Read majang Dɛnɛɛ Pɛrka Yowanisik 21 Bible Online

Dɛnɛɛ Pɛrka Yowanisik 21 - majang bible

Dɛnɛɛ Pɛrka Yowanisik 21

¹Nɛkan dɛna ɗoo sinɔ tɔɔnuk a dari sinɔ tɔɔnuk, agut sinɔ ɗoyurkan ɗoo sinɛkan jeemɛk a dari sinɛkan jeemɛkiŋ. Kɛɛ koyɓɔ seedi son gɔrɔ sinɔ obiiŋɔŋk.

²Ɛkan dɛna Katamɛ sinɛ Geetitank, Yorsaleem sinɛ tɔɔnuk, a kus dari sooy lak Waakoyok, a kan ragadi ɛɛk oko tagoon sinɔ ŋaɗii baabuya nɛɛkaakik.

³Ɛkan tiya koŋgoy sinɔ ɗooruŋɔŋk a ŋaarki barsum nɛɛkɛk sinɔ tonu kɛ, "Dɛnko, nyon beeɗitoŋk Waakoyotoŋk joope gɛɛnɛ kɔɔr, ɛkoy sɛŋk beeɗir a sɛɛg agut omoŋ, dakɛrkoy a joop gɛɛŋk, maɓɔrɛ Waakoyo ɔɗɔwa nɛɛka sɛɛn a sɛɛg agut omoŋ, nɛ dakɛ sɛɛga a Waakoyo nɛŋk.

⁴Poosɛkoy sɛɛge pileetak, kɛɛ koyɓɔ seedi son rer, a san, a wuɗa, a rakatɛ agut sinɔ ɗoyurkan ola sigɛɓa jeemɛkiŋ.

⁵Ɛkan tonu sɛŋk sinɛkan dokuɗe barsum nɛɛkɛkik kɛ, "Dɛnko, araakɔɔ ola baŋɛ a tɔɔmɔk," ɛkan ɓɔrɛta tonu kɛ, "Taapu sini, agut sinɔ ege sigi pɛɛniyɛ sigɔ ŋaadɛɛ ɛ eekeerik."

⁶Ɛkanta tonu kɛ "Dusanɛɛkɔŋ, Eet sinɛ Alpaak ɛ Omeegaak, sinɛɓa tukik ɛ sinɛkoy pediyaak. Gijaakoy iɗit sinɛ lak paark maawu tuny wɛɛŋakoŋk sɔkɔn aki ɓaliɗ.

⁷Iɗit sinɛ lɔsiɗiik boŋukoy sini baŋɛ, ɛkoy dakigiɗa a Waakoyo, makoy ɓɔrɛ dakɛ a tɔɔn naak.

⁸Mayakana joop sigɛ ɓɔɔjakik, a sigɛti kir ŋaaditik, a sigɔ somkaanakik, a sigɔ ɓokootaaŋɔŋk, a sigɔ ruunykaanakik, a sigɔ ŋeytunuk, a sigɔ ugumer raŋaawotakaak, a nyonkaanak baŋɛ nyonkoy nɛŋk goroo sinɔɔnɛ obiiŋɔŋk moɗiŋɔŋk koon sinaanɛ moɗik tak. Ege sini rer pɛɛyeen nɛɛk.

⁹Nɛkan wosɛytaanakɛ Waakoyotoŋk sigaagɛ tula pɛɛyk sinɔ omoŋɔŋk, sinɛ lak ola tuutoŋk sigɛ tula pɛɛyk sigɛ enyɛrgiɗɛɛ rakatɛɛ sigɔ boobɛrŋɔŋk sigɛ tula pɛɛyk sigɛkoy pediyaak kus son lak eetik, nɛkanta tonu kɛ, "Waɗik, yaaŋakɔɔna Tagoon, jarti sinɛ tɔɔn Jiŋkuy sinɛkik."

¹⁰Nɛkanti diile Wɛɛŋakɛ kurkuma sinɔɔna obi ɛ jeeɗoŋɔŋk, nɛkanta yaaŋɛ katamɛ Yorsaleemuk sinɛ Geetitank, a kus dari sooy lak Waakoyok,

¹¹ɛkan ɗaawu katamɛ nɛɛkɛ eemɛyɔɔn Waakoyotoŋk. Nɛkan pɛɗɛrka nɛɛkɛ ito giɗee sinɔ kɛ iyoosapidik sinɔ obi gati nɛɛkɛ jɛtik, ɛ gayi a ɓɛɛrawoy sinɔ mentanŋɔŋk.

¹²Lakkan masarɛ giɗetoŋk sinɔ obii ɛ jeeɗo rakaayak, sinɔ lak tugaateer a aarin a pɛɛyk, ɛkan ɛtɛr tugaateerɛ sigaagɛ aarin a pɛɛyk, wosɛytaana Waakoyotoŋk sigɔ aarin a pɛɛyk, ɛɓa taapɛɛ tugaateerɛ gɛɛnɛ tiriya komoyɛ joop Israeelik sigɛ aarin a pɛɛyk.

¹³Lakkan tugaateer a jiit goyse mɛlkiɗ waawuyk, maɓɔrɛ goyse ɗiirirgeeɗ waawuyk jiit, maɓɔrɛ goyse kantunak jiit, maɓɔrɛ goyse ɗiɗikaak jiit.

