Read majang Dɛnɛɛ Pɛrka Yowanisik 8 Bible Online

Dɛnɛɛ Pɛrka Yowanisik 8 - majang bible

Dɛnɛɛ Pɛrka Yowanisik 8

¹Saakan ɓakatiiɗ Jiŋkuy nɛɛkɛ dikoy taapiyɛɛkoŋk tula pɛɛyeen nɛɛkik, nɛkan ɓɛɛl ɗɛɛ kɛ many dari ɔɔtɛya sinɔɔna balaaŋɔŋk.

²Nɛkan dɛna wosɛytaanak Waakoyotoŋk sigɛ tula pɛɛy a ɛtɛr taamɛkɛ Waakoyotoŋk, nɛ sɛɛga gaɓɛɛ luuriyatɔk a tula pɛɛy.

³Nɛkan mɛlki wosɛytan Waakoyotoŋk om sinɔ lak lɔkɔy workeyoŋk sinɔ lak itaanɛk, ɛkan ɛtɛ nyon sinaanɛ uduŋeetoŋk. Nɛkan gagiɗɛɛ itaanɛ a obiiŋ kɛnɔ wideer ɗanɗamɔn joop Waakoyotoŋk baŋɛ, ɛ uduŋe nyon sinaanɛ uduŋeetoŋk workeyoŋk sinaanɛ ɛtɛtɛr barsum nɛɛkɛ taamɛkɛk.

⁴Nɛkan ŋaarar toor sinɛ itaanɛ nɛɛkik a ɗanɗamɔn joop Waakoyotoŋk agut omoŋ ariit sinaanɛ wosɛytaanoŋk son lak Waakoyok.

⁵Nɛkan saadi baŋiya wosɛytan nɛɛkɛ boŋu lɔkɔy sinɛ workeyoŋk nɛ enyɛrgeeɗ maɗ nyon sinaanɛ uduŋeetoŋk, nɛkan orku ɗooka, nɛkan lakɛ tɛɓɛr a koŋgoy, a nyaalan, a yike ɗookoŋk.

⁶Nɛkan saadi baŋiya wosɛytaanak Waakoyotoŋk sigɛ tula pɛɛyk ragadir ɛɛk kɛnɔ gotɛr luuriyatɔk sigɛ tula pɛɛyk.

⁷Nɛkan gotɛ wosɛytan omoŋ nɛɛkɛ luuri nɛɛk nɛ orkɛɛ ɗooka malwan a maɗ sinɛɓa saapɛyɛɛ a yɛromk, nɛ moɗi ɗook sigɔɔgɛ jiitik a omoŋ, ɛ moɗi kɛɛn sigɔɔgɛ jiitik a omoŋ, ɛ moɗi ŋɔnyi sigɛ ligimerk baŋɛ.

⁸Nɛkan gotɛ wosɛytan pɛɛyeen nɛɛkɛ luuri nɛɛk nɛkan oriirɛɛ gɔrɔwa sinɔɔna obiiŋɔŋk any sinɔ boobɛŋɔŋk gayi a kurkumk sinɔ moɗɛɛŋɔŋk, nɛkan gɔrɔ sinɔ obiiŋɔŋk sigɔɔgɛ jiitik a omoŋ dakɛ a yɛrom,

⁹nɛkan rɛrar riiɓakɔkɛ sigaagɛ latu wɛɛŋak atu goroo sinɔɔnɛ obiiŋɔŋk takik sigɔɔgɛ jiitik a omoŋ, ɛkan ɓadaaya emɗakɔkɛ sigɔɔgɛ boobɛrŋɔŋk sigɔɔgɛ jiitik a omoŋ.

¹⁰Nɛkan gotɛ wosɛytan jiiteen nɛɛkɛ luuri nɛɛk nɛ ɗirki dari maryɔn sinɔ boobɛŋɔŋk sinɔ moɗi a ito payɛk, nɛ ɗirki gɔrɔwika sigɔɔga boobɛrŋɔŋk sigɔɔgɛ jiitik a omoŋ a tunyakɔɔka mawunoŋk.

¹¹Riyɛ maryɔn nɛɛk kɛ Ɓaayka, nɛkan ɓaayɛr maawu sigɔɔgɛ jiitik a omoŋ, nɛkan rɛrar joop a ɓɔɔkaaŋ agut maawu sigi.

¹²Nɛkan gotɛ wosɛytan aŋaneen nɛɛkɛ luuri nɛɛk nɛkan sɔɔkɛɛ waawuy sigɔɔgɛ jiitik a omoŋ, a eye sigɔɔgɛ jiitik a omoŋ, a maryɔkɛ sigɔɔgɛ jiitik a omoŋ, kɛnɔ kɔjurarki pɛɗɛrkaata gɛŋk sigɔɔgɛ jiitik a omoŋ. Kɛɛ pɛɗɛrka ɔɔtɛ kaayoŋk sigɔɔgɛ jiitik a omoŋ, ɛɓɔrɛ kɛɛ pɛɗɛrka ɔɔtɛ waawuyoŋk sigɔɔgɛ jiitik a omoŋ.

¹³Saadi baŋiya dɛnaakan sagi sinɔ pipir walas taamtuk nɛ tiya a ooyɛ a ɗooruŋ kɛ, "Durikoy, durikoy, durikoy joopa sigaaga beeɗir ɗook raŋk, agut luuriyatɔk ɔgɔ sigɛ ɗɛyɛ a kɔɔ gotɛr wosɛytaanak Waakoyotoŋk sigɛ jiitik!"