Read majang Dɛnɛɛ Pɛrka Yowanisik 22 Bible Online

Dɛnɛɛ Pɛrka Yowanisik 22 - majang bible

Dɛnɛɛ Pɛrka Yowanisik 22

¹Nɛkanta yaaŋɛ wosɛytan sinɛ Waakoyotoŋk gɔrɔ maawu wɛɛŋakoŋk, sinɔ kus barsum Waakoyotoŋk a jiŋkuy nɛɛkik, sinɔ pɛɗɛɛɗ a pɔllɔɔwɛ a ito ɓɛɛrawoyk,

²nɛ gonku sinɔɔnɛ gopan sinɛ katamɛ nɛɛkɛkik sinɔɔnɛ kɔɔroŋk. Ɛɓɔrɛ lakɛ kɛntɛyeerɛ gɔrɔ nɛɛkik kɛɛt wɛɛŋakoŋk sinɔ aaɗor ɛyɛkeerɛk, nɛ gaɓɛ taamɛ eme agut aarin a pɛɛy, nɛ peeŋɔk gɛɛnɛ ebɔdɛr joop ɗokanɛkoŋk.

³Kɛɛ koyɓɔ seedi son koony ara. Arkoy barsum Waakoyotoŋk a Jiŋkuy nɛɛkik katamɛɛ nɛɛkɛ tak, ɛkoy ugumergeeɗ ijaager gɛɛnɛk.

⁴Dɛnɛrkoy taamɛ gɛɛŋkiŋ, atukoy tiriya gɛɛnɛ tɛpɛɛnakɛ gɛŋk.

⁵Ɛkoy kɛɛ kaay ara, kikoy sɛɛga ɗɛyɛ pɛɗɛrka ɗaawanoŋk maŋk waawuyoŋk, agut sinɔ dakɛkoy sɛɛga Suumi Waakoyot a pɛɗɛrka, ɛkoy tapaaɗaanir nɔkoy nɔkoyk.

⁶Ɛkanta tonu wosɛytan nɛɛkɛ kɛ, "Pɛɛniyɛ sigi eekerkaanak ɛ ŋaadɛɛ sɛɛg. Ɛ Suumi Waakoyo, sinɛ wɛɛŋa joop pɛrkaakoŋkuk, wosɛykikan wosɛytan nɛɛk kɛnɔ yaaŋɛ ijaageera gɛɛna ola sigɛkɔɔ ɓɛɛlɛr kɛ gonyuŋɔŋk."

⁷Tonukan Yeese kɛ, "Dɛnko, mɛlɛɛraakɔɔ a gorgorŋ. Geetitan iɗit sinɛ koorɛ pɛɛni pɛrkaakoŋk wargatɛ sinik."

⁸Eet Yowanis sinɛkan tiya ɛ dɛna ola sigik. Saakan tiyɛɛɗa ɛ dɛnɛɛɗa sɛɛgik, nɛkan ɗiirira deraka wosɛytan sinɛ kanta yaaŋɛ ola sigik kɛnɔ uguma sɛɛna,

⁹yakanakanta tonu sɛŋk kɛ, "Kat arin oko sinɛk. Eet ijaagen a iin a masookoyak sigɛ joop pɛrkaakoŋk, a joop sigɛ koorɛr pɛɛni wargatɛ sinik baŋɛ agut omoŋ. Ugumu Waakoyota."

¹⁰Nɛkanta tonu kɛ "Agut sinɔ wɔɔŋkuɗ ɔɔtɛ nɛɛkɛŋɔŋk, nɛ kat korun dikoy taapiyɛɛkoŋk pɛɛni pɛrkaakoŋk wargatɛ sinik.

¹¹Iɗit sinɔ ijaag any sinɔ ŋɛɛwɛnŋɔŋkuk in ijaag any sinɔ ŋɛɛwɛnŋɔŋk, ma iɗit sinɔ somkank in sɛɛn somkan, ma iɗit sinɔ mentanŋɔŋk nɛ in mentan, ma iɗit sinɔ geetitank, in sɛɛn geetitan."

¹²"Dɛnko, mɛlɛɛraakɔɔ a gorgorŋ. Diilerakɔɔ ruukeet naak ɗuma, nɛkɔɔ koya joopa baŋɛ oko any sinɛkan ijaagirk.

¹³Eet Alpaa ɛ Omeegaa, sinɛɓa ɔɗɔɔkɛk a sinɛkoy baŋiyaak, sinɛɓa tukik ɛ sinɛkoy pediyaak.

¹⁴Geetitaanak joop sigɛ aadir abiyak gɛŋk kɛnɔkoy pɛgɛɗɛɛ sɛɛga nɔ mɛlɛr kɛɛta sinaana wɛɛŋakoŋk, ɛ kɛnɔ guugunyar katamɛya nɛɛka tugaateerɛ gɛɛnɛkik.

¹⁵Joop sigɔ ŋuuja a ito wartunk, a ŋeytun, a ruunykaanak, a joop sigɔ ɓokootaaŋɔŋk, a joop sigɔ ŋaadir raŋaawotakik, a joop sigɔ porur ɛ arir nyonuk atukoy katamɛɛ nɛɛkɛ walas.

¹⁶Eet Yeesee wosɛyɛɛrakan kɔna wosɛytan naak godeyika Sambatɛɛkoŋk kɛnɔ kɔna waasɛ eekeer any sinik. Eet tuukan ɛ komoy Daawitik, Eet bomboloot sinɔ ɗaawu kuleetik."

¹⁷Wɛɛŋa sigɔ Geetitaanakik a tagoon nɛɛk tonur kɛ, "Waɗik." Iɗit sinɛ tiyɛk, in tonu kɛ, "Waɗik." Iɗit sinɛ lak paark, in kusuɗ kɛnɔ ute maawu wɛɛŋakoŋk sigɛ ɗɛyɛk sɔkɔn a ki koyiiɗ.

¹⁸Rɔɔrɔkaaka eta sinaana tiyɛ pɛɛni pɛrkaakoŋk wargatɛ sinik. Ɔkɔn lakɛ iɗit sinɔ tuukeer sɛɛga any omkuŋ, nɛkoy tuukergeeɗ Waakoyot rakatɛɛ sigɔ boobɛrŋɔŋk sigɛɓa taapɛɛ wargatɛya sineenaakiŋ,

¹⁹ɛ ɔkɔn lakɛ iɗit sinɔ bitakɛ pɛɛni sinɔ omoŋɔŋk sineeneɓa taapɛɛ wargatɛya sineena pɛrkaakoŋkuk, bitakɛɛɗkoy Waakoyot milki taamɛ kɛɛt sinɛ wɛɛŋakoŋk a katamɛɛ sinaanɛ geetitank sinaanɛɓa taapɛɛ wargatɛya sineenaak.

²⁰Iɗit sinɛ waasɛ eekeer ola sigik tonu kɛ, "Ii, mɛlɛɛraakɔɔ a gorgorŋ." Ameen. Waɗik, Suumi Yeese!

²¹In wookan Suumi Yeeseek a joop Waakoyotoŋk baŋɛ. Ameen.