Read majang Dɛnɛɛ Pɛrka Yowanisik 7 Bible Online

Dɛnɛɛ Pɛrka Yowanisik 7 - majang bible

Dɛnɛɛ Pɛrka Yowanisik 7

¹Seedi baŋiya dɛnaakan wosɛytaanak Waakoyotoŋk a aŋan sigɔ ɛtɛr gɔɔteerɛ sigɔɔgɛ aŋank ɗookoŋk, nɛ gaamur yoŋgoyiik sigɛ aŋank ɗookoŋk kɛnɔ kat lakɛ yoŋgoy sinɔ yoŋgoyɛ ɗook raŋk maŋk goroo sinɔɔnɛ obiiŋɔŋk maŋk kɛɛnɛ sigaagɛ ɓɛɛlɛrk.

²Nɛkan dɛna wosɛytan Waakoyotoŋk om a kus goyse mɛlkiɗ waawuyk a lak dikoy taapiyɛɛkoŋk Waakoyo sinɛ Obiik, ɛkan riyiri a ɗooruŋ wosɛytaanak Waakoyotoŋk sigɛ aŋank sigɛkan gaɓɛɛ sɛɛga ɓaŋkawuka kɛnɔ sɔɔkɛr ɗoo a gɔrɔ sinɛ obiik, a tonu kɛ,

³"Kat sɔɔkɛɛ ɗoo nɛɛk maŋk gɔrɔ sinɛ obiik maŋk kɛɛn gɛɛŋk mɛlɛɛɗa nɔkɔɔ dikoyɛɛɗii taapiyɛɛkɛ tɛpɛɛna ijaageer Waakoyo naŋkik."

⁴Nɛkan tiya ikomiit joop sigɛɓa dikoyɛɛ sɛɛg dikoy taapiyɛɛkoŋkuk, dikoyɛɛɓa komoyeerɛ Israeelik a joop kumɛɛ ɗibɛ omoŋ a pɔlpɔlɛ joop pɛɛyk a aŋan.

⁵Maɓa dikoyɛɛ komoy Yuudaak a joop kumɛɛ aarin a pɛɛy, ma komoy Roobeelik kumɛɛ aarin a pɛɛy, ma komoy Gaadik kumɛɛ aarin a pɛɛy,

⁶ma komoy Aaseerik kumɛɛ aarin a pɛɛy, ma komoy Niptaleemuk kumɛɛ aarin a pɛɛy, ma komoy Minaseek kumɛɛ aarin a pɛɛy,

⁷ma komoy Simionuk kumɛɛ aarin a pɛɛy, ma komoy Leewiik kumɛɛ aarin a pɛɛy, ma komoy Yisakooruk kumɛɛ aarin a pɛɛy,

⁸ma komoy Jabiloonuk kumɛɛ aarin a pɛɛy, ma komoy Yoosepuk kumɛɛ aarin a pɛɛy, ma komoy Biniyamuk kumɛɛ aarin a pɛɛy.

⁹Seedi baŋiya mermenaakakan nɛkan dɛna joop a ɓɔɔkaaŋ, sigɔ kɛɛ iɗit sinɔ oolɛ a ikomu sɛɛgik. Ŋaaŋararkikan sɛɛk joope, a komoyeerɛ a tuukaanakɛ a atutunɛɛkɛ baŋɛ, ɛtɛrkan barsum nɛɛkɛk a Jiŋkuy nɛɛkɛk taamɛkɛ. Nɛkan kadir abiyak sigɔ tupenyjuŋɔŋk ɛ latu rɛkɛnak bɔdɛɛkoŋk arnɛ,

¹⁰nɛkan ooyɛr a ɗooruŋ kɛ, "Kus ebɔdɛɛt sooy lak Waakoyo naŋk a Jiŋkuy nɛɛkik, sinɛɓa dokuɗe barsum nɛɛkɛ raŋk."

¹¹Ɛtɛrkan wosɛytaanak Waakoyotoŋk baŋɛ barsum nɛɛkɛ tookɛɛta, a gutarɛyɛɛkɛ gɛɛnɛ, a riiɓakɔkɛ sigaagɛ latu wɛɛŋak aŋank, nɛkan supker tɛpɛɛnakɛ gɛŋk ɗoo barsum nɛɛkɛ taamɛkɛ nɛ ugumer Waakoyota,

¹²nɛkan arir kɛ, "Ameen! In geetiyɛ a eemɛyɔn, a ɗegerɔn, a pɔɔsiyɛ, a muusiyɛ, a ɓaŋkawuka, a ɓaŋkaawurɔn, Waakoyota naŋk nɔkoy nɔkoyk. Ameen!"

¹³Nɛkanti kɔyŋɔn gutarɛyɛɛkɛ sigaagɛ a omoŋ kɛ, "A wooɗak sigi latu abiyak sigi tupenyjuŋɔŋk? Makan kurak eet?"

¹⁴Nɛkan jumurguɗa kɛ, "Suumi naakɛ, ɗegeerakin iin. "Nɛkanta sɛŋk tonu kɛ, "Ege sigi joop sigɔkan kurak a kaalɛrki rakatɛ sinɔ obiiŋɔŋk, nɛkan aadir abiyak gɛŋk yɛrom Jiŋkuy nɛɛkik nɛ arir sɛɛg a tupenyjuŋ.

¹⁵Agut sini atu barsum Waakoyotoŋk taamɛkɛ, nɛ ijaagɗi sɛɛna godeey sinaanɛ Geetitank kaay a waawuy, nɛkoy koorɛ sɛɛg iɗit sinɛ dokuɗe barsum nɛɛkɛkik duukaanoy nɛɛkɛk.

¹⁶Kɛɛkoy sɛɛge ŋaawu, ɛkoy kɛɛ sɛɛge paar seedi soon, kikoy sɛɛg toolɛɛt waawuy, ɛkoy ki sɛɛg moɗɛɛɗ paakka nɛɛkɛk.

¹⁷Agut sinɔ koortankoy nɛŋk Jiŋkuy sinɛkan dokuɗe barsum nɛɛkɛ kɔɔruk. Nɛkoy diile sɛɛg tunyakɔɔka maawu wɛɛŋakoŋk, ɛkoy poosɛ sɛɛge Waakoyot pileetak baŋɛ taamɛkɛ gɛŋk."