Read majang Dɛnɛɛ Pɛrka Yowanisik 6 Bible Online

Dɛnɛɛ Pɛrka Yowanisik 6 - majang bible

Dɛnɛɛ Pɛrka Yowanisik 6

¹Nɛkan dɛna Jiŋkuy nɛɛk a ɓakati dikoyɛɛkɛ sigaagɛ taapiyɛɛkoŋk sinɛ tukik, ɛkan tiya riiɓakɔ sigɛ latu wɛɛŋak aŋan a tonu sɛɛge omaay ɗooraan sinɔɔnɛ ito tɛɓɛrk kɛ, "Waɗik nɔ kusun dɛnin!"

²Nɛkan mermenaaka nɛ dɛna masoy sinɔ tupeenyŋɔŋk, arkiɗ raŋk iɗit sinɔ lak ɛrgink, nɛkan gagiɗɛɛ dooroy eemɛyɔɔnoŋk, ɛkan ŋaarki lɔsɛɛɗ lɔsɛɛɗa kɛnɔ lɔsiɗi.

³Saakan ɓakatiiɗ Jiŋkuy nɛɛkɛ dikoy sinɛ taapiyɛkoŋk pɛɛyeen nɛɛkik, nɛkan tiya a tonu riiɓakɔkɛ sigaagɛ latu wɛɛŋak pɛɛyeen nɛɛkɛ kɛ, "Waɗik!"

⁴Nɛkan ŋaarki masoy om sinɔ dɛɛ jɛt a ito maɗik, nɛkan gaɓɛɛ eta sinaanakan arkiɗ raŋk ɓaŋkawuka sinɔ boŋiiɗ yaaka ɗook raŋk ɛ ari joop a ŋɔɔŋɔli ɛkanɛɛkɛ gɛŋk. Ɛkan gagiɗɛɛ aarɛ sinɔ obiiŋɔŋk.

⁵Saakan ɓakatiiɗ dikoy sinɛ taapiyɛɛkoŋk jiiteen nɛɛkik, nɛkan tiya a tonu riiɓakɔkɛ sigaagɛ latu wɛɛŋak jiiteen nɛɛkɛ kɛ, "Waɗik!" Nɛkan mermenaaka nɛ dɛna masoy sinɔ kɔjuŋɔŋk ɛ arkiɗ raŋk iɗit sinɔ lak kiilo ariitik,

⁶ɛkan tiya koŋgoy sinɔ kus riiɓakɔɔkɛ sigaagɛ latu wɛɛŋak aŋank kɔɔr kɛ, "Oti sindeek sinɔ kubaaye omoŋɔŋk koyi ɓɛɛnyɔ sinɔ omoŋɔŋk a oti gɛbsik sinɔ kubaayeyɛ jiitik koyi ɓɛɛnyɔ sinɔ omoŋɔŋk, yakana kat sɔɔkun jayti a wɛyin."

⁷Saakan ɓakatiiɗ Jiŋkuy nɛɛkɛ dikoy sinɛ taapiyɛɛkoŋk aŋaneen nɛɛkik, nɛkan tiya koŋgoy riiɓakɔɔkɛ sigaagɛ latu wɛɛŋak aŋank a tonu kɛ, "Waɗik!"

⁸Nɛkan mermenaaka nɛ dɛna masoy sinɔ muuweŋɔŋk a arkiɗ raŋk any sinɔ riyɛ kɛ Rerk, ɛkan nomɛɛɗ siiooluk, ɛkan gaɓɛɛ sɛɛga ɓaŋkawuka ɗook aŋaneene nɛɛkɛk sinɔ omoŋɔŋk, kɛnɔ ɓokor joop aarɛɛ a ŋaawe a goriiɗ a keegukɛ ɗukoŋk.

⁹Saakan ɓakatiiɗ Jiŋkuy nɛɛkɛ dikoy sinɛ taapiyɛɛkoŋk tuuleen nɛɛkik, nɛkan dɛna ant sinaanɛ uduŋeetoŋk goyse ɗeek wɛɛŋa joop sigɔɓa sɛɛg ŋɔɔŋɔɔlɛ agut Pɛɛni Waakoyotoŋk a joop sigɔ waasɛr eekeer gɛɛŋkik.

¹⁰Nɛkan ooyɛr a ɗooruŋ kɛ, "Iin Suumi sinɛ Lak Ɓaŋkawuka Olaatɛ Baŋɛk, iin geetitan ɛ iin eekerkan. A kinkoy pɛrɛdɛɛt joope sigaagɛ beeɗir ɗookuk mɛlɛɛɗa okoɗa, ɛkoy kin tiijet yɛrom naŋk mɛlɛɛɗa okoɗa?"

¹¹Nɛkan sɛɛga a omoŋ omoŋ gaɓɛɛ abiyak sigɔ tupenyjuŋɔŋk ɛkan tonɛɛ sɛɛga kɛnɔ imiinyer a bala ɔɔtɛ nɛɛkɛŋ, mɛlɛɛɗa nɔkoy enyɛɛriɗ ɓɔɔkaaka joop sigɛ ijaagɗiiɗ agut omoŋɔŋk a manyaakak sigɛɓa ɓokootɛɛ oko sɛɛgik.

¹²Saakan ɓakatiiɗ Jiŋkuy nɛɛkɛ dikoy sinɛ taapiyɛɛkoŋk tula omeen nɛɛkik, nɛkan kolɛɛnyaŋ. Nɛkan lakɛ yike ɗookoŋk sinɔ obiiŋɔŋk ɛkan kɔjurku waawuy a itokan miinyɛɛ abiye sinɔɔnɛ kɔjuŋɔŋk makan gayi ɛyɛn baŋɛ a yɛrom,

¹³ɛkan ɗiirarki maryɔ dariyoŋk ɗooka oko sinɛ roorowuɗiikiɗ taamɛ kɛɛtoŋk ɗiinaŋkaat ma yike sɛɛg yoŋgoy sinɔ ɓaŋkawuŋɔŋk,

¹⁴nɛkan ɗoyu dari a gayi a wargatɛ sinɔkan tintiimɛɛŋɔŋk, ɛkan ɗoyur kurkumɛɛk a asuulɛɛ nyonitaakɛ gɛŋk.

¹⁵Nɛkan suumiyɛ ɗookoŋk, a joop sigɛ boobɛrk, a ɔɗɔweer beyaak, a worikaanak, a joop sigɛ ɓaŋkaawark, a joop baŋɛ, a laaŋoyeer a joop sigɛ atu yaakatik, dugiɗiikan kaakakaatɔkɛ a talaɗɛyikɛ kurkumɛɛkoŋk kɔɔr.

¹⁶Nɛkan riyatar kurkumɛɛka a talaɗɛyika kɛ, "In tina ɗirkɛɛ raŋana, ɛ in tin dugɛɛ taamɛkɛ iɗit sinɛkɔ dokuɗe barsum nɛɛkɛkik a goopan Jiŋkuy sinɛk.

¹⁷Agut sinɔkɔ mɛlkiɗ ɓɛɛnyɔ sinɔ obiiŋɔŋk goopanoŋk, nɛ wooɗ sinɛ oolɛ a ɛtɛɛɗ taamɛkɛk?"