¹⁴Ijaagɛɛɓa masarɛ katamɛ nɛɛkik epattaanakɛ giɗekoŋk sigɔɔgɛ aarin a pɛɛyk, nɛkan taapɛɛ sɛɛge raŋk tiriya wosɛytaanak sigɛ aarin a pɛɛyk Jiŋkuy nɛɛkik.

¹⁵Nɛkan lak wosɛytan sinɛkan tonɗiik gumboy rɔmɛɛɗoŋk workeyoŋk kɛnɔ rɔmɛɛɗ katamɛ nɛɛk, a tugaateer gɛɛŋk, a masarɛ nɛɛkik.

¹⁶Lakkan katamɛ nɛɛkɛ gɔɔteer a aŋan sigɔ rɔmaatu jeeɗoka nɛɛkɛ a bakanyka nɛɛkɛŋɔŋk. Rɔmɛkan sɛŋk katamɛ nɛɛk gumboy nɛɛkɛ, egekan jeeɗoka nɛɛkɛk kiilo meetera kumɛɛ pɛɛy a ɗiɓɛɛ aŋan, maɓɔrɛ ɛtɛ bakanyka nɛɛkɛ a jeeɗoka nɛɛk rakaaya oko sinɛk.

¹⁷Nɛkan ɓɔrɛ rɔmɛ masarɛ sinɛ giɗetoŋk, egekan dildilka nɛɛkɛ ɗunɗumtaana ɗibɛ omoŋ a pɔlpɔlɛ joop pɛɛyk a aŋan, rɔmɛɛɗ sinɔɔnɛ ɗegerar jook sinaanɛkan rɔmɗiiɗ wosɛytan nɛɛkɛkik.

¹⁸Ijaagɛɛɓa masarɛ sinɛ giɗetoŋk iyaspide, nɛkan ijaagɛɛ katamɛ nɛɛk workee sinɔɔnɛ mentan a ito ɓɛɛrawoyk.

¹⁹Lɛɛmɛɛɓa epattan sinɛ giɗetoŋk masarɛ sinɛ giɗetoŋk katamɛ nɛɛkik giɗeekɛ sigɔɔgɛ obi gati nɛŋkŋɔŋk ɓɛɛlɛr kundiyaakɛk. Egekan omoŋeen nɛɛkɛ iyaspid, ma pɛɛyeen nɛɛkɛ sɛnpeer, ma jiiteen nɛɛkɛ kelkedoon, ma aŋaneen nɛɛkɛ mɛrɛgid,

²⁰ma tuuleen nɛɛkɛ sɛrdonkis, ma tula omeen nɛɛkɛ sɛrdiyoon, ma tula pɛɛyeen nɛɛk, kiristiloobe, ma tula jiit nɛɛk birɛle, ma tula aŋan nɛɛk wɛrawure, ma aarin nɛɛk kirispirasis, ma aarin a omoŋ nɛɛk yaakint, ma aarin a pɛɛyeen nɛɛk ametestinos.

²¹Nɛkan latu tugaateer sigɛ aarin a pɛɛyk giɗeek sigɔ kɛ inkuwakik a aarin a pɛɛy, ijaagɛɛɓa tugaateer gɛɛŋk a omoŋ omoŋ giɗe sigɔ tupenyjuŋɔŋk riyɛ kɛ inkuwakik. Maɓa ijaagɛɛ gopan katamɛ nɛɛkik workee sinɔɔnɛ pɔllɔwɛ a dɛnɗiitarkiɗɛɛ a ito ɓɛɛrawoyk.

²²Kaa kan taanta katamɛ nɛɛkɛ tak Gode sinɔ Geetitank, agut sinɔ Suumi Waakoyo sinɛ Oolɛ ola Baŋɛk a Jiŋkuy nɛɛk Gode nɛɛk sinɔ Geetitank sɛɛg.

²³Ki ɗɛyɛ katamɛya nɛɛka a tipeyɗigeeɗ waawuy a ɛyɛn, agut sinɔ ege eemɛyɔn Waakoyotoŋk pɛɗɛrka nɛɛk, maɓɔrɛ ɗaawan nɛɛk Jiŋkuy nɛɛk.

²⁴Weeweriikoy joop ɗokanɛɛkoŋk pɛɗɛrkaat nɛɛkɛk, ɛkoy ɗɔkarki tapaak ɗookoŋk eemɛyɔn nɛŋk sɛɛna.

²⁵Nɛkoy kɛɛ koriiɗ tugaateer gɛɛŋk adaktan, agut sinɔkoy kiiɗɛ kaay saadik.

²⁶Nɛkoy ɗɔkarki joop ɗokanɛɛkoŋk obiika a eemɛyɔn katamɛya sinaana.

²⁷Yakana kikoy guugunyɔn any sinɔ keerɛŋɔŋk, a iɗit sinɔ ijaag somikeen maŋk tonu nyonuk. Makoy guugunyar joop sigɛɓa taapɛɛ tiriya gɛŋk wargatɛya wɛɛŋakoŋk Jiŋkuy nɛɛkik dakɛɗa.