarin. In iin eekerkan kɛygunnu arkaayɛ a ito rɛɛrin, nɛkɔɔna gaɓa dooroy eemɛyɔɔnoŋk wɛɛŋakoŋk.

¹¹In tiyɛ iɗit sinɛ lak weena sinɔ tiiɗiŋɔŋk any sinɛ tonur Wɛɛŋak godeyika Sambatɛyɛɛkoŋkuk. Iɗit sinɛ lɔsiɗiik kikɔɔ ɓeesɛ ret pɛɛyeen nɛɛkɛk adaktan."

¹²"Taapar wargatɛ wosɛytaana Waakoyotoŋk gode Sambatɛyoŋk sinaana ar Pergamooneek, 'Ege sini pɛɛni iɗit sinɛ lak aarɛ sinɔ ɗɔmu gɔɔ baŋɛk.

¹³Ɗegera kɛ arkin nyon sinɔɔnɛ arkiɗ barsum setanik. Kɛygun ɓɛlkɛ oko sinikiŋ, gaamunkan tiriya gaaŋk a ɓaŋkawuŋ, ɛkan kin kaadɛt ŋaadiyɛ sigɛ lakin eetek aasi ɓeny sinaanɛkan ɓɛɛlɛɛɗ Antipaas sinɛkan waawas eetik, a ŋaadɛɛŋɔŋk, sinɛkan ɓokotɛɛ iinakɛ kɔɔruk, nyon sinaanɛ beeɗiɗ setank.

¹⁴Mayakana, lakɛ ola a omoŋ omoŋ sigɔne ɓooya sɛɛgŋɔŋk. Lakɛne kɔɔr joop a omoŋ omoŋ sigɔ nomɛrɗi rɔɔriyɔn Bɛlɛaamuk, sinɛɓa rɔɔriyaaɗ Baalakik sinɛɓa riiɓe gaŋtan kɛnɔ gaŋirɗi joop Israeelik, kɛnɔ ɗamar ɗama sinɔkɔ uduŋɛɛ raŋawotaak ɛ kɛnɔ ijaagir ruunyikeen.

¹⁵Ɛɓɔrɛ ɓɛɛlɛr sooy lak iinik joop sigɔ nomɛrɗi rɔɔriyɔn joop Nikolaak.

¹⁶Agut sini weeraaka tikiyɛɛkɛ Waakoyota, ma ɔkɔn kiikin weeriitŋ, nɛkɔɔna mɛlɛɛra a gorgorŋ nɛkɔɔ sɛɛg muka aarɛɛ sinaanɛ ar ad naakɛkik.

¹⁷In tiyɛ iɗit sinɛ lak weenak any sinɛ tonur Wɛɛŋak godeyika Sambatɛyɛɛkoŋkuk. Iɗit sinɛ lɔsiɗiik gijaakɔɔ sɛɛn mɛnna sinɛɓa dugɛɛk, a giɗee sinɔ tupeenyŋɔŋk sinɔɓa taapɛɛɗɛ tiriya sigɔ tɔɔmɔkuk. Ɗegeera sini iɗit sinɛkoy boŋɗiik dakɛɗa."

¹⁸"Taapar wargatɛ wosɛytaana Waakoyotoŋk gode Sambatɛyoŋk sinaana ar Tiyatirooneek, Ege sini pɛɛni Tɔɔn Waakoyotoŋk, sinɛ ɗaawur taamɛ gɛɛnɛ a ito maɗ, ɛ nyaalɛr derak gɛɛnɛ a ito awɛ sinɔɓa lorɛ maɗik.

¹⁹Ɗegera any sinɛ ijaaginkiŋ, a mɛyin nook, a ŋaadiyɛ gooŋk, a ijaag nook a ɓaŋkaawurɔn nook oolaanik, ɛ ɗegera kɛ ijaagɗiikin sisɔ a kaalɛ sinɛkan tukik.

²⁰Mayakana lakɛ any sinɔne ɓooyaŋɔŋk. Sinɛkɔ ɓaŋkaawurɗun oolaan agut jarti sinɛ riyɛ kɛ Eljabeelik sinɛ riy ɛɛk kɛ sɛɛnnɔ iɗit pɛrkaakoŋk. Rɔɔriya ɛ ari ijaageer gaaŋk a babadar a ijaagir ruunyikeen ɛ kɛnɔ ɗamar ɗama sinɔɓa uduŋɛɛ raŋaawotakaak.

²¹Gagiɗaaɓa ɔɔtɛ sinɔ gun weeriikiɗ tikiyɛɛkɛ ruunyikeenoŋk, yakana sɛŋk ki ɗɛyɛ.

²²Agut sini oriiraakɔɔ sɛɛn bɛɛroya rakatɛyoŋk. Ɔkɔnkɔɔ kirki weeriit ijaag nɛɛkɛ sinɔɔnɛ ŋɛɛwɛnŋɔŋk joop sigɛ ibiɗi a sɛɛnikiŋ, nɛkɔɔ oriira sɛɛg rakatɛya sinɔɔna obiiŋɔŋk,

²³ɛkoy ɓokoota tɔɔmɔk gɛɛŋk. Nɛkoy ɗegerar godeyi Sambatɛyɛɛkoŋk baŋɛ kɛ Eet iɗit sinɔ mermen kalbi etoŋk a ɓayɛk, ɛkoy koya eta a omoŋ omoŋ oko ijaag nɛɛk.

²⁴Sisɔ tona iinaka sigaagakan ŋayɗiikɔ Tiyatirooneek, iinak sigɛkan kiir nomɛ rɔɔriyɔɔn nɛɛkɛ, ɛkan kiir boŋiiɗ any setanik sinɛ dugaaŋɔŋk jɛtik. Kiira kɔna tuukɛ diil om sineena raŋana.

²⁵Tona kɔna kɛ in gaamɛɛ a ɓaŋkawuŋ any sinɛ latukarik mɛlɛɛɗa nɔkoy mɛlɛrkiɗaak.

²⁶Iɗit sinɛ lɔsiɗiik ɛ dusanɛ ijaag naak pediyaak, gagiɗaakoy ɓaŋkawuka joope baŋɛ raŋk.

²⁷Ɓalikoy sɛɛk gumboy awɛytoŋk, ɛ koy rɛɛm sɛɛk a ito kebetɔk suɓoyoŋk. Ege sini ɓaŋkawuka sinɛkan boŋka sooy lak Baabɛɛk.

²⁸Gagiɗaakoy ɓɔra bomboloot kolɛɛtoŋk.

²⁹In tiyɛ iɗit sinɛ lak weena sinɔ tiiɗiŋɔŋk any sinɛ tonur Wɛɛŋak Godeyika Sambatɛyɛɛkoŋkuk."