Read majang Dɛnɛɛ Pɛrka Yowanisik 3 Bible Online

Dɛnɛɛ Pɛrka Yowanisik 3 - majang bible

Dɛnɛɛ Pɛrka Yowanisik 3

¹"Taapar wargatɛ wosɛytaana Waakoyotoŋk gode Sambatɛyoŋk sinaana ar Sɛrdeseek, Ege sini pɛɛni iɗit sinɛ lak wɛɛŋa Waakoyotoŋk sigɔ tula pɛɛyk a maryɔ sigɛ tula pɛɛyk. Ɗegera ijaag nookkuŋ. Ito iin bɔdtan tiriyaakɛ, mayakanakan rɛɛrin.

²Ɓeɗik ɛ ɓaŋkaawurun olaatɛ sigaagɛ ŋayɗiikik sigɛ gunkɔɔ rɛrɗink, agut sinɔ kakɔ laŋiiɗ ijaag nook a liki taamɛkɛ Waakoyo naakik.

³Koɓak sisɔ any sinɛkan boŋunk a sinɛkan tiyink, tayageeɗ ɛ weeriikin tikiyɛɛkɛ Waakoyota. Ma ɔkɔnkɔɔ kin ɓeɗiŋ, nɛkɔɔna mɛlɛɛra okokɔ agaltoŋk, ɛkɔɔ kin ɗegerɔɔn kɛ mɛlɛɛra kɔɔna ɔɔtɛ sinɔɔnɛ ɛtɛ ɛkik.

⁴Mayakana lakɛ Sɛrdesee joop a tekerŋ sooy lak iinik sigɔkan kir dirkiyɛ abiyak gɛŋkik. Ŋaararkɔɔ a Eet agut omoŋ a latu abiyak sigɔ tupenyjuŋɔŋk, agut sinɔ beeɗirkan oko sinɛ ɗɛyɛɛɗ Waakoyotuk.

⁵Iɗit sinɛ lɔsiɗiik kadikɔɔ abii sinɔ tupeenyŋɔŋk oko sɛɛg. Kiirakɔɔ elaarɛɛt tiriya gɛɛŋk Wargatɛɛ Wɛɛŋakoŋk, yakana waasaakɔɔ ɓɔra tiriya gɛɛŋk taamɛkɛ Baabɛɛk a wosɛytaanakɛ gɛɛnɛk.

⁶In tiyɛ iɗit sinɛ lak weenak any sinɛ tonur Wɛɛŋak godeyika Sambatɛyɛɛkoŋkuk."

⁷"Taapar wargatɛ wosɛytaana Waakoyotoŋk gode Sambatɛyoŋk sinaana ar Piladɛlpiyakeek, Ege sini pɛɛni iɗit sinɛ geetitan ɛ eekerkank, ɛ lak kulpiyɛ Daawitik. Sinɛkɔ tayɛ sɛŋkik nɛ kɛɛ iɗit sinɔ koruk, ɛ sinɛkɔ koruk sɛŋkik nɛ kɛɛ iɗit sinɔ tayɛk.

⁸Ɗegera ijaag nookuŋ. Dɛnko, riiɓaa kɔne taamɛkɛ tuga sinɔ taytank sinɔ kɛɛ iɗit sinɔ oolɛ a koruŋɔŋk. Ɗegera kɛ tɛm ɓaŋkaawuka nookɛŋ, mayakanakɔ koorun pɛɛni naakiŋ, kinkɔ ɓɔrɛ kaadɛt tiriya gaaŋk.

⁹Joop sigɛ atu tolɛɛɗ setanik sigɛ tonur nyon kɛ sɛɛg nɔ joop Ayuuduk, mayakana moko sɛɛg joop Ayuuduk. Araakɔɔ sɛɛg a kurak nɛne ɛtɛr korontunɛ derakɛ goonɛk, ɛkɔɔ ara sɛɛg a ɗegerar kɛ poraaniŋ.

