Read majang Dɛnɛɛ Pɛrka Yowanisik 9 Bible Online

Dɛnɛɛ Pɛrka Yowanisik 9 - majang bible

Dɛnɛɛ Pɛrka Yowanisik 9

¹Nɛkan gotɛ wosɛytan Waakoyotoŋk tuuleen nɛɛkɛ luuri nɛɛk nɛkan dɛna maryɔn sinɔkan ɗirki dari ɗookak, a gagiɗɛɛ kulpiyɛ utul sinɔ kiiɗɛ sukuk.

²Nɛ saakan ɓukeeɗ utul nɛɛkik, nɛkan ŋaarki tak nɛɛkɛk toor sinɔ ito ŋaarki ugas sinɔɔnɛ obiiŋɔŋkuk. Nɛkan kɔjurarki walɛ taama nɛɛkɛ a waawuy toor sinaanɛ ŋaarki utul sinaanɛk.

³Nɛkan ŋaararki teŋɔɔniyak toor nɛɛkɛ tak nɛ kurak ɗooka raŋana, nɛkan sɛɛga gaɓɛɛ ɓaŋkawuka sinɔ ito sinɛ latu rokokooweenak sigɛ atu ɗookuk.

⁴Nɛkan sɛɛga tonɛ kɛnɔ kat sɔɔkɛr ŋɔnyi maŋk waaytaanak maŋk kɛɛn, mayakana in sɔɔkɛr joop sigɛ kɛɛ sɛɛge tɛpɛɛnakɛ dikoy taapiyɛɛkoŋk Waakoyotoŋkuk.

⁵Kɛɛkan sɛɛga gaɓɛɛɗ ɓaŋkawuka kɛnɔ in ɓokootar sɛɛg, mayakana kɛnɔ in ooɗɛr sɛɛg a ɛyɛkeer tuul. Ooɗiyɛ sigɛ kan sɛɛga gaɓɛɛk, itokan ooɗiyɛ sigɔ kakawarɗi rokokooweenak joopuk.

⁶Ɗɛyɛrkoy joop rer ɔɔtɛ sinaanɛ ɛyɛkeer tuulk, yakanakoy kir laŋiiɗ, ɗɛyɛrkoy jɛt a gun rɛrarŋ, yakanakoy gon sɛɛge retiŋ.

⁷Gayiikan teŋɔɔniya gɛɛnɛ a masoyɛ sigɔkan ragadɛɛ sɛɛg kaarnaak, latukan ɔɗɔɔkɛ gɛŋk raŋk any sinɔ gayi a dooroy eemɛyɔɔnoŋk workeyoŋkuk, makan gayi taamɛ gɛŋk a taamɛ etoŋk,

⁸makan gayi ami gɛŋk a ami peetakoŋk, makan gayi ŋedak gɛŋk a ŋedak ɗɛpɛyoŋk,

⁹latukan kokomeerɛ gɛŋk any kaarnoŋ sinɔ kolɗɛɛ kokomk sinɔ gayi a awɛk, makan gayi koŋgoy tɔɓɔyɔ gɛŋkik a koŋgoy masoyɛ sigɔ ɓɔɔkaaŋɔŋk a gaariyak sigɔ meenɛɛ sɛɛg kaarnaak.

¹⁰Latukan sɔɔsakɔ a keenɔnak sigɔ gayi a rokokooweenakoŋkuk, gaɓɛɛkan sɛɛga ɓaŋkawuka sɔɔsakɔɔka gɛŋk sinɔ ooɗɛrɗi joop a ɛyɛkeer tuulk.

¹¹Latukan suumi sɛɛge raŋk, sɛɛn wosɛytan utul sinɛ kiiɗɛ sukuk sinɔ riyɛ ad Ibiraysitik kɛ Abdoon, ma riyɛ ad Giriikik kɛ Apoliyon.

¹²Ɗoyukan duri sinɛkan tukikiŋ, ma in sisɔ ŋayɗi duriyɛɛk a pɛɛy sigɔkɔɔ mɛlɛrkŋɔŋk.

¹³Nɛkan gotɛ wosɛytan Waakoyotoŋk tula omeen nɛɛkɛ luuri nɛɛk, nɛkan tiya koŋgoy gɔɔteerɛ sigɔɔgɛ aŋank ant uduŋeetoŋk itanɛyoŋk sinɔɔnɛɓa ijaagɛɛ workeek taamɛkɛ Waakoyotoŋk.

¹⁴Nɛkan tonu koŋgoy nɛɛkɛ wosɛytaana Waakoyotoŋk tula omeena nɛɛka sinaanakan lak luurik kɛ, "Woora wosɛytaanak Waakoyotoŋk sigɛ aŋank sigɛkan korkoɗɛɛ sɛɛg goroo sinaanɛ obiiŋɔŋk Epiratiseek."

¹⁵Nɛkan woorkɛɛ wosɛytaanak Waakoyotoŋk sigɛ aŋank sigɛɓa ragadɛɛ sɛɛg sayitiya sineena, a ɓɛɛnyɔwa sineena, a ɛyɛna sineena, a emeya sineena, kɛnɔ ɓokootar joope sigaagɛ jiitik a omoŋk.

¹⁶Egekan ikomiit amaasiniyɛ sigɛ atu masoyɛɛkɛ gɛɛnɛkik miliyooniyɛ ɗibɛɛ pɛɛy, nɛkan tiya ikomiit nɛŋkiŋ.

¹⁷Saakanta ɓuukeeɗɛ any sini dugaaŋɔŋk yaaŋiyɛɛkɛk, nɛkan dɛna masoyɛ a joop sigɔ atu sɛɛge raŋk. A latu ola kaarinɔŋk sigɔ kolɗɛɛ kokomeerik awɛytiiroŋk sigɔ dɛɛta jɛtik, ɛ sɔlurja a kojutuŋ, ɛ daamɛyɛɛk. Gayiikan ɔɗɔ sigɛ masoyɛ gɛɛŋkik a ɗɛpɛyoŋk, ɛkan ŋaarki atutunɛ gɛŋk maɗ a toor a koon.

¹⁸Nɛkan ɓokor komoyɛ joopoŋk sigɔɔgɛ jiitik a omoŋ rakatɛyɛɛkɛ sigɔɔgɛ boobɛrŋɔŋk sigeege jiitik, maɗ nɛɛkɛ a toor nɛɛkɛ a koon sinaanɛkan ŋaarki atutunɛ masoyɛ gɛɛŋkik.

¹⁹Arkan ɓaŋkawuka masoyɛ gɛɛŋkik atutunɛɛkɛ gɛŋk tak a sɔɔsakɔɔkɛ gɛŋk. Nɛkan gayi sɔɔsakɔ gɛŋk a kookowɛ sigɔ latu ɔɗɔɔkuk, nɛ arir joop a meeŋ sɔɔsakɔɔkɛ sigeege.

²⁰Joop sigɛkan ŋayɗiik a kan kir sɛɛg ɓokootɛ rakatɛyɛɛkɛ sigɔɔgɛ boobɛrŋɔŋk kirkikan weeriit tikiyɛɛkɛ Waakoyota agut any sinɛɓa ijaagir sɛɛkik. Kirkan nyɛyɛ ugumeet wɛɛŋaka sigɔɔga somkaanakik, a raŋaawotaka, a workeya, a biriya, a awɛyta, kirkan toŋoɗ ugumeet raŋawootaka sigɔɔgakan ijaagɛɛ giɗeekɛ, a kɛɛnɛ sigɔɔga kir oolɛ dɛnɛ maŋk tiyan maŋk ŋawiitik.

²¹Ɛkan kirki weeriit tikiyɛɛkɛ Waakoyota ɓokootan nɛŋk, a tɔrkiyɔɔn nɛŋk, a ruunyikent nɛŋk, maŋk agɛy nɛŋk.