Read majang Dɛnɛɛ Pɛrka Yowanisik 5 Bible Online

Dɛnɛɛ Pɛrka Yowanisik 5 - majang bible

Dɛnɛɛ Pɛrka Yowanisik 5

¹Dɛnaakan wargatɛ sinɔ tintimtank[3] a ar ariit ɗiɗikakɛ iɗit sinɛkan dokuɗe barsum nɛɛkɛkik. Lakɓa taapiyɛ gɔɔteerɛ sigaagɛ pɛɛyk ɛɓa korɛɛ a nyonita tula pɛɛyk.

²Ɛkan ɓɔrɛ dɛna wosɛytan Waakoyotoŋk sinɔ ɓaŋkawuŋɔŋk a tonɗi a ɗooruŋ kɛ, "Wooɗ sinɛ lak ɓaŋkawuka sinɔ oolɛ a ɓarɓaɗɛ wargatɛ nɛɛk ɛ ɓakati dikoyɛ sigɛ taapiyɛɛkoŋk?"

³Yakanakan kɛɛ iɗit sinɔ oolɛ a ɓarɓaɗɛ wargatɛ sinɛ nɔ dɛnɛ takan nɛɛkik dari maŋk ɗook maŋk ɗook goyse ɗeek.

⁴Nɛkan kuɗa jɛt agut sinɔkan kiiɗɛ laŋiiɗ iɗit sinɔ lak ɓaŋkawuka sinɔ oolɛ a ɓarɓaɗɛ wargatɛ sinɛ nɛ dɛnɛ takan nɛɛkik.

⁵Nɛkanta tonu gutarɛyɛɛkɛ sigaagɛ omaay kɛ, "Kat kuɗun. Ɗɛpɛ sinɛ tuukan Yuudaak, sinɛ komoy Daawitik, lɔsɛkan any baŋɛ kɛnɔ lak ɓaŋkawuka sinɔ oolɛ a ɓarɓaɗɛɛɗ wargatɛ sinɛ a sinɔ ɓakatiɗ dikoyɛ sigɛ taapiyɛɛkoŋk tula pɛɛykiŋ."

⁶Nɛkan dɛna a ɛtɛtɛr jiŋkuy sinɔ gayi a kɔ ŋɔɔlɛɛŋɔŋk barsum nɛɛkɛ a riiɓakɔkɛ sigaagɛ latu wɛɛŋak aŋank a gutarɛyɛɛkɛ kɔɔr. Lakkan jiŋkuy sini kolbɛyɛ a tula pɛɛy a taamɛ a tula pɛɛy. Ege sigi wɛɛŋa Waakoyotoŋk sigɔ tula pɛɛyk sigɛkan wosɛykɛɛ ɗooka baŋɛk.

⁷Nɛkan sɛŋk kus nɛ boŋu wargatɛ sinɛ ariit goysa ɗiɗikik ete sinaanɛkan dokuɗe barsum nɛɛkɛkik.

⁸Saakan boŋiiɗ wargatɛ sinɛ, riiɓakɔ sigɛ latu wɛɛŋak aŋank a gutarɛyɛ sigɛ ruumer iɗit a aŋank ruuɗer ɛɛk ɗooka Jiŋkuy sinaanɛ taamɛkɛ. Latukan soŋguyatɔk sɛɛg a omoŋ omoŋ a lɔkɔyɛ workeyoŋk sigɔ latu itaanɛ sinɔ ɗanɗamaaɗ joop Waakoyotoŋkuk.

⁹Ɛkan iiliyar iiliya sigɔ tɔɔmɔkuk kɛ, "Lakin ɓaŋkawuka sinɔ oolɛɗin a boŋun wargatɛ sinɛ, ɛ ɓakatin dikoyɛ sigɛ taapiyɛɛkoŋk, agut sinɔ ŋɔɔlɛɛɓani kɛnɔ ɓalin yɛrom nookɛ joop Waakoyota, komoyeerɛ baŋɛ a atutunɛ baŋɛ a joope baŋɛ a tuukaanakɛ baŋɛ.

¹⁰Arinkan sɛɛg a gayɛr burɛya a ɔɗɔweer tapa ŋaadiyɛɛkoŋk kɛnɔ ijaagɗi Waakoyota naŋk, ɛkoy sɛɛk tapaaɗaanir ɗook raŋk".

¹¹Nɛkan kolɛɛnya nɛkan tiya koŋgoy wosɛytaanak Waakoyotoŋk sigɔ ɓɔɔkaaŋɔŋk ikomɛ sɛɛg kumɛɛkɛk, atuɓa ikomiit nɛŋk miliyooniyɛɛkɛ. Atukan barsum nɛɛkɛ, a riiɓakɔkɛ sigaagɛ latu wɛɛŋak aŋank a gutarɛyɛɛkɛ gɛɛnɛ tookɛɛta.

¹²Nɛ iiliya a ɗooruŋ kɛ, "Ɗɛygeeɗiŋ Jiŋkuy sinɛɓa ŋɔɔlɛɛk, kɛnɔ boŋu ɓaŋkawuka a wori a ɗegerɔn a ɓaŋkaawurɔn, a tukuun a eemɛyɔn a pɔɔsiyɛ.

¹³Ɛkan tiya riiɓakɔ sigɔ latu wɛɛŋak baŋɛ dari a ɗook raŋk a ɗook goyse ɗeek a goroo sinaanɛ obiiŋɔŋk raŋk, a ola sigɛ lak sɛɛg baŋɛ a iiliya kɛ, "In dakɛr pɔɔsiyɛɛk a tukuun a eemɛyɔn a ɓaŋkawuka nɔkoy nɔkoyk, sɛɛna sinaana beeber barsum nɛɛkɛkik a Jiŋkuya nɛɛkaak."

¹⁴Nɛkan arir riiɓakɔ sigɛ latu wɛɛŋak aŋank kɛ, "Ameen", nɛ gutarɛyɛ gɛɛnɛ ruuɗer ɛɛk ɗooka nɛ ugumergeeɗiŋ.