¹⁰Agut sinɔkɔ koorɛɗin sekiyɛ sigɛkanna tona kɛnɔ ɓaŋkaawurun oolaan nɔ ɛtink, koorakɔɔ ɓɔrɛni sayitii sinaanɛkɔɔ rakatɛyoŋk sinaanɛkɔɔ mɛlki ɗooka nɛɛka raŋana baŋɛk kɛnɔ paari joop sigɛ beeɗir ɗook nɛɛkɛ raŋk.

¹¹Dɛnko, mɛlɛɛraakɔɔ a gorgorŋ. Gaamu any sinɛ lakink a ɓaŋkawuŋ kɛnɔ kat lakɛ iɗit sinɔ ne boŋu dooroy nook eemɛyɔɔnoŋk.

¹²Iɗit sinɛ lɔsiɗiik araakɔɔ a tuusi Godeey sinaanɛ Geetitank tak Waakoyo naakik, kiikikoy saadi ŋaarin a daktan. Taapakoy sɛɛne raŋk tiriya Waakoyo naakik, a tiriya katamɛ Waakoyo naakik, Yorsaleem sinɛ tɔɔnuk sinɛ worworiik dari sooy lak Waakoyo naakik. Ɛkɔɔ taapa sɛɛne tiriya gaaŋk sigɛ tɔɔmɔkuk.

¹³In tiyɛ iɗit sinɛ lak weena sinɔ tiiɗiŋɔŋk any sinɛ tonur Wɛɛŋak godeyika Sambatɛyɛɛkoŋkuk."

¹⁴"Taapar wargatɛ wosɛytaana Waakoyotoŋk gode Sambatɛyoŋk sinaana ar Lodokiyaakeek, Ege sigi pɛɛniyɛ Ameenik, iɗit sinɛ ŋaadɛɛ ɛ eekerkank sinɛ waasɛ eekeerik, ɛ ɓali riiɓ Waakoyotoŋkuk.

¹⁵Ɗegera ijaag nook kɛ kin salokaa ɛ kin paakkaaŋ. Ɔkɔn salokun maŋk paakkin nɛgun dɔɔs.

¹⁶Agut sinɔ kiiɗin saloka ɛ kin paakkaak ma jiŋjiŋkinŋɔŋk, nɛni topaayɛɛra ad naakɛkiŋ.

¹⁷Tonun kɛ, 'Eet worikan, laka any baŋɛ, kɛɛɓɔ any sinɔta ɗɛyɛk. Mayakana kin ɗegerɔɔn kɛ iin rakatɛkan, iin sankan, iin giroykan, iin mot, ɛ ɓɛɛlin konaan.

¹⁸Rɔɔriyaani kɛnɔ ɓalin worke sinɔ mentanŋɔŋk eete sinɔkan tamɛ maɗik, kɛnɔkɔɔ iin worikan. Ɛ ɓalin abii sinɔ tupeenyŋɔŋk nɔ kadin ɛɛka nookaak ɛ miinyin konaanikeen nook sinɛ keerɛɛk. Ɓali ɓɔrɛ korus nɔ gaɓun taamɛka goonaak kɛnɔkɔɔ dɛnɗiikin.

¹⁹Koykoya ɛ goopa joop sigɛ poraakiŋ. Agut sini ɓaŋkaawurk ɛ weerikin tikiyɛɛkɛ Waakoyota.

²⁰Dɛnko, ɛta tugaat nɛ ɓɔɔkɛyɗikaaŋ. Ɔkɔn lakɛ iɗit sinɔ tiyɛ koŋgoy naak nɛta tayɛ tuga nɛɛkiŋ, nɛ guugunyura son lak sɛɛnik nɛ ɗamikii a sɛɛn agut omoŋ, maɓɔrɛ ɗamikii a Eet agut omoŋ.

²¹Iɗit sinɛ lɔsiɗiik araakɔɔ sɛɛn a dokiiɗe a Eet agut omoŋ barsum naakɛk, oko sinɛɓa lɔsiɗiiɗa ɔɗɔwa naaka ɛɓa dokiiɗe a Baabɛɛ agut omoŋ barsum nɛɛkɛkik.

²²In tiyɛ iɗit sinɛ lak weena sinɛ tiiɗiŋɔŋk any sinɛ tonur Wɛɛŋak godeyika Sambatɛyɛɛkoŋkuk.